Ndima Ya 29

U Ita Mishumo Mivhuya nga Sabatha

NDI tshimedzi tsha 31 C.E. Ho no fhira miṅwedzi i si gathi u bva tshee Yesu a amba na musadzi tshisimani tsha Samaria e lwendoni a tshi bva Yudea a tshi ya Galilea.

Zwino, musi o no funza nga vhuḓalo kha ḽa Galilea, Yesu u dovha a ya Yudea, hune a funza e zwikoloni. Hu tshi vhambedzwa na ṱhogomelo ine Bivhili ya i ṋea kha vhuḓinḓa hawe ha Galilea, a i ambesi nga ha mushumo wa Yesu kha ḽa Yudea vhukatini ha u dala hohu na vhukatini ha miṅwedzi ye a i fhedzela henefha nga murahu ha Paseka yo fhiraho. Zwi tou vha khagala uri vhuḓinḓa hawe a ho ngo ṱanganedzwa zwavhuḓi kha ḽa Yudea samusi zwo vha zwo ralo Galilea.

Nga u ṱavhanya Yesu u nḓilani ya u ya musanda wa Yudea, Yerusalema, u itela Paseka ya 31 C.E. Henefha, tsini na Khoro ya Dzinngu ya muḓini wonoyo, ishani ḽine ḽa vhidzwa Bethesda, ho vha hu na vhanzhi vha lwalaho, mabofu, na vha zwihole vhe vha ḓa. Vha tenda uri vhathu vha nga fhodzwa nga u dzhena maḓini a ḽeneḽo isha musi a tshi seluwa.

Ndi Sabatha, nahone Yesu u vhona munna henefho ishani we a vha a tshi lwala miṅwaha ya 38. A tshi ṱhogomela u lwala tshifhinga tshilapfu ha onoyo munna, Yesu u a vhudzisa: “U funa u fhola naa?”

U fhindula Yesu a ri: “Murena, a thi na muthu ané a ṋyisa ishani maḓi a tshi seluwa. Nṋe ndi tshi swika, muṅwe u dzhena nṋe ndí sathu.”

Yesu u ri khae: “Takuwa U hwale vhulalo hau U tshimbile.” Zwenezwo onoyo munna nga u ṱavhanya a fhola, a hwala vhulalo hawe, nahone a thoma u tshimbila!

Fhedzi musi Vhayuda vha tshi vhona onoyo munna, vha ri: “Ṋamusi ndi Sabatha; a zwo ngo fanela U tshi hwala vhulalo.”

Onoyo munna u a vha fhindula: “O mphodzaho ndi ene we a ri: Hwala vhulalo hau U tshimbile!”

Vha a vhudzisa: “Muthu uyu ndi nnyi we a ri: vhu hwale U tshimbile?” Yesu o vha o no ṱuwa henefho nga nṱhani ha gogo, nahone we a fhodzwa o vha a sa ḓivhi dzina ḽa Yesu. Naho zwo ralo, nga murahu Yesu na onoyo munna vha ṱangana thembeleni, nahone onoyo munna a ḓivha we a mu fhodza.

Ngauralo munna o fhodzwaho u ṱoḓa Vhayuda u itela u vha vhudza uri ndi Yesu we a mu fhodza. Vha tshi pfa izwi, Vhayuda vha ya ha Yesu. U itela mini? U ḓivha uri u ita iyi mishumo i mangadzaho nga mini? Hai. Fhedzi u mu vhona mulandu ngauri u khou ita hezwi zwithu nga Sabatha. Nahone vha thoma u mu tovhola! Luka 4:44; Yohane 5:1-16.

▪ Tsho no vha tshifhinga tshingafhani u bva tshee Yesu a dalela Yudea?

▪ Ndi ngani isha ḽine ḽa vhidzwa uri ndi Bethesda ḽi na bvumo nga u rali?

▪ Ndi vhuṱolo vhufhio vhune Yesu a vhu ita ishani, nahone zwi fara hani Vhayuda?