Ndima Ya 13

U Guda Kha Milingo ya Yesu

NGA u ṱavhanya nga murahu ha ndovhedzo yawe, Yesu u iswa sogani ḽa Yudea nga muya wa Mudzimu. Hu na zwinzhi zwine a fanela uri a humbule nga hazwo, ngauri ndovhedzoni yawe ‘ḽiṱaḓulu ḽo vulea,’ uri a ḓo kona u ṱalukanya zwithu zwa ṱaḓulu. I ngoho, hu na zwinzhi zwine a fanela uri a zwi elekanye!

Yesu u fhedza maḓuvha a 40 na vhusiku ha 40 e sogani nahone a sa ḽi tshithu vhukatini ha hetshi tshifhinga. Nga zwenezwo, musi Yesu e na nḓala vhukuma, Diabolo u a sendela a tshi ri a mu linge, a tshi ri: “Arali U murwa wa Mudzimu, ambai, matombo aya a shanduke a vhe vhuswa.” Fhedzi Yesu u a zwi ḓivha uri zwo khakhea u shumisa maanḓa awe a vhuṱolo u fusha lutamo lwawe ene muṋe. Ngauralo u hana u lingea.

Fhedzi Diabolo ha fheli mbilu. U lingedza nga iṅwe nḓila. U vhetshela Yesu khaedu ya uri a ḓipose fhasi kha luvhondo lwa nnḓu khethwa uri vharuṅwa vha Mudzimu vha mu tshidze. Fhedzi Yesu a si lingee u ita musumbedzo wonoyo u vhonalaho. Yesu a tshi redza Maṅwaloni, U sumbedza uri zwo khakhea u linga Mudzimu nga u ita nga heyi nḓila.

Kha mulingo wa vhuraru, Diabolo a sumbedza Yesu mivhuso yoṱhe ya shango nga iṅwe nḓila ya vhuṱolo nahone a ri: “Hezwi zwoṱhe ndi ḓo U ṋea arali U tshi wa nga magona wa ndosha.” Fhedzi Yesu u dovha a hana u ḓiṋekedza kha mulingo wo raloho wa u ita zwo khakheaho, a khetha u dzula a tshi fulufhedzea kha Mudzimu.

Ri nga guda kha heyi milingo ya Yesu. Sa tsumbo, i sumba uri Diabolo ha sokou vha maṅwe maanḓa a vhuvhi, samusi vhaṅwe vha tshi amba, fhedzi ndi muthu wa vhukuma, a sa vhonaliho. Mulingo wa Yesu u dovha wa sumbedza uri mivhuso yoṱhe ya shango ndi thundu ya Diabolo. Ngauri Diabolo o vha a tshi nga i kumedza hani kha Kristo sa mulingo wa vhukuma arali yo vha i si yawe zwa vhukuma?

Nahone humbulani nga ha hezwi: Diabolo o ri o vha o ḓiimisela u ṋea Yesu malamba arali a tou wa nga magona a mu losha, na u mu fha mivhuso yoṱhe ya shango. Diabolo a nga lingedza u linga na riṋe nga yeneyi nḓila i fanaho, khamusi nga u vhea phanḓa hashu zwibuli zwi tamisaho zwa u wana lupfumo, maanḓa, kana vhuimo shangoni. Fhedzi ri nga vha vha vhuṱali lungafhani nga u tevhela tsumbo ya Yesu nga u dzula ri tshi fulufhedzea kha Mudzimu hu sa londwi uri mulingo wo tou itisa hani! Mateo 3:16; 4:1-11; Marko 1:12, 13; Luka 4:1-13.

▪ Zwi vhonala uri Yesu u khou elekanya nga ha mini vhukatini ha maḓuvha awe a 40 e sogani?

▪ Diabolo u lingedza u linga Yesu nga nḓila-ḓe?

▪ Ndi zwifhio zwine ra nga zwi guda milingoni ya Yesu?