Ndima Ya 16

U Fhisetshela Vhurabeli ha Yehova

VHARATHU vha Yesu​—vhaṅwe vharwa vha Maria​—ndi Yakobo, Yosefa, Simoni, na Yuda. Musi havha vhoṱhe vha sa athu u ṱuwa na Yesu na vhafunziwa vhawe u ya Kapernaume, ḓorobo i re tsini na Lwanzhe lwa Galilea, khamusi vho dzhena hayani havho Nazareta u itela uri muṱa u kuvhanganye zwithu zwine vha ḓo zwi ṱoḓa.

Fhedzi ndi ngani Yesu a tshi ya Kapernaume nṱhani ha u bvela phanḓa na vhuḓinḓa hawe Kana, kha ḽa Nazareta, kana kha miṅwe mivhundu ya Galilea? Nga ṅwambo wa tshithu tshithihi, Kapernaume u fhethu hu re nṱha nahone zwi vhonala uri ndi ḓorobo khulwane. Hafhu, vhunzhi ha vhafunziwa vha Yesu vhaswa vhe a vha wana vha dzula henefho kana vha dzula tsini na Kapernaume, ngauralo a vha nga ḓo ṱutshela mahaya avho u wana ngudo khae.

Vhukatini ha u vha hawe Kapernaume, Yesu u ita mishumo i mangadzaho, samusi ene muṋe a tshi ṱanziela nga murahu ha miṅwedzi i si mingana. Fhedzi nga u ṱavhanya Yesu na khonani dzawe vha nḓilani hafhu. Ndi tshimedzi, nahone vha nḓilani yavho ya u ya Yerusalema u ṱanganela Paseka ya 30 C.E. Musi vhe henefho, vhafunziwa vhawe vha vhona tshiṅwe tshithu nga ha Yesu tshe khamusi vha vha vha sa athu tshi vhona nga phanḓa.

Malugana na Mulayo wa Mudzimu, Vhaisiraele vha fanela u ita tshiṱhavhelo tsha tshipuka. Ngauralo, uri zwi vha lelutshele, vhavhambadzi kha ḽa Yerusalema vha rengisa zwipuka kana zwiṋoni malugana na heyi ndivho. Fhedzi vha khou rengisa nga ngomu nḓuni khethwa, nahone vha khou fhura vhathu nga u vha ḓurisela.

O ḓala mbiti, Yesu u ita tshimebi tsha thambo nahone a pandelela nnḓa vhenevho vhavhambadzi. U tevhukanya tshelede ya vhadziamali nahone u ṱanamisa vhuṱanḓala havho. U ṱavhela mukosi vhane vha khou vhambadza maivha a ri: “Bvisani izwo zwithu; nnḓu ya Khotsi-anga ni songo i ita nnḓu ya mutengo.”

Musi vhafunziwa vha Yesu vha tshi vhona hezwi, vha humbula vhuporofita nga ha Murwa wa Mudzimu ha uri: “Ndo ḽiwa nga vhuhali ndi tshi lwela nnḓu yau.” Fhedzi Vhayuda vha a vhudzisa: “U ḓo ri vhonisa vhuṱolo-ḓe, U tshi ita izwi?” Yesu u a fhindula: “Thuthani iyi nnḓu khethwa, ndi dovhe ndi i vuse nga maḓuvha mararu.”

Vhayuda vha humbula uri Yesu u khou amba nga ha nnḓukhethwa ya vhukuma, nahone vha vhudzisa nga u rali: “Iyi nnḓu-khethwa huufha vhó fhedza miṅwaha i na mahumi maṋa na miṱanu-na-muthihi vha tshi i fhaṱa; iwe wa ri: ndi ḓo i vusa nga maḓuvha mararu?” Naho zwo ralo, Yesu u khou amba nga nnḓu-khethwa ya muvhili wawe. Nahone nga murahu ha miṅwaha miraru, vhafunziwa vhawe vha humbula hoku kuambele kwawe musi a tshi vuswa vhafuni. Yohane 2:12-22; Mateo 13:55; Luka 4:23.

▪ Nga murahu ha mbingano ya Kana, ndi fhethu hufhio hune Yesu a ya hone?

▪ Ndi ngani Yesu o sinyuwa, nahone u ita mini?

▪ Ndi mini zwine vhafunziwa vha Yesu vha zwi elelwa musi vha tshi vhona nyito yawe?

▪ Yesu u ri mini nga ha “heyi nnḓu khethwa,” nahone u amba mini?