Ndima Ya 118

U Ambululwa na u Farwa

HO NO fhira vhukati ha vhusiku musi Yudasi a tshi isa gogo ḽihulu ḽa mmbi, vhotshifhe vhahulu, Vhafarisei, na vhaṅwe tsimuni ya Getsemane. Vhotshifhe vho tenda u lifhela Yudasi maseṱha a 30 nga u ambulula Yesu.

U thomani, musi Yudasi a tshi pandelwa zwiḽiwani zwa Paseka, zwi tou vha khagala uri o mbo ḓi livha ha vhotshifhe vhahulu. Nga u ṱavhanya vhenevha vha kuvhanganya vhahulwane vhavho, khathihi na tshigwada tsha maswole. Khamusi Yudasi o thoma nga u vha isa he Yesu na vhaapostola vhawe vha farela hone vhuṱambo ha Paseka. A tshi wana uri vho no ṱuwa, gogo ḽihulu ḽi re na mafumo nahone ḽo hwalaho maḓenzhe na mbone ḽi tevhela Yudasi a tshi bvela nnḓa ha Yerusalema vha buḓekanya Govha ḽa Kidironi.

Musi Yudasi a tshi isa muduba Thavhani ya Miṱwari, u ḓi pfa e na vhungoho ha uri u ḓivha hune a ḓo wana Yesu. Vhukatini ha vhege yo fhiraho, musi Yesu na vhaapostola vha tshi fara lwendo lwa u ya na u vhuya vhukati ha Bethania na Yerusalema, vho vha vha tshi anzela u awela na u vha na nyambedzano tsimuni ya Getsemane. Fhedzi, zwino, khamusi Yesu a tshi nga vha a sa vhonali nga swiswi fhasi ha miri ya miṱwari, maswole a ḓo mu ḓivha hani? Vha nga kha ḓi vha vha sa athu u mu vhona. Nga zwenezwo Yudasi a ita ngafhadzo, a tshi ri: “Ané nda ḓo mu kuvhatedza ndi ene. Ni mu fare, ni ṱuwe nae’ nó mu faresa.”

Yudasi a isa gogo ḽihulu ngomu tsimuni, u vhona Yesu e na vhaapostola vhawe, huno u ya khae o mu livha. U amba nae a ri: “Ndi a losha, mufunzi!” zwenezwo a mu kuvhatedza.

Yesu a fhindula a ri: “Khonani yanga, wo ḓela’ni’?” Nga zwenezwo, a tshi fhindula mbudziso yawe, u ri: “Yudasi, naa U ambulula Murwa-muthu nga u mu kuvhatedza?” Izwo ndi izwo nga ha u ambululwa hawe! Yesu u bvela khagala tshedzani tsha mbone na maḓenzhe a dugaho nahone a vhudzisa a ri: “Ni ṱoḓa nnyi?”

Phindulo ya ri: “Yesu wa Nazareta.”

O ima phanḓa ha vhoṱhe nga tshivhindi, Yesu u a fhindula: “Ndi nṋe.” Vho tshuswa nga tshivhindi tshawe na nga u sa ḓivha zwine vha fanela u zwi lavhelela, vhanna vha humela murahu vha wela fhasi.

Yesu u bvela phanḓa o dzika a ri: “Ndo ni vhudza nda ri ndi nṋe. Arali ni tshi ṱoḓa nṋe, litshani avha vha ṱuwe.” Zwenezwino nḓuni ya nṱha, Yesu o vhudza Khotsi awe thabeloni uri o linda vhaapostola vhawe vha fulufhedzeaho nahone a huna na muthihi wavho o xelaho “arali e si uyo ṅwana o xelaho.” Ngauralo, uri ipfi ḽawe ḽi vuledzwe, u humbela uri vhatevheli vhawe vha litshwe vha ṱuwe.

Musi maswole o no dzivhuluwa, a a takuwa, nahone a thoma u vhofha Yesu, vhaapostola vha ṱhogomela zwine zwa vho ṱoḓa u bvelela. Vha a vhudzisa: “Murena, ri a vha dzhena nga mafumo?” Musi Yesu a sa athu fhindula, Petro, a ṱomola ḽiṅwe ḽa mabanga mavhili e vhaapostola vha vha vho ḓa nao, a vutshela Milixo, mulanda wa tshifhe muhulu. Nṱhani ha uri banga ḽa Petro ḽi reme ṱhoho ya mulanda ḽa mu tumula nḓevhe ya tsha u ḽa.

Musi Yesu a tshi lamula a ri: “Litshani, ni songo dovha!” A tshi kwama nḓevhe ya Milixo, a fhodza tshenetsho tshilonda. Nga zwenezwo u funza ngudo ya ndeme, a tshi laya Petro u ri: “Vhuyedzedza banga ḽau vhudzuloni haḽo; ngauri a faraho pfumo u ḓo vhulahwa nga pfumo. Naa a U ḓivhi zwauri ndi nga kona u humbela Khotsi-anga uri a nthumele mmbi dzi na fumi na mbili dza vharuṅwa?”

Yesu u ṱanganedza u farwa, ngauri u a ṱalutshedza: “Zwo ambiwaho nga maṅwalo, ane a ri zwi ḓo ralo, zwi ḓo khunyelela hani?” Nahone u a engedza: “Naa ndi ḓo litsha u nwa tshinwelo tshe Khotsi-anga a mpha naa?” U tendelana tshoṱhe na lufuno lwa Mudzimu nga hae!

Nga zwenezwo Yesu a amba na gogo. U a vhudzisa: “No bva sa musi hu tshi yo farwa mbava, nó fara mafumo na dzithonga, ngeno hu u ḓa u fara nṋe, we nda vha ndi tshi dzula misi yoṱhe nḓuni khethwa ndi tshi funza; huno ngei ni si mpfare. Hone, izwi zwoṱhe zwi itwa uri hu khunyelele zwo ṅwalwaho nga vhaporofita.”

Zwenezwo tshigwada tsha maswole na murangaphanḓa wa mmbi na vhahulwane vha Vhayuda vha fara Yesu vha mu vhofha. Vhaapostola vha tshi vhona izwi, vha ṱutshela Yesu nahone vha shavha. Naho zwo ralo, muṅwe muṱhannga​—khamusi ndi mufunziwa Marko​—u sala vhukati ha gogo. A nga vha o vha e muḓini we Yesu a ita vhuṱambo ha Paseka hone nahone nga murahu a tevhela gogo u bva henefho. Naho zwo ralo, zwino, u a ḓivhiwa, nahone vha lingedza u mu fara. Fhedzi u shavha a sia luṅwenda lwawe. Mateo 26:47-56; Marko 14:43-52; Luka 22:47-53; Yohane 17:12; 18:3-12.

▪ Ndi ngani Yudasi a tshi ḓipfa e na vhungoho ha uri u ḓo wana Yesu tsimuni ya Getsemane?

▪ Yesu u sumbedza hani u vhilaelela vhaapostola vhawe?

▪ Petro u ita nyito ifhio ya u lwela Yesu, fhedzi Yesu u vhudza Petro mini nga ha zwe a ita?

▪ Yesu u zwi dzumbulula hani uri u tendelana tshoṱhe na lufuno lwa Mudzimu nga hae?

▪ Musi vhaapostola vha tshi ṱutshela Yesu, ndi nnyi a salaho, nahone hu itea mini khae?