Ndima Ya 17

U Funza Nikodemo

MUSI a tshi khou ṱanganela Paseka nga 30 C.E., Yesu u ita zwiga zwi swayeaho, kana vhuṱolo. Nga zwenezwo, vhathu vhanzhi vha tenda khae. Nikodemo, muraḓo wa Magota, a khothe khulwane ya Vhayuda, u a kwamea nahone u ṱoḓa u ḓivha zwo engedzeaho. Ngauralo u dalela Yesu vhukati ha vhusiku, zwi tou vha khagala uri u ofha uri bvumo ḽawe na vhaṅwe vharangaphanḓa vha Vhayuda ḽi ḓo tshinyadzwa arali a nga vhonwa.

U ri: “Rabi, ri a zwi ḓivha zwauri U mufunzi a bvaho ha Mudzimu, ngauri a huna muthu a konaho u ita maḓembe haya ané wa ita, arali Mudzimu á si nae’. ” Yesu a tshi fhindula, u vhudza Nikodemo uri u itela u dzhena Muvhusoni wa Mudzimu, muthu u fanela u “dovha u bebwa.”

Naho zwo ralo, muthu a nga dovha a bebwa nga nḓila-ḓe? Nikodemo u a vhudzisa: “Huufha á sa koni u dovha u vhuyelela muvhilini wa mme-awe a bebwa?”

Hai, hezwo a si   zwine u dovha u bebwa zwa amba zwone. Yesu u a ṱalutshedza: “Muthu á sa bebiwa a tshi bva maḓini na Muyani, ha koni u dzhena muvhusoni wa ṱaḓulu.” Musi Yesu a tshi lovhedzwa nahone muyamukhethwa u tshi tsela khae, nga zwenezwo o vha a tshi khou bebwa “a tshi bva maḓini na Muyani.” Hu tshi tshimbidzana na nḓivhadzo i bvaho ṱaḓulu i no ri, ‘Ndi ene murwa wanga uyu, ané nda mu takalela,’ Mudzimu o ḓivhadza uri o ḓisa murwa wa muya a re na ndugelo ya u dzhena Muvhusoni wa ṱaḓulu. Nga murahu, nga Pentekoste nga 33 C.E., vhaṅwe vho lovhedzwaho vha ḓo wana muyamukhethwa nahone nga zwenezwo vha ḓo dovha vha bebwa sa vharwa vha muya vha Mudzimu.

Fhedzi mushumo wa Murwa wa Mudzimu wa muthu o khetheaho ndi wa ndeme. Yesu u vhudza Nikodemo uri: “Vhunga Mushe ó imisela ṋowa nṱha sogani, Murwa-muthu ó fanela u imiselwa nṱha sa zwenezwo; Uri vhoṱhe vha mu tendaho vha si lovhe; tshavho hu vhe u tshila tshoṱhe.” Ee, samusi havho Vhaisiraele vho luṅwaho nga ṋowa dza vhuṱungu vho vha vho fanela u sedza ṋowa ya tsimbitswuku uri vha tshidzwe, ngauralo vhathu vhoṱhe vha fanela u tenda kha Murwa wa Mudzimu uri vha tshidzwe kha vhuimo havho ha u fa.

A tshi ombedzela mushumo wa lufuno wa Yehova, Yesu lu tevhelaho u vhudza Nikodemo uri: “Mudzimu o funa shango zwingafha-ngafha, a vhuya a ṋekedza Murwa wawe mu-bebwa-eṱhe, uri vhoṱhe vha mu tendaho, vha si lovhe, tshavho hu vhe u tshila tshoṱhe.” Nga zwenezwo, hafha Yerusalema hune ha nga tou vha miṅwedzi ya rathi musi o no thoma vhuḓinḓa hawe, Yesu u zwi ita zwa pfala uri ndi ene tshishumiswa tsha Yehova Mudzimu tsha u tshidza vhathu.

Yesu u bvela phanḓa u ṱalutshedza Nikodemo: “Ngauri Mudzimu Murwa wawe ho ngo mu ruma shangoni uri a haṱule shango,” ndi uri, hu si uri a ḽi haṱule lu vhavhaho, kana u ḽi sanda, a tshi haṱulela murafho wa vhathu u fheliswa. Nṱhani hazwo, samusi Yesu a tshi amba, o vha o rumelwa “uri shango ḽi tshidzwe nga ene.”

Nikodemo o ḓa ha Yesu e na nyofho o ḓidzumba nga swiswi. Ngauralo ndi zwi takadzaho ngauri Yesu u vuledza nyambedzano yawe nae nga uri: “Khaṱhulo yone a siyi: Tshedza [tshine Yesu a tshi fanyisa kha vhutshilo hawe na mafunzele] tsho ḓa shangoni, vhathu vha funesa swiswi; tshedza vha si tshi fune, ngauri mishumo yavho yo vha i mivhi. Ngauri vhoṱhe vha itaho zwo vhifhaho, tshedza vha a tshi vhénga, a vha ḓi tshedzani, vha tshi ri vha sa ḓo rovhedzwa mishumo yavho. A itaho mafhungo-ngoho ene u ḓa tshedzani, uri mishumo yawe i vhonale, ngauri yo shumiwa Mudzimu e khayo’.” Yohane 2:23–3:21; Mateo 3:16, 17; Mishumo 2:1-4; Numeri 21:9.

▪ Ndi mini tshine tsha ṱuṱuwedza u dala ha Nikodemo, nahone ndi ngani a tshi ḓa vhusiku?

▪ Zwi amba mini “u dovha u bebwa”?

▪ Yesu u fanyisa hani mushumo wawe kha u ri tshidza?

▪ Zwi amba mini uri Yesu ho ngo ḓa u haṱula shango?