Ndima Ya 70

U Fhodza Muthu o Bebwaho e Bofu

MUSI Vhayuda vha tshi lingedza u kanḓa Yesu nga matombo, ha ṱuwi Yerusalema. Nga murahu, nga Sabatha, ene na vhafunziwa vhawe vha khou tshimbila muḓini musi vha tshi vhona muthu we a vha e bofu u bva tshee a bebwa. Vhafunziwa vha vhudzisa Yesu vha ri: “Mufunzi, uyu muthu a tshi bebwa e bofu ho tshinya nnyi, kana ndi ene, kana ndi vhabebi vhawe?”

Khamusi vhafunziwa vha tenda uri muthu a nga tshinya musi e thumbuni ya mme awe, samusi vhaṅwe vhafunzi vha tshi tenda. Fhedzi Yesu u fhindula nga uri: “A si ene o tshinyaho, na vhabebi vhawe a vho ngo tshinya; zwo ralo uri hu vhonale mishumo ya Mudzimu kha ene.” U vha bofu ha onoyo muthu a si mvelelo ya vhuvhi ho khetheaho he a vhu ita kana tshivhi tshe tsha itwa nga onoyo muthu kana vhabebi vhawe. Tshivhi tsha muthu wa u thoma Adamu tsho ita uri vhathu vhoṱhe vha si fhelele, nahone nga zwenezwo vha bebwa vha songo fhelela sa u bebwa u bofu. Hohu u sa fhelela hu re kha hoyu muthu hu ṋea Yesu tshibuli tsha u sumbedza mishumo ya Mudzimu.

Yesu u ombedzela u ṱavhanyiswa kha u ita heyi mishumo. U ri: “Nṋe tshanga ndi u shuma mishumo ya o nthumaho zwino hú kha ḓi vha masiari; vhusiku vhu khou ḓa, muthu a si tsha ḓo kona u shuma. Zwino ndí kha ḓi vha shangoni, ndi̗ tshedza tsha shango.” Nga u ṱavhanya lufu lwa Yesu lwo vha lu tshi ḓo mu dzhenisa swiswini ḽa vhiḓani he a vha a si tsha ḓo kona u shuma tshithu. Zwa zwino u kha ḓi vha tshisima tsha tshedza tsha shango.

Musi o no amba hezwi zwithu, Yesu a pfela mare mavuni nahone nga mare awe a ita matope. A a shata maṱoni a onoyo muthu a ri: “Tshimbila U yo ṱamba dzivhani ḽa Siloa.” Onoyo muthu u a tenda. Musi o no ralo, a vho vhona! A takala vhukuma musi a tshi vhuya, a tshi vho vhona lwa u thoma vhutshiloni hawe!

Vhahura na vhaṅwe vhane vha mu ḓivha vha a kanuka. Vha a vhudzisa: “Naa uyu a si uḽa we a vha o dzula a tshi humbela zwifhiwa?” Vhaṅwe vha fhindula vha ri: “Ndi ene.” Fhedzi vhaṅwe a vha tendi: “Aiwa, u ro fana nae’.” Naho zwo ralo ene muṋe a ri: “Ndi nṋe.”

Vhathu vha ṱoḓa u ḓivha: “Huno maṱo au o bonyolowa hani?”

“Uḽa muthu ane a pfi Yesu o suka matope a shata maṱo anga, a mbudza a ri: Tshimbila U yo ṱamba Siloa! Nda ya; nda rí ndi kha ḓi ṱamba, nda vhona.”

Vha a vhudzisa: “Uyo muthu u ngafhi?”

A fhindula: “A thi ḓivhi.”

Zwino vhathu vha dzhia onoyo muthu we a vha e bofu vha mu isa kha vharangaphanḓa vhavho vha vhurereli, Vhafarisei. Na vhenevha vha mu vhudzisa uri zwo ḓa hani uri a vhone. Onoyo muthu u a ṱalutshedza: “O shata matope kha maṱo anga, nda ṱamba, nda vhona.”

Vhukuma, Vhafarisei vho vha vho fanela u takalela muhumbeli o fhodzwaho! Fhedzi nṱhani hazwo, vha sasaladza Yesu. Vha ri: “Uyo muthu a si a bvaho ha Mudzimu.” Ndi ngani vha tshi amba nga u ralo? “Ngauri ha londi ḓuvha ḽa Sabatha.” Naho zwo ralo vhaṅwe Vhafarisei vha a vhudzisa: “Muthu wa mu-ita-zwivhi a nga kona hani u ita vhuṱolo vhungafha?” Nga zwenezwo ha vha na phambano vhukati havho.

Nga zwenezwo, vha vhudzisa onoyo muthu: “Huno iwe U ri ndi muthu-ḓe nge a U bonyolosa maṱo?”

U a fhindula: “Ndi muporofita.”

Vhafarisei vha hana u tenda hezwi. Vha fushea nga ḽa uri hoyu muthu na Yesu vha fanela u vha vho ita huṅwe u tendelana tshiphirini u itela u fhura vhathu. Nga zwenezwo u itela u piringulula mafhungo, vha vhidza vhabebi vha onoyo muhumbeli u itela u vha sengisa. Yohane 8:59; 9:1-18.

▪ Ndi mini tshine tsha vha na mulandu wa u pofula ha onoyo muthu, nahone ndi mini tshine tsha si vhe na mulandu?

▪ Ndi vhusiku vhufhio vhune muthu a si tsha kona u shuma ngaho?

▪ Musi muthu onoyo a tshi fhodzwa, maaravhele a vhane vha mu ḓivha ndi afhio?

▪ Vhafarisei vha fhambanela mini nga u fhodzwa ha onoyo muthu?