Ndima Ya 44

U Dzikisa Ḓumbu ḽi Ofhisaho

ḒUVHA ḽa Yesu ḽo vha ḽo ḓala zwiitea, u katela na u funza magogo khunzikhunzini na u ṱalutshedza vhafunziwa vhawe zwifanyiso nga murahu vhe vhoṱhe. Musi hu tshi vha madekwana, u ri: “Kha ri wele seli.”

Vhugabeloni ha thungo ya vhubvaḓuvha ha Lwanzhe lwa Galilea hu na dzingu ḽine ḽa vhidzwa Decapolis, ḽine ḽa bva kha ipfi ḽa Lugerika deʹka, ḽine ḽa amba “fumi,” na poʹlis, ḽine ḽa amba “muḓi.” Miḓi ya Fumi ndi yone ine ha itelwa khayo mvelele ya Tshigerika, naho zwi tshi timatimisa hu dovha ha vha hayani ha Vhayuda vhanzhi. Naho zwo ralo, mushumo wa Yesu kha ḽeneḽo dzingu, wo vhetshelwa mikano. Na kha holu lwendo, samusi ri tshi ḓo zwi vhona nga murahu, u thivhelwa u dzula tshifhinga tshilapfu.

Musi Yesu a tshi humbela uri vha ye kha vhuṅwe vhugabelo, vhafunziwa vha ṱuwa nae nga gungwa. Naho zwo ralo, u ṱuwa havho hu a ṱhogomelwa. Nga u ṱavhanya vhaṅwe vha ṋamela magungwa avho u itela u vha fheletshedza. A si kule nga maanḓa musi hu tshi tou buḓekanywa nga vhukati. Vhukuma, Lwanzhe lwa Galilea ḽi tou vha isha ḽa vhulapfu ha khilomithara dza 21 na vhuphara ha khilomithara dza 12 na tshipiḓa.

Yesu o neta zwa vhukuma. Nga zwenezwo, nga u ṱavhanya musi vho no ṱuwa, u a eḓela fhasi bvungwi ha gungwa, u vhea ṱhoho yawe kha musiamelo, a farwa nga khofhe khulu. Vhunzhi ha vhaapostola ndi vhaalavhi vha re na tshenzhelo, vho vhaho vhe vharei vha khovhe nga maanḓa Lwanzheni lwa Galilea. Nga zwenezwo vha tshimbidza ḽeneḽo gungwa.

Fhedzi holu a lu nga vhi lwendo lu leluwaho. Nga ṅwambo wa themperetsha ya henefho dzivhani, ḽine ḽa vha mithara dzine dza ṱoḓou vha dza 210 u bva lwanzheni, na muya u rotholaho une wa bva thavhani dzi re henefho tsini, zwiṅwe zwifhinga hu vha na maḓumbu nahone a ita tshiḓumbumukwe henefho dzivhani. Ndi zwine zwa khou bvelela zwino. Nga u ṱavhanya magabelo a khou rwa gungwa na u hashela magabelo nga ngomu haḽo, gungwa ḽa ṱoḓou u ḓala. Naho zwo ralo, Yesu u tshee o eḓela!

Vhenevho vhaalavhi vha re na tshenzhelo vha tshimbidza gungwa nga u ṱavhanya nahone vho tshuwa. A zwi timatimisi uri vho vhuya vha tshimbila maḓumbuni nga phanḓa. Fhedzi zwino vho fhelelwa nga maano. Vha tshi ofha u lozwa vhutshilo havho, vha vusa Yesu. Vha a vhidzelela, ‘Thovhela, naa a u zwi londi? Ri khou nwela khothe! Ri tshidze, ri kho ḓo kumbiwa.’

Musi a tshi takuwa, Yesu u kaidza ḓumbu na lwanzhe: “Fhumula, U ri ‘tshete’!” Nahone eneo maḓumbu a fhumula na lwanzhe lwa dzika. A tshi rembulutshela kha vhafunziwa vhawe, u a vhudzisa: ‘Ndi ngani ni tshi ofha nga u rali? Naa a ni athu u tenda?’

Nga zwenezwo, vhafunziwa vha farwa nga nyofho i songo ḓoweleaho. Vha a vhudzisana: ‘Uyu ndi nnyi zwa vhukuma? Ngauri u laedza maḓumbu na maḓi zwa mu pfa.’

Ndi maanḓa mangafhani ane Yesu a a sumbedza! Zwi khwaṱhisa lungafhani u ḓivha uri Khosi yashu i na maanḓa kha zwithu zwa mupo na uri musi ṱhogomelo yawe yoṱhe yo livhiselwa kha ḽifhasi ḽashu vhukatini ha vhuvhusi hawe Muvhusoni, vhathu vhoṱhe vha ḓo dzula vho tsireledzea kha madziedzi a mupo a ofhisaho!

Nga murahu musi maḓumbu o no dzika, Yesu na vhafunziwa vhawe vha swika vhugabeloni ha vhubvaḓuvha vho tsireledzea. Khamusi maṅwe magungwa o ponyoka eneo maḓumbu mahulu nahone a humela hayani o tsireledzea. Marko 4:35–5:1; Mateo 8:18, 23-27; Luka 8:22-26.

▪ Decapolis ndi mini, nahone i ngafhi?

▪ Ndi mbonalo dzifhio dzi vhonalaho dzi re na mulandu wa tshiḓumbumukwe Lwanzheni lwa Galilea?

▪ Musi maano avho a u alavha a sa koni u vha thusa, vhenevho vhafunziwa vha ita mini?