Ndima Ya 113

U Ḓiṱukufhadza nga Paseka ya u Fhedza

PETRO na Yohane, nga he vha laedzwa nga Yesu, vho no ḓi swika Yerusalema u itela u ita ndugiselelo dza Paseka. Yesu, zwi vhonala uri na vhaṅwe vhaapostola vha fumi, vha swika nga murahu nga masiari. Ḓuvha ḽi khou mbwandamela musi Yesu na tshigwada tsha vhatevheli vhawe vha tshi tsa Thavha ya Miṱwari. Haya ndi masiari a u fhedza kha Yesu a tshi sedza wonoyo muḓi e kha heyi thavha u swika nga murahu ha u vuswa hawe vhafuni.

Nga u ṱavhanya Yesu na tshigwada tsha vhatevheli vhawe vha swika muḓini nahone vha ya nḓuni ine vha ḓo itela hone vhuṱambo ha Paseka. Vha ṋamela vhuṋamelo vha ya nḓuni khulu ya nṱha, hune vha wana ho itwa ndugiselelo dzoṱhe u itela vhuṱambo havho vhe vhoṱhe ha Paseka. Yesu o sedza phanḓa kha hetshi tshiitea, samusi a tshi ri: “Ndo ṱulutshelwa nga tshiṱuvho hei Paseka u i ḽa na vho-inwi, ndí sathu u ṱhuphiwa.”

U ya nga sialala, vhane vha vha hone Pasekani vho vha vha tshi nwa zwinwelo zwiṋa. Musi o no ṱanganedza tshine zwa vhonala uri ndi tshinwelo tsha vhuraru, Yesu u a livhuha a ri: “Tshi dzhieni, ni nwe, ni sielane; ngauri ndi a ni vhudza ndi ri: A thi tsha ḓo dovha nda nwa mutshelo wa muṱokola; hu ḓo ranga ha bvelela muvhuso wa Mudzimu.”

Nga tshiṅwe tshifhinga musi hu tshi khou ḽiwa, Yesu u a takuwa, u bvula nguvho yawe ya nga nnḓa a i vhea nga thungo, u dzhia thaula, a shela maḓi sambeloni. Nga ho ḓoweleaho, ṋemuḓi o vha a tshi fanela u vhona uri milenzhe ya mueni yo ṱanzwiwa. Fhedzi samusi kha itshi tshiitea hu si na ṋemuḓi, Yesu u ita hoyu mushumo. Naho e nnyi kha vhaapostola o vha a tshi nga vha o shumisa tshenetsho tshibuli a u ita; naho zwo ralo, zwi vhonala uri nga ṅwambo wa uri hu tshee na u hanedzana vhukati havho, a hu na ane a u ita. Zwino vha a shona musi Yesu a tshi thoma u ṱanzwa milenzhe yavho.

Musi Yesu a tshi swika kha Petro, u a hana: “U songo nṱanzwa milenzhe na ka-thihi.”

Yesu u ri: “Ndá sa U ṱanzwa, a U na mukovhe na nṋe.”

Petro u a fhindula: “Murena, i si vhe milenzhe fhedzi, nga zwi vhe na zwanḓa na ṱhóho.”

Yesu u a fhindula: “O ṱanzwiwaho u ṱanzwiwa milenzhe fhedzi, ngauri o ṱamba tshoṱhe. Huno inwi no ṱamba; hone a no ngo ralo noṱhe.” U amba hezwi ngauri u a ḓivha uri Yudasi Iskariote u khou dzudzanya u mu ambulula.

Musi Yesu o no ṱanzwa milenzhe ya vhoṱhe vha 12, u katela na milenzhe ya muambululi wawe, Yudasi, u ambara nguvho yawe ya nga nnḓa a dzula ṱafulani hafhu. Zwenezwo u a vhudzisa: “Naa zwe nda ni ita ni a zwi ḓivha naa? Ni tshi ṋyamba ni ri: Mufunzi, na Murena, hone ni tshi amba zwone, ngauri iṱali e nṋe. Zwino nṋe ndi re Murena waṋu na Mufunzi waṋu ndó ni ṱanzwa milenzhe, na inwi ní ralo ni tshi ṱanzwana milenzhe. Ndo ni sumbedza nḓila uri ni ite zwe nṋe nda ni ita. Ngoho, ngoho, ndi a ni vhudza, mulanda ha fhiri muṋe wawe, na muḓinḓa ha fhiri o mu rumaho. Arali izwo ni tshi zwi ḓivha, ni na mashudu ni tshi zwi ita.”

Ndi tsumbo yavhuḓi lungafhani ya tshumelo ya u ḓiṱukufhadza! Vhaapostola a vho ngo fanela u ṱoḓa u vha vha u thoma, vha tshi humbula uri vha vhahulwane nga maanḓa lune vhaṅwe vha fanela u vha shumela misi yoṱhe. Vha fanela u tevhela tsumbo ye ya vhewa nga Yesu. Hohu a si u ṱanzwa milenzhe ha lwa mulayo. Hai, fhedzi ndi ha u shuma nga u ḓifunela u sa ṱaluli, hu sa londwi uri wonoyo mushumo ndi wa fhasi kana a u takadzi lungafhani. Mateo 26:20, 21; Marko 14:17, 18; Luka 22:14-18; 7:44; Yohane 13:1-17.

▪ Ndi mini tsho khetheaho nga ha u sedza ha Yesu Yerusalema musi a tshi dzhena muḓini wonoyo u ita vhuṱambo ha Paseka?

▪ Tshifhingani tsha Paseka, zwi vhonala uri ndi tshinwelo tshifhio tshine Yesu a tshi fhirisela kha vhaapostola vhawe vha 12 musi o no fhaṱutshedza?

▪ Ndi mushumo ufhio wa muthu nga eṱhe we wa vha u tshi itelwa vhaeni nga lwa mukhuvha musi Yesu e kha ḽifhasi, nahone ndi ngani u songo itwa tshifhingani tsha Paseka ye ya itwa nga Yesu na vhaapostola vhawe?

▪ Ndivho ya Yesu yo vha i ifhio musi a tshi ita mushumo wa fhasi wa u ṱanzwa milenzhe ya vhaapostola vhawe?