Ndima Ya 5

U Bebwa ha Yesu​—Ngafhi nahone Lini?

MUVHUSI wa Muvhuso wa Roma, Khosi Augusto, o vhea mulayo wa uri muṅwe na muṅwe a vhuyelele muḓini we a bebelwa khawo u ṅwalisa. Ngauralo Yosefa u fara lwendo lwa u ya fhethu he a bebelwa hone, muḓini wa Betlehema.

Vhathu vhanzhi vha Betlehema u ṅwalisa, nahone fhethu hune Yosefa na Maria vha nga wana hone vhudzulo ndi ngomu tshitaleni fhedzi. Henefha, hune dzimbongola na zwiṅwe zwifuwo zwa valelwa hone, Yesu u a bebwa. Maria u mu putela nga malabi a miṅwenda nahone u mu ladza nga ngomu mukungwani, fhethu hune ha vhewa zwiḽiwa zwa zwifuwo.

Vhukuma ho vha hu nga vhulivhisi ha Mudzimu uri Khosi Augusto a ite mulayo wa u ṅwalisa. Hezwi zwo ita uri zwi konadzee uri Yesu a bebwe Betlehema, muḓi we Maṅwalo a vha o amba hu tshee nga phanḓa uri hu ḓo vha fhethu hune muvhusi o fulufhedziswaho a ḓo bebelwa hone.

Uvhu ndi vhusiku ha ndeme lungafhani! Nnḓa masimuni tshedza tshi penyaho tshi vhonetshela u mona na tshigwada tsha vhalisa. Ndi vhugala ha Yehova! Nahone muruṅwa wa Yehova u vha vhudza uri: “Ni songo ofha, ndi ni vhudza mafhungo-maḓifha a dakalo ḽihulu, ḽine ḽa ḓo vha ḽa vhathu vhoṱhe. Ngauri ṋamusi no bebelwa mutshidzi, a re Kristo Murena, muḓini wa Davida. Huno tshigá tshiné na ḓo mu ḓivha ngatsho’ a sitshi: ni ḓo wana lushie lwó putelwa nga miṅwenda lú mukungwani.” Nga khathihi fhedzi vhaṅwe vharuṅwa vho engedzeaho vha bvelela nahone vha imbelela vha ri: “Mudzimu nga a rendwe ṱaḓulu-ṱaḓulu, shangoni hu vhe na mulalo, vhathu vha takalelwe.”

Musi vharuṅwa vha tshi ṱuwa, vhalisa vha ri nga tshavho: “Nḓarieni Betlehema, ri yo vhona mafhungo a hone, e Murena a ri ḓivhadza.” Nga u ṱavhanya vha ṱuwa nahone vha wana Yesu he muruṅwa a vha vhudza uri vha ḓo mu wana hone. Musi vhalisa vha tshi anetshela zwe muruṅwa a vha vhudza zwone, vhoṱhe vha zwi pfaho vha akhamala. Maria u vhulunga zwoṱhe zwenezwo zwine zwa khou ambiwa nahone a zwi elekanya mbiluni yawe.

Ṋamusi vhathu vhanzhi vha tenda uri Yesu o bebwa nga ḽa 25 Nyendavhusiku. Fhedzi Nyendavhusiku ndi tshifhinga tsha mvula na phepho Betlehema. Vhalisa vho vha vha sa ḓo vha vhe nnḓa masimuni vhusiku hoṱhe vhe na miṱambi yavho nga tshenetsho tshifhinga tsha ṅwaha. Hafhu, Khosi ya Roma zwi tou vhonala uri o vha a sa ḓo ṱoḓa vhathu vhe vha vha vhe na muya wa u mu vutshela u fara lwonolwo lwendo lwa u ṅwalisa vhukati ha vhuriha. Zwi tou vha khagala uri Yesu o bebwa henefha mathomoni a tshifhefho tsha ṅwaha. Luka 2:1-20; Mixa 5:2.

▪ Ndi ngani Yosefa na Maria vha tshi fara lwendo lwa u ya Betlehema?

▪ Ndi tshifhio tshithu tshi takadzaho tshine tsha itea vhusiku ha u bebwa ha Yesu?

▪ Ri zwi ḓivha hani uri Yesu ho ngo bebwa nga ḽa 25 Nyendavhusiku?