Ndima Ya 33

U Ḓadzisa Vhuporofita ha Yesaya

MUSI Yesu o no pfa uri Vhafarisei na tshigwada tsha vhatevheli vha Herode vho langana u mu vhulaha, ene na vhafunziwa vhawe vha shavhela Lwanzheni lwa Galilea. Henefha magogo mahulu ane a bva kha ḽa Palestina ḽoṱhe, na nga nnḓa ha masakha aḽo, a ḓa khae. A fhodza vhanzhi, lwe vhoṱhe vha re na malwadze a vhavhaho vha sukumedzelana phanḓa u itela u mu kwama.

Ngauri magogo ndi mahulwane nga maanḓa, Yesu u vhudza vhafunziwa vhawe u vha na gungwa misi yoṱhe uri a kone u ḽi shumisa. Nga u bva khunzikhunzini, a nga ita uri mavhuthu a si tsha mu pwanyeledza. A nga a funza e gungwani kana u ya huṅwe fhethu nga khunzikhunzini u itela u thusa vhathu henengei.

Mufunziwa Mateo u ṱhogomela uri mushumo wa Yesu u ḓadzisa “zwo ambwaho nga muporofita Yesaya.” Nga zwenezwo Mateo u redza vhuporofita vhune Yesu a vhu ḓadzisa:

“Vhonani, uyu ndi ene muḓinḓa wanga we nda ḓi-nangela, mufunwa wanga, ané mbilu yanga ya mu takalela. Ndi ḓo vhea muya wanga kha ene, uri a ḓivhadze dzitshakha khaṱhulo. Ha nga semani, ha nga zhambi, a huna ane a ḓo pfa ipfi ḽawe khoroni. Luṱanga lwo piḓeaho ha nga lu vunḓi, na luvhone lu kha ḓi nyengaho ha nga lu dzimi; a vhuye a bveledze gundo khaṱhuloni. Huno dzitshakha dzi ḓo fulufhela dzina ḽawe.”

Vhukuma, Yesu ndi mulanda a funwaho ane Mudzimu a mu takalela. Nahone Yesu u bvisela khagala zwine zwa vha khaṱulokwayo ya ngoho, ine ya khou dzumbiwa nga masialala a vhurereli ha mazwifhi. Nga nṱhani ha u shumisa havho mulayo wa Mudzimu nga nḓila yo khakheaho, Vhafarisei vha nga si ḓo thusa na muthu a lwalaho nga Sabatha! A tshi bvisela khagala khaṱulokwayo ya Mudzimu, Yesu u rula vhathu muhwalo wa masialala o khakheaho, nahone nga zwenezwi, vharangaphanḓa vha vhurereli vha lingedza u mu vhulaha.

Zwi amba mini uri ‘ha nga semani, kana u takusa ipfi ḽawe uri a pfale dzikhoroni’? Musi a tshi fhodza vhathu, Yesu ‘u a vha laya vhukuma uri vha songo amba hune a vha hone.’ Ha ṱoḓi hu tshi itwa phosho ya u mu ḓivhadza mikotoni kana hu tshi ambiwa nga mivhigo i nyanyulaho yo shandiwaho.

Hafhu, Yesu u isa mulaedza wawe u khuthadzaho kha vhathu vhane nga lwa pfanyisedzo vha fana na luṱanga lwo piḓeaho, lwo khotheaho na lu kandekanywaho. Vha fana na luvhone lu nyengaho, lune ṱhase yalwo ya u fhedza ya vha tsini na u dzima. Yesu ha vunḓi luṱanga lwo piḓeaho kana u dzima luvhone lune lwa khou nyenga, lu tshi ṱoḓou dzima. Fhedzi nga vhulenda na lufuno, u vusa vhane vha ḓiṱukufhadza nga vhuṱali. Vhukuma, Yesu ndi ene ane dzitshakha dza nga fulufhela khae! Mateo 12:15-21; Marko 3:7-12; Yesaya 42:1-4.

▪ Yesu u bvisela khaṱulokwayo khagala nga nḓila ifhio, a sa semani kana u takusa ipfi ḽawe uri ḽi pfale dzikhoroni?

▪ Ndi vhafhio vhane vha fana na luṱanga lwo piḓeaho na luvhone lu nyengaho, nahone Yesu u vha fara hani?