Ndima Ya 122

U Bva ha Pilato u ya ha Herode na u Humela Murahu Hafhu

NAHO Yesu a sa lingedzi u dzumbela Pilato zwa uri u khosi, u ṱalutshedza uri Muvhuso wawe a si u lwisanaho na Roma. Yesu u ri: “Muvhuso wanga a si wa shango ḽino. Ngavhe muvhuso wanga u vhe wa shango ḽino, ndi musi vhalanda vhanga vhó lwa, ndi si farwe nga Vha-Yuda. Ndi zwone zwiné nda ri: Muvhuso wanga a si wa shango ḽino.” Nga zwenezwo Yesu u tenda luraru lwoṱhe uri u na Muvhuso, naho u si wa tshisima tsha ḽifhasi.

Naho zwo ralo, Pilato u a mu tsikeledza hafhu a ri: “U tshi ralo ndi uri U khosi?” Ndi uri, naa u khosi naho Muvhuso wau u si wa shango ḽino?

Yesu u ita uri Pilato a zwi ḓivhe uri o ita phetho yavhuḓi, a tshi fhindula nga uri: “Wo bula, ndi khosi. Ndi zwe nda bebelwa zwone, ndo ḓela zwone fhano shangoni uri ndi vhe ṱhanzi ya mafhungo-ngoho. A re na mafhungo-ngoho u pfa ipfi ḽanga.”

Ee, ndivho yone-yone ya u vha hone ha Yesu kha ḽifhasi ndi u vha ṱhanzi ya “mafhungo-ngoho,” zwihuluhulu mafhungo-ngoho nga ha Muvhuso wawe. Yesu o ḓiimisela u vha a fulufhedzeaho kha eneo mafhungo-ngoho naho zwi tshi nga mu dzhiela vhutshilo hawe. Naho zwo ralo Pilato u a vhudzisa: “Mafhungo-ngoho ndi mini!” ha lindeli ṱhalutshedzo yo engedzeaho. Zwe a zwi pfa zwo eḓana uri a haṱule.

Pilato u vhuyelela ha gogo ḽo lindelaho nnḓa ha nnḓu yawe. Zwi tou vha khagala uri u na Yesu nga thungo, u vhudza vhotshifhe vhahulu na vhane vha vha navho uri: “Nṋe a thi wani mulandu kha uyu muthu.”

Gogo ḽo sinyuswa nga yeneyo phetho, ḽa thoma u mu kombetshedza ḽa ri: “U fhiriṱanya vhathu a tshi funza shangoni ḽoṱhe ḽa Yudea. O thoma ngei Galilea a vhuya a swika fhano.”

U fhisea ha u sa humbula ha Vhayuda hu fanela u akhamadza Pilato. Ngauralo, musi vhotshifhe vhahulu na vhahulwane vha tshi khou bvela phanḓa vha tshi zhamba, Pilato u rembulutshela kha Yesu nahone u a vhudzisa: “Naa a U pfi zwiné vha amba vha tshi U hwelela?” Naho zwo ralo, Yesu ha vhuyi a lingedza u fhindula. U dzika hawe o sedzana na u pomokwa huvhi hu ita uri Pilato a akhamale.

Pilato a tshi ḓivha uri Yesu ndi Mugalilea, u wana tshibuli tsha u sa vha na vhuḓifhinduleli khae. Muvhusi wa Galilea, Herode Antipa (murwa wa Herode Muhulwane), u Yerusalema malugana na Paseka, ngauralo Pilato u rumela Yesu khae. Mathomoni, Herode Antipa o ita uri ṱhoho ya Yohane Mulovhedzi i tumulwe, zwenezwo Herode a thoma u tshuwa musi a tshi pfa nga ha mishumo i mangadzaho ye Yesu a vha a tshi khou i ita, a tshi ofha uri Yesu a nga vha e Yohane wa vhukuma o tou vuswa vhafuni.

Zwino, Herode o takala nga maanḓa nge a lavhelela u vhona Yesu. Hu si ngauri u a kwamea nga mutakalo wa Yesu kana uri u ṱoḓa u ita ndingedzo naho dzi dzifhio dza u ḓivha uri milandu ye ya vhewa kha Yesu ndi ya ngoho kana ya mazwifhi. Nṱhani hazwo, u sokou ṱoḓa u ḓivha na u fulufhela u vhona Yesu a tshi ita vhuṅwe vhuṱolo.

Naho zwo ralo, Yesu u landula u fusha u ṱoḓa u ḓivha ha Herode. Zwi re zwone ndi uri musi Herode a tshi mu vhudzisa, ha vhuyi a amba tshithu. Vho shona, Herode na maswole awe a vhalindi vha thoma u tamba nga Yesu. Vha mu ambadza nguvho i penyaho nahone vha mu goḓa. Zwenezwo vha mu rumela hafhu ha Pilato. Nga zwenezwo, Herode na Pilato, vhe kale vha vha vhe maswina, vha thoma u vha madele mapfani.

Musi Yesu a tshi vhuya, Pilato u kuvhanganya vhotshifhe vhahulu, vhavhusi vha Vhayuda, na vhathu nahone a ri: “Uyu muthu no mu ḓisa ha nṋe na ri: U fhiriṱanya vhathu. Vhonani, ndo mu sengisa ní hone, huno milandu iné na mu hwelela ngayo’ a tho ngo wana na muthihi wayo kha ene. Na Herode u ralo; ngauri ndo ni ruma na ya ha ene; huno vhonani, a huna tshe a ita tsho eḓanwaho nga lufu. Zwino ndi ḓo mu rwa nda mu litsha.”

Nga zwenezwo Pilato o no bula luvhili uri Yesu ha na mulandu. U swela u mu vhofholola, ngauri o zwi limuwa uri ndi nga ṅwambo wa vivho ḽine vhotshifhe vha vha naḽo musi vha tshi mu kumedza khae. Musi Pilato a tshi bvela phanḓa u lingedza u vhofholola Yesu, ndi hone a tshi ṱuṱuwedzwa vhukuma u ita zwenezwo. Musi e kha tshidzulo tshawe tsha tsengo, mufumakadzi wawe u rumela mulaedza, a tshi mu kwengweledza: “Muthu uyo o lugaho U songo mu ita tshithu, ngauri ndo shengela zwinzhi ndi tshi mu lora [zwi tou pfala uri u bva ha Mudzimu] vhusiku vhuno.”

Naho zwo ralo, Pilato a nga vhofholola hani uyu muthu o lugaho, samusi a tshi zwi ḓivha uri o fanela u ralo? Yohane 18:36-38; Luka 23:4-16; Mateo 27:12-14, 18, 19; 14:1, 2; Marko 15:2-5.

▪ Yesu u fhindula mbudziso ya malugana na vhuhosi hawe nga nḓila-ḓe?

▪ Ndi “mafhungo-ngoho” afhio ane Yesu a fhedza vhutshilo hawe kha ḽifhasi a tshi a ṱanzielela?

▪ Khaṱulo ya Pilato ndi ifhio, naa vhathu vha aravha hani, nahone Pilato u ita mini nga Yesu?

▪ Herode Antipa ndi nnyi, ndi ngani a tshi takalela vhukuma u vhona Yesu, nahone u ita mini ngae?

▪ Ndi ngani Pilato a tshi swela u vhofholola Yesu?