Ndima Ya 76

U Ḽa Na Mufarisei

MUSI Yesu o no fhindula vhasasaladzi vhane vha timatima tshisima tsha maanḓa awe a u fhodza muthu we a vha a sa koni u amba, Mufarisei a mu ramba u ya zwiḽiwani nae. Vha sa athu u ḽa, Vhafarisei vha thoma nga mukhuvha wa u ṱamba zwanḓa zwavho u guma nga lukuḓavhavha. Vha ita hezwi nga phanḓa na nga murahu ha u ḽa na musi vha tshi khou u ḽa. Naho ḽeneḽi sialala ḽi sa vunḓi mulayo wa Mudzimu wo ṅwaliwaho, fhedzi ḽi fhirisa mpimo kha zwine Mudzimu a zwi ṱoḓa kha mafhungo a u kuna nga lwa mulayo.

Musi Yesu a sa tevheli ḽeneḽo sialala, ṋemuḓi u a kanuka. Naho u kanuka hawe a sa nga ḓo hu sumbedza nga maipfi, Yesu u a zwi ṱhogomela nahone a ri: “Inwi Vhafarisei dzikhavho na dzindilo ni dzi ṱanzwa nga nnḓa, ngeno nga ngomu dzó ḓala vhuvhava na vhuvhi. Matsilu-ḓinwi, ni ri zwe zwa itwa nga nnḓa, na nga ngomu zwo itwa?”

Zwenezwo Yesu a bvukulula u ḓiitisa ha Vhafarisei vhe musi vha tshi tevhedza mikhwa vha ṱamba zwanḓa zwavho, fhedzi vha kundwa u ṱamba dzimbilu dzavho kha vhuvhi. U a laya: “Khavhe ni tshi ṱusela vhatshinyali zwiné na vha nazwo’ fhano, ndi musi zwithu zwaṋu zwoṱhe zwiné na vha nazwo’ zwó ṱamba.” U ṋea havho hu fanela u ṱuṱuwedzwa nga mbilu ya lufuno, hu si nga lutamo lwa u takadza vhaṅwe nga u ḓiita u nga vho luga.

Yesu u bvela phanḓa: “Khombo kha inwi Vhafarisei; ngauri ni thelisa muthelo wa mukango na lunonya na miroho yoṱhe, ni si londe khaṱhulo na lufuno lwa Mudzimu. Izwo zwo fanela u itwa, zwiḽa zwi songo litshwa.” Mulayo wa Mudzimu kha Vhaisiraele u ṱoḓa vha tshi bvisa tshafumi, kha zwibveledzwa zwa masimuni. Mukango na lunonya ndi zwimela zwiṱuku kana miroho zwo itelwaho u ḓifhisa zwiḽiwa. Vhafarisei vho ita na u bvisa tshafumi na kha heyi miroho miṱukuṱuku, fhedzi Yesu u a vha sasaladzela u nyadza zwithu zwa ndeme vhukuma zwine zwa vha u sumbedza lufuno, u vha na vhuhwavho, na u ḓifhima.

A tshi bvela phanḓa u vha sasaladza, Yesu u ri: “Khombo, inwi Vhafarisei, ngauri ni tama u dzudzwa bvungwi zwikoloni na u loshwa khoroni. Khombo kha inwi, ngauri ni nga zwalo zwo fukedzwaho, zwiné vhathu vha zwi kanda vhá sa zwi ḓivhi.” U sa kuna havho a hu vhonali. Vhurereli ha Vhafarisei vhu vhonala nga nnḓa, fhedzi a vhu na ndeme ya nga ngomu! Ho thewa kha u ḓiitisa.

O thetshelesa kha u sasaladza ho raloho, muḓivhi wa mulayo, wo ṅwalwaho kha Mulayo wa Mudzimu, u a gungula: “Mufunzi, U tshi ralo U sema na riṋe.”

Yesu u vhea mulandu na vhenevha vhaḓivhi vha Mulayo, u ri: “Na inwi vhafunzi vha milayo, khombo kha inwi! ngauri ni hwesa vhathu mihwalo i sá koneiho, mihwalo iné inwi ni si i edzise na nga munwe muthihi waṋu. Khombo, inwi ni fhaṱelaho zwivhundu zwa vhaporofita, ngeno vhó vhulahwa nga vho-khotsi-aṋu.”

Mihwalo ine Yesu a khou amba nga hayo ndi mikhuvha ya sialala ine vha i amba, fhedzi havha vhaḓivhi vha mulayo vha nga si vhuye vha fhungudza na mulayo na muthihi u itela uri zwi lelutshele vhathu. Yesu u dzumbulula uri vho tendela u vhulahwa ha vhaporofita, nahone u a sevha: “Uri lushaka ulu lu vhilwe malofha a vhaporofita vhoṱhe o shululwaho tshee shango ḽa sikwa. U ranga nga malofha a Abele, u guma nga malofha a Sakaria o vhulahwaho vhukati ha aletare na nnḓu khethwa. Ndi a ni vhudza ndi ri: Iina, hu ḓo vhilwa lushaka lwonolu.”

Shango ḽa vhathu vho rengululwaho ḽo thoma nga musi Adamu na Eva vha tshi beba vhana; nga zwenezwo, Abele o tshila “tshee shango ḽa sikwa.” Nga murahu ha u vhulahwa lwa tshiṱuhu ha Sakaria, mmbi ya Vhasiria yo thukhutha Yuda. Fhedzi Yesu u amba nga ha u thukhuthwa hu fhiraho uho hune ha ḓo ḓela murafho wawe nga ṅwambo wa vhuvhi hawo vhuhulwanesa. Hohu u thukhuthwa ho vha hone nga murahu ha miṅwaha ya 38, nga 70 C.E.

A tshi bvela phanḓa na u sasaladza hawe, Yesu u ri: “Khombo, inwi vhafunzi vha milayo, ngauri no dzhia khoṋo dza nḓivho. Inwi vhaṋe a ni dzheni, na dovha na dzivhisa na vha tamaho u dzhena.” Vhaḓivhi vhukuma vha Mulayo vha na mushumo wa u ṱalutshedza vhathu Ipfi ḽa Mudzimu, vha tshi ṱalutshedza zwine ḽa amba zwone. Fhedzi vha a kundwa u ita hezwi nahone vha ita na u dzhiela vhathu tshibuli tsha u pfesesa.

Vhafarisei na vhaḓivhi vha mulayo vho sinyutshela Yesu nge a vha bvukulula. Musi a tshi bva nḓuni yeneyo, vha thoma u mu pikisa nga vhuhali nahone vha tou ima kha u mu vhudzisa dzimbudziso. Vha lingedza u mu fasha nga u mu ita uri a ambe tshiṅwe tshithu tshine vha nga mu fara ngatsho. Luka 11:37-54; Doiteronomio 14:22; Mixa 6:8; 2 Koronika 24:20-25.

▪ Ndi ngani Yesu a tshi sasaladza Vhafarisei na vhaḓivhi vha Mulayo?

▪ Ndi muhwalo ufhio une vhaḓivhi vha mulayo vha u hwesa vhathu?

▪ “Tshee shango ḽa sikwa” ndi lini?