Ndima Ya 102

U Dzhena ha Kristo Yerusalema ha Gundo

NGA ḽa matshelo ḽa hone nga matsheloni, nga Swondaha, ḽa 9 Nisan, Yesu u a ṱuwa Bethania na vhafunzwiwa vhawe nahone a livha Thavhani ya Miṱwari thungo ya Yerusalema. Nga tshifhinga tshiṱukuṱuku, vha sendela tsini na Betfage, u re Thavhani ya Miṱwari. Yesu u laedza vhafunziwa vhawe vhavhili:

“Iyani muḓanani u re afho phanḓa haṋu, ni ḓo wana mbongola yó vhoxwa í na ṋamana yayo. Ni dzi hungulule, ni dzi ḓise ngeno. Arali muthu a tshi amba na’nwi, ni ambe ni ri: Murena u na mushumo nadzo’! u ḓo ṱavhanya u dzi rumela ngeno.”

Naho u thomani vhafunziwa vho kundwa u pfesesa uri idzi nyeletshedzo dzi tshimbidzana na u ḓadzea ha vhuporofita ha Bivhili, nga murahu vha limuha uri dzi a ralo. Muporofita Sakaria o dzula o amba uri Khosi ya Mudzimu yo fulufhedziswaho yo vha i tshi ḓo dzhena Yerusalema yo namela mbongola, ee, “o namela mbongola, ṋamana yayo, voḓa ḽa mbongola.” Na khosi Salomo o namela ṋamana ya mbongola musi a tshi ḓodzwa.

Musi vhafunziwa vha tshi dzhena Betfage nahone vha tshi dzhia mbongola na ṋamana yayo, vhe vha vha vho ima henefho vha ri: “Ni ita’ni ni tshi vhofholola iyo mbongolana?” Fhedzi musi vha tshi vhudzwa uri dzenedzo phukha ndi dza Murena, vhenevho vhathu vha vha tendela vha tshi dzi isa ha Yesu. Vhafunziwa vha vhea nguvho dzavho kha mbongola na kha mbongolana yayo, fhedzi Yesu u namela mbongolana.

Musi Yesu a tshi livha Yerusalema, gogo ḽi a engedzea. Vhunzhi ha vhathu vha adza nguvho dzavho nḓilani, musi vhaṅwe vha tshi rema matavhi a miri vha a adza. Vha a huwelela: “Hu rendwe a ḓaho e khosi nga dzina ḽa Murena. Nga hu vhe na mulalo ṱaḓulu, na thendo nga i ye ngei ṱaḓulu-ṱaḓulu.”

Vhaṅwe Vhafarisei kha tshenetsho tshigwada vha a sinyuwa nga hohu u huwelela nahone vha gungulela Yesu: “Mufunzi, kaidza vhafunziwa vhau.” Fhedzi Yesu u a fhindula: “Ndi a ni vhudza, arali avha vhá fhumula, hu ḓo zhamba matombo.”

Musi Yesu a tshi sendela Yerusalema, u sedza wonoyo muḓi nahone a thoma u u lilela, a tshi ri: “Arali wo vha U tshi ri nga ḓuvha heḽi ḽau wa ṱalukanya zwau na iwe, zwiné zwa ḓo U ṋea mulalo! Zwino zwo ro dzumbama kha maṱo au.” Nga u sa thetshelesa nga u ḓiitisa, Yerusalema ḽi fanela u lifhedzwa, samusi Yesu a tshi dzula o amba:

“Maswina au [Vharoma nga fhasi ha Mudzhenerala Tito] a ḓo U mona nga mishasha, a U tangela ngomu, a U khakhedza thungo dzoṱhe. Vha ḓo ni rwa fhasi, iwe na vhana vhau, hu si sale tombo ḽí kha ḽiṅwe ngomu hau.” Hohu u fheliswa ha Yerusalema ho dzulaho ho ambiwa nga Yesu vhukuma hu itea nga murahu ha miṅwaha ya 37, nga ṅwaha wa 70 C.E.

Nga vhege dzi si gathi dzo fhiraho, vhanzhi kha gogo ḽeneḽo vho vhona Yesu a tshi vusa Lazaro vhafuni. Zwino havha vha ṱwa vha tshi vhudza vhaṅwe nga ha hovhu vhuṱolo. Ngauralo musi Yesu a tshi dzhena Yerusalema, muḓi woṱhe u vusa vilili. Vhathu vha ṱoḓa u ḓivha: “Ndi nnyi uyu?” Nahone magogo a ḓi bvela phanḓa u amba uri: “Ndi Yesu, muporofita a bvaho Galilea, muḓini wa Nazareta.” Vha tshi vhona zwine zwa khou itea, Vhafarisei vha ṅuṅunela uri a huna tshine vha kona, ngauri, samusi vha tshi amba: “Shango ḽoṱhe ḽi tevhela ene.”

Samusi i mukhuvha wawe musi o ya Yerusalema, Yesu u ya u funza thembeleni. Henefho mabofu na zwihole vha ḓa ha ene, nahone u a vha fhodza! Musi vhotshifhe vhahulwane na vha maṅwalo vha tshi vhona zwithu zwavhuḓi zwine Yesu a khou ita nahone vha tshi pfa vhatukana thembeleni vha tshi khou huwelela, “Hosiana Murwa wa Davida!” vha sinyuwa. Vha mu lwisa vha ri: “Naa zwiné avha vha amba U khou zwi pfa naa?”

Yesu u a fhindula: “Iina! Ni nga a ni athu u vhala he ha pfi: Ndi ḓo funzedza milomo ya vhana na ya vhushie u nthenda!”

Yesu u bvela phanḓa u funza, nahone u sedza zwoṱhe zwi re thembeleni. Nga u ṱavhanya ḽi a kovhela. Ngauralo u a ṱuwa, khathihi na vha 12, nahone a humela Bethania khilomithara tharu kana u fhira. A dzula henengei vhusiku ha Swondaha, khamusi nḓuni ya khonani yawe Lazaro. Mateo 21:1-11, 14-17; Marko 11:1-11; Luka 19:29-44; Yohane 12:12-19; Sakaria 9:9.

▪ Ndi lini nahone nga nḓila-ḓe ine Yesu a dzhena ngayo Yerusalema sa Khosi?

▪ Ndi zwa ndeme lungafhani uri magogo a rende Yesu?

▪ Yesu u ḓipfa hani musi a tshi sedza Yerusalema, nahone u amba vhuporofita vhufhio?

▪ Hu itea mini musi Yesu a tshi ya thembeleni?