Ndima Ya 103

U Dala Thembeleni Hafhu

YESU na vhafunziwa vhawe vho no fhedza vhusiku vhuraru vhe Bethania u bva tshee vha swika vha tshi bva Yeriko. Zwino musi ḓuvha ḽi tshi tsha nga matsheloni a Musumbuluwo, ḽa 10 Nisan, ḽi vha wana vhe nḓilani i yaho Yerusalema. Yesu u na nḓala. Ngauralo musi a tshi vhona muhuyu u na maṱari, u ya khawo a tshi ṱoḓa u vhona arali u na mahuyu.

Maṱari a wonoyo muri o ṱavhanya u bva tshi sa athu u vha tshifhinga, samusi tshifhinga tsha mahuyu tshi tshi vha nga Fulwi, nahone zwino ndi hone i mafheleloni a Ṱhafamuhwe. Naho zwo ralo, zwi vhonala uri Yesu u ḓipfa uri samusi maṱari o ṱavhanya u bva, na mahuyu a fanela u vha o no vha hone nga u ṱavhanya. Fhedzi o nyabwa. Maṱari o ṋea wonoyo muri tshivhumbeo tshi si tshone. Zwenezwo Yesu u sema wonoyo muri, a tshi ri: “A hu tsha ḓo ḽa muthu mutshelo wau na lini na lini.” Mvelelo dza zwe Yesu a amba na zwine zwa amba zwone zwi vhonala nga matsheloni a tevhelaho.

Vha tshi ḓi bvela phanḓa, Yesu na vhafunziwa vhawe vha swika Yerusalema nga u ṱavhanya. U ya thembeleni, ye a i ṱolisisa nga ḽa mulovha nga masiari. Naho zwo ralo, ṋamusi u dzhia vhukando, samusi o ita nga u ralo miṅwaha miraru yo fhiraho musi a tshi ḓa Pasekani nga 30 C.E. Yesu u pandela vhane vha khou rengisa na vhane vha khou renga thembeleni nahone u tikukanya dziṱafula dza vharengisi na zwidzulo zwa vhane vha khou vhambadza maivha. Ha vhuyi a tendela naho e nnyi a tshi fhira nga thembeleni o hwala thundu.

A tshi sema vhane vha khou rengiselana na vhane vha khou rengisa zwifuwo thembeleni, u ri: “Naa a ho ngo ṅwalwa ha pfi: Nnḓu yanga i ḓo pfi nnḓu ya thabelo ya tshakha dzoṱhe naa? Huno inwi no i ita bako ḽa vha mavemu.” Ndi mavemu ngauri vha ṱoḓa mitengo mihulwane kha vhane vha si vhe na tshelede u itela u renga khavho zwifuwo zwi ṱoḓeaho u itela tshiṱhavhelo. Ngauralo Yesu u dzhia heyi mishumo ya mabindu sa tshivhumbeo tsha vhufhura kana u tswa.

Musi vhotshifhe vhahulwane, vha maṅwalo, na vhahulwane vha vhathu vha tshi pfa zwe Yesu a ita, vha dovha vha ṱoḓa nḓila dza u mu vhulaha. Nga zwenezwo vha sumbedza hafhu uri a vha rembuluwi. Naho zwo ralo, a vha ḓivhi uri vha nga fhelisa hani Yesu, samusi vhathu vhoṱhe vha tshi dzula vha tshi mona-mona tsini hawe u itela u mu thetshelesa.

Nga nnḓa ha Vhayuda vha vhukuma, na Vhannḓa vho ḓa Pasekani. Havha ndi dziṱhundu, zwine zwa amba uri vho shandukela kha vhurereli ha Vhayuda. Vhaṅwe Vhagerika, vhane zwa vhonala uri ndi dziṱhunḓu, vha ḓa ha Filipo nahone vha humbela u vhona Yesu. Filipo u ya ha Andrea, khamusi a tshi vhudzisa arali wonoyo muṱangano u tshi ḓo vha wo tea. Zwi vhonala Yesu a tshee thembeleni, hune Vhagerika vha kona u mu vhona hone.

Yesu u a zwi ḓivha uri o salelwa nga maḓuvha a si gathi a tshi khou tshila, ngauralo u itela vhuimo hawe tshifanyiso tshavhuḓi: “Tshifhinga tsho swika tsha uri Murwa-muthu a ye vhugalani hawe. Ngoho, ngoho, ndi a ni vhudza, thoro ya mavhele arali yá sa wela mavuni ya fa, i ḓo dzula i yoṱhe; arali yá fa, ndi hone i tshi pakata thoro nzhi.”

Thoro nthihi ya mavhele i na ndeme ṱhuku. Naho zwo ralo, hu pfi mini arali i tshi nga dzheniswa mavuni nahone “yá fa,” i si tsha vha mbeu? Zwenezwo i a mela nahone nga u ya ha tshifhinga ya bveledza mukonyi, une wa bveledza mbeu nnzhi-nnzhi ya mavhele. Zwi ngaho zwenezwo, Yesu ndi muthu muthihi fhedzi o fhelelaho. Fhedzi arali a fa a tshi fulufhedzea kha Mudzimu, u vha ene ane a ṋea vhutshilo vhu sa fheli vhane vha fulufhedzea vhane vha vha na muya u fanaho na wawe wa u ḓiṋekedza. Nga zwenezwo, Yesu u ri: “A funaho vhutshilo hawe, u ḓo vhu laṱa; a nyadzaho vhutshilo hawe shangoni ḽino, u ḓo vhu vhulungela vhutshilo vhu sá fheli.”

Zwi tou vha khagala uri Yesu ha khou ḓihumbulela ene muṋe, ngauri lu tevhelaho u a ṱalutshedza: “Arali muthu a tshi funa u ntshumela, nga a ntevhele. Huné nṋe nda vha hone, na mushumeli wanga a vhe hone-vho. Ane a ntshumela, Khotsi u ḓo mu hulisa.” Ndi malamba avhuḓi lungafhani a u tevhela Yesu na u mu shumela! Ndi malamba a u huliswa nga Khotsi a u ṱanganela na Kristo Muvhusoni.

A tshi humbula nga ha u shengela huhulu na lufu lu vhavhaho lu re phanḓa hawe, Yesu u bvela phanḓa: “Muya wanga zwino wo ṱungufhala, huno ndi ḓo ri mini? Ndi ḓo ri: Khotsi ntshidze kha itshi tshikhathi?” Arali zwi re phanḓa hawe zwo vha zwi tshi nga kona u iledzwa! Fhedzi, hai, samusi a tshi amba: “Hone ndo ḓela zwone kha itshi tshikhathi.” Yesu u khou tendelana na ndugiselelo yoṱhe ya Mudzimu, u katela na lufu lwawe lwa tshiṱhavhelo. Mateo 21:12, 13, 18, 19; Marko 11:12-18; Luka 19:45-48; Yohane 12:20-27.

▪ Ndi ngani Yesu a tshi lavhelela u wana mahuyu naho tshi sa athu u vha tshifhinga tshao?

▪ Ndi ngani Yesu a tshi vhidza vhane vha khou rengisa thembeleni uri ndi “mavemu”?

▪ Ndi nga nḓila ifhio ine Yesu a nga thoro ya mavhele ine ya fa?

▪ Yesu u ḓipfa hani nga ha u shengela na lufu zwi re phanḓa hawe?