Ndima Ya 119

U Iswa ha Hanna, Nga Murahu A Iswa ha Kayafa

YESU, o vhoxwa sa mupfukamulayo o ḓoweleaho, u iswa ha Hanna, we a vha e tshifhe muhulu wa muṱuṱuwedzi. Hanna o vha e tshifhe muhulu musi Yesu e mutukana wa miṅwaha ya 12 a tshi akhamadza vhafunzi nḓuni khethwa. Nga murahu vharwa vha si gathi vha Hanna vho shuma sa vhotshifhe vhahulu, nahone nga tshenetshi tshifhinga muḓuhulu wawe Kayafa o fara honoho vhuimo.

Khamusi Yesu u thoma u iswa hayani ha Hanna nga ṅwambo wa vhuhulwane ha onoyo tshifhe muhulu ha tshifhinga tshilapfu vhutshiloni ha vhurereli ha Tshiyuda. Hohu u ya u vhona Hanna hu ṋea Kayafa Tshifhe Muhulu tshifhinga tsha u kuvhanganya Magota, khothe khulwane ya Tshiyuda ya miraḓo ya 71, na tsha u kuvhanganya ṱhanzi dza mazwifhi.

Zwino tshifhe muhulu Hanna u vhudzisa Yesu nga ha vhafunziwa vhawe na nga ha pfunzo yawe. Naho zwo ralo, Yesu a tshi fhindula u ri: “Ndo amba khagala vhathu vha tshi zwi pfa. Ndo ḓi funza zwikoloni na nḓuni khethwa, hu kuvhanganaho Vha-Yuda vhoṱhe; a huna tshe nda amba ndó dzumbama. U itela’ni U tshi vhudzisa nṋe? Vhudzisa vho pfaho zwe nda amba navho’; ndi vhone vha ḓivhaho zwe nda amba.”

Nga zwenezwo, muṅwe wa vhaṱhannga o imaho tsini ha Yesu u mu vhanda khofheni, a tshi ri: “U ralo U tshi fhindula tshifhé muhulu?”

Yesu u a fhindula: “Arali ndo fhindula nga fhungo ḽivhi, nthovhedze vhuvhi haḽo; arali ndo amba zwone, U nthwela’ni?” Nga murahu ha wonoyu mufhindulano, Hanna u rumela Yesu o vhoxwa ha Kayafa.

Zwa zwino vhotshifhe vhahulu vhoṱhe na vhahulwane na vha maṅwalo, ee, na Magota oṱhe, vha khou thoma u kuvhangana. Zwi tou vha khagala uri fhethu ha muṱangano wavho ndi hayani ha Kayafa. U fara yeneyo tsengo nga vhusiku ha Paseka vhukuma zwi lwisana na mulayo wa Tshiyuda. Fhedzi hezwi a zwi thivheli vharangaphanḓa vha vhurereli kha ndivho yavho ya vhuvhi.

Vhege dzo fhiraho, musi Yesu a tshi vusa Lazaro, Magota o vha o no ḓiimisela nga one aṋe uri u fanela u fa. Nahone hu ṱoḓaho u vha maḓuvha mavhili o fhiraho, nga Ḽavhuraru, vhahulwane vha vhurereli vho langana u fara Yesu nga maano uri vha mu vhulahe. Edzanu u tou humbula, o vha o no ḓi haṱulwa a sa athu u sengiswa!

Hu khou itwa vhuḓidini ha u wana ṱhanzi dzine dza ḓo ṋekedza vhuṱanzi ha mazwifhi uri Yesu a wanale e na mulandu. Naho zwo ralo, a hu na ṱhanzi dze dza vha dzi tshi tendelana kha vhuṱanzi hadzo. Mafheleloni, hu ḓa vhavhili nahone vha hwelela vha ri: “Riṋe ro mu pfa a tshi ri: Ndi ḓo thutha nnḓu khethwa iyi yo itwaho nga zwanḓa, huno iṅwe i songo itwaho nga zwanḓa ndi ḓo i fhaṱa nga maḓuvha mararu.”

Kayafa u a vhudzisa: “A U fhinduli tshithu? Ndi miní zwiné avha vha U hwelela ngazwo’?” Fhedzi Yesu a sokou fhumula. Na kha honohu vhuṱanzi ha mazwifhi, ṱhanzi a dzi koni u ita uri mafhungo adzo a anḓane, zwenezwo zwi tshi shonisa Magota. Ngauralo tshifhe muhulu u lingedza iṅwe nḓila yo fhambanaho.

Kayafa u a ḓivha uri Vhayuda vha kwamea lungafhani nga naho e nnyi ane a ḓiita Murwa wa Mudzimu vhukuma. Luvhili tshifhingani tsho fhiraho, vho ṱavhanya vha dzhia Yesu sa musemi o tewaho nga u fa, nahone muṅwe musi vha humbula nga ho khakheaho uri o vha a tshi khou ḓiita a eḓanaho na Mudzimu. Zwino Kayafa u vhudzisa nga vhukwila a ri: “Ndi a U anisa nga Mudzimu a tshilaho, U ri vhudze arali Ú Kristo, Murwa wa Mudzimu.”

Hu sa londwi zwine Vhayuda vha humbula, vhukuma Yesu ndi Murwa wa Mudzimu. Nahone u fhumula hawe zwi nga ṱalutshedzelwa sa u landula hawe u vha Kristo. Ngauralo Yesu nga tshivhindi u a fhindula: “Ndi nṋe; huno ni ḓo vhona Murwa-muthu ó dzula thungo ya tshanḓa tsha u ḽa tsha Wa Maanḓa, a tshi ḓa é kha makole a ṱaḓulu.”

Zwenezwo, phanḓa ha vhoṱhe, Kayafa u kherula nguvho dzawe nahone u amba o halifha a ri: “O sema Mudzimu. Ri kha ḓi ṱoḓa ṱhanzi dza’ni? Asizwo, ni kha ḓi bva u mu pfa a tshi sema Mudzimu. Ni ri mini?”

Magota a huwelela a ri: “Nga a fe!” Zwenezwo vha thoma u mu tambudza, nahone vha amba zwithu zwinzhi zwa maṱamba nga hae. Vha mu vhanda tshifhaṱuwo nahone vha tshi pfela mare. Vhaṅwe vha mu fukedza tshifhaṱuwo tshoṱhe nahone vha mu rwa nga mavili avho nahone vha amba nga u goḓa vha ri: “Bvumba, ndi nnyi o U rwaho?” Haya maitele mavhi, a songo teaho a itea vhukatini ha vhusiku ha tsengo. Mateo 26:57-68; 26:3, 4; Marko 14:53-65; Luka 22:54, 63-65; Yohane 18:13-24; 11:45-53; 10:31-39; 5:16-18.

▪ Yesu u iswa ngafhi u thoma, nahone hu itea mini khae henefho?

▪ Lu tevhelaho Yesu u iswa ngafhi, nahone nga ifhio ndivho?

▪ Kayafa u zwi konisa hani uri a kone u wana Magota ane a ḓo hwelela uri Yesu o fanelwa nga lufu?

▪ Ndi maitele afhio mavhi a songo fanelaho ane a bvelela vhukatini ha tsengo?