Ndima Ya 30

U Fhindula Vhapomoki Vhawe

MUSI vharangaphanḓa vha vhurereli ha Tshiyuda vha tshi vhea Yesu mulandu wa u vunḓa Sabatha, u a fhindula: “Khotsi-anga u kha ḓi shuma na zwino, na nṋe ndi a shuma.”

Hu sa londwi zwine Vhafarisei vha amba, mushumo wa Yesu a si mufuda wa mushumo une wa thivhelwa nga mulayo wa Sabatha. Mushumo wawe wa u funza na u fhodza ndi mushumo u bvaho ha Mudzimu, nahone a tshi edzisa tsumbo ya Mudzimu, u dzula a tshi u ita ḓuvha ḽiṅwe na ḽiṅwe. Naho zwo ralo, phindulo yawe i ita uri Vhayuda vha halifhese u fhira u thomani, nahone vha ṱoḓa u mu vhulaha. Ndi ngani?

Ndi nga ṅwambo wa uri zwino a vha tendi fhedzi uri Yesu u khou vunḓa Sabatha, fhedzi na u dzhia u amba hawe e Murwa wa Mudzimu nga dzawe i samba. Naho zwo ralo, Yesu ha ofhi nahone u bvela phanḓa u vha fhindula malugana na vhushaka hawe havhuḓi na Mudzimu. U ri: “Khotsi u funa Murwa wawe, u mu sumbedza zwoṱhe zwiné a shuma.”

Yesu u a bvela phanḓa: “Vhunga Khotsi a tshi vusa vhafu a vha ṋea vhutshilo, na Murwa u ralo, u ṋea vhutshilo vhané a funa.” I ngoho, Murwa u vho vusa vhafu nga nḓila ya muya! Yesu u ri: “A pfaho ipfi ḽanga a tenda we a nthuma, u na vhutshilo vhu sa fheli . . . o bva lufuni a dzhena vhutshiloni.” Ee, u a bvela phanḓa: “Hu ḓa tshikhathi, na zwino tsho no swika, tshiné vhafu vha ḓo pfa ipfi ḽa Murwa wa Mudzimu ngatsho’, huno vha pfaho vha ḓo tshila.”

Naho hu si na mafhungo ane a sumbedza uri Yesu o no vusa naho e nnyi vhafuni zwa vhukuma, u vhudza vhapomoki vhawe uri u vuwa ho raloho ha vhafu hu ḓo itea nga ho livhaho. U ri: “Ni songo zwi kanuka; ngauri hu ḓa tshikhathi, tshiné vhoṱhe vha re zwaloni vha ḓo pfa ipfi ḽawe ngatsho’ [“nahone vha vuwa,” NW].”

U swikela zwino, zwi tou vha khagala uri Yesu ha athu u vhuya a ṱalusa khagala mushumo wawe wa ndeme kha ndivho ya Mudzimu nga nḓila i pfalaho na yo khwaṱhaho nga u rali. Fhedzi vhapomoki vha Yesu vha na zwi fhirisaho vhuṱanzi hawe ene muṋe nga ha hezwi zwithu. Yesu u a vha eletshedza: “Inwi no vhuya na ruma vhathu ha Yohane, a ṱanzielela mafhungo-ngoho.”

Miṅwahani mivhili yo fhiraho, Yohane Mulovhedzi o vhudza havha vharangaphanḓa vha vhurereli ha Tshiyuda nga ha We a vha a tshi khou ḓa murahu hawe. A tshi vha humbudza nga ha ane vha mu dzhiela nṱha ane a vha Yohane o vhoxwaho zwino, Yesu u ri: “Huno inwi no funa u takala tshedzani tshawe tshikhathinyana.” Yesu u khou vha humbudza hezwi a tshi itela u vha thusa, ee, u vha tshidza. Naho zwo ralo ha ḓitiki nga vhuṱanzi ha Yohane.

“Mishumo yeneyo iné nda i ita [u katela na vhuṱolo vhune a kha ḓi bva u vhu ita], ndi yone i ṱanzielelaho nṋe zwauri Khotsi o nthuma.” Fhedzi nga nnḓa ha zwenezwo, Yesu u bvela phanḓa: “Ene Khotsi o nthumaho ndi ene o nṱanzielelaho.” Mudzimu u ṱanzielela Yesu, sa tsumbo, musi a tshi lovhedzwa, a tshi ri: “Ndi ene Murwa-mufunwa wanga uyu.”

Vhukuma, vhapomoki vha Yesu a vha na tshine vha nga mu laṱa ngatsho. Maṅwalo ane vha ḓiamba uri vha a a vhala a a mu ṱanzielela! Yesu u phetha nga uri: “Arali no tenda Mushe, tendani-ha na nṋe, ngauri Mushe o ṋyamba nga maṅwalo awe. Zwino ní sa tendi maṅwalo awe, zwiné nṋe nda zwi amba ni ḓo zwi tenda hani?” Yohane 5:17-47; 1:19-27; Mateo 3:17.

▪ Ndi ngani mushumo wa Yesu u sa khou vunḓa Sabatha?

▪ Yesu u ṱalusa hani mushumo wawe wa ndeme kha ndivho ya Mudzimu?

▪ U itela u sumbedza uri ndi Murwa wa Mudzimu, Yesu u sumba kha vhuṱanzi ha nnyi?