Ndima Ya 120

U Landulwa Khoroni

MUSI vho no ṱutshela Yesu tsimuni ya Getsemane nahone vha tshi shavha nga nyofho na vhaṅwe vhaapostola, Petro na Yohane vha a litsha u shavha. Khamusi vha vhona Yesu musi a tshi khou iswa nḓuni ya Hanna. Musi Hanna a tshi mu rumela ha Tshifhe Muhulu Kayafa, Petro na Yohane vha tevhela nga kule, zwi tshi vhonala uri vho tshuwela vhutshilo havho na u vhilaelela havho huhulwane uri hu ḓo itea mini kha Muṋe wavho.

Vha tshi swika luvhanḓeni lwa muḓi wa Kayafa, Yohane u a kona u dzhena khoroni, samusi a tshi ḓivhiwa nga tshifhe muhulu. Naho zwo ralo, Petro u siiwa o ima nnḓa muṋangoni. Fhedzi nga u ṱavhanya Yohane u vhuyelela ha mulindamuṋango, muṱanuni, a amba nae, nahone Petro u tendelwa u dzhena.

Zwino hu vho rothola, nahone vhalanda vha muḓi na vhaḓinḓa vha tshifhe muhulu vho vhasa mulilo wa mahale. Petro u ima navho uri a dudelwe musi a tshi khou lindela mvelelo dza tsengo ya Yesu. Henefho, tshedzani tsha mulilo muhulu, mulindamuṋango we a tendela Petro a tshi dzhena u mu sedza zwavhuḓi. A amba a ri: “Na iwe wo vha U na Yesu wa Galilea.”

O sinyuswa nge a ḓihwa, Petro u landula phanḓa ha vhoṱhe uri u ḓivha Yesu. U ri: “A thi mu ḓivhi; na zwiné wa zwi amba a thi zwi ṱalukanyi.”

Nga zwenezwo, Petro u a bva a ya tsini na khoro. Henefho, muṅwe ṅwananyana u a mu vhona nahone u amba na vho imaho henefho a ri: “Munna uyu o vha e na Yesu wa Nazareta.” Petro u dovha a landula, a ana a ri: “Muthu uyo a thi mu ḓivhi.”

Petro a ṱwa henefho khoroni, a tshi lingedza u ḓidzumba nga hune zwa nga konadzea ngaho. Khamusi e kha honovhu vhuimo u tshenuswa nga mukukulume u tshi lila nga matsheloni-tsheloni ḽi tshee ḽo swifhala. Nga hetshi tshifhinga, tsengo ya Yesu i khou bvela phanḓa, nga hu re khagala yo farelwa kha tshiṅwe tshipiḓa tsha nnḓu i re nṱha ha muṱa. Lu sa timatimisiho Petro na vhaṅwe vho lindelaho ngei fhasi vha khou vhona u dzhena na u bva ha ṱhanzi dzo fhamba-fhambanaho dzo ḓiswaho u ṱanzielela.

Ho no ḓi fhela iri i ṱoḓaho u vha nthihi u bva tshee Petro a ṱalulwa lwa u fhedza sa khonani ya Yesu. Zwino vhunzhi ha vho imaho henefho tsini nae vha ḓa khae nahone vha ri: “Nangoho, U muṅwe wa vhone; U ambululwa nga kuambele kwau.” Muṅwe kha tshenetsho tshigwada ndi shaka ḽa Malixo, we Petro a tumula nḓevhe yawe. U ri: “Huufha ndó U vhona U nae ngei tsimuni?”

Petro u amba o sinyuwa a ri: “Muthu uyo a thi mu ḓivhi.” Zwi re zwone ndi uri nga u semana na nga u ana nga eneo mafhungo, u lingedza u vha fusha uri vha tende zwa uri vhoṱhe vho khakha a tshi ita na u ḓisema uri a welwe nga vhuvhi arali a sa khou amba ngoho.

Musi Petro a tshi tou landula lwa vhuraru, mukukulume u a lila. Nahone nga tshenetsho tshifhinga, Yesu, ane zwa vhonala uri u bvela nnḓa a ima kha tshiingamo tshi re nṱha ha muṱa, u a rembuluwa nahone a mu lavhelesa. Nga u ṱavhanya, Petro u elelwa zwe Yesu a zwi amba hune ha nga tou vha awara dzi si gathi mathomoni e nḓuni ya nṱha: “Mukukulume ú sathu lila ka-vhili, U ḓo vha wó no landula ka-raru.” Ó pfiswa vhuṱungu nga vhuvhi hawe vhuhulwane, Petro u bvela nnḓa nahone a lila lwa vhuṱungu. 

Izwi zwi nga bvelela hani? Musi Petro o no fushea nga u khwaṱha hawe muyani, o vha a tshi nga landula hani Muṋe wawe luraru nga u tevhekana hu ṱavhanyaho? Lu sa timatimisi hezwi zwiimo zwi wela Petro a songo zwi lavhelela. Ngoho yo shandiwa, nahone Yesu u dzhiiwa sa ḽivemu ḽivhi. Zwo lugaho zwo itwa uri zwi vhonale sa zwo khakheaho, muthu a si na mulandu sa a re na mulandu. Ngauralo nga ṅwambo wa u tsikeledzwa nga vhuimo, Petro u ḓiwana o hanganea. Nga u ṱavhanya maḓipfele awe a vhukuma a u fulufhedzea a a khakhiswa; zwo mu pfisaho vhuṱungu ndi u fashwa nga nyofho ya u ofha muthu. Zwi songo vhuya zwa bvelela kha riṋe! Mateo 26:57, 58, 69-75; Marko 14:30, 53, 54, 66-72; Luka 22:54-62; Yohane 18:15-18, 25-27.

▪ Petro na Yohane vho kona hani u dzhena khoroni ya tshifhe muhulu?

▪ Musi Petro na Yohane vhe khoroni, hu khou bvelela mini ngomu nḓuni?

▪ Mukukulume u lila lungana, nahone Petro u landula uri u ḓivha Kristo lungana?

▪ Naa zwi amba mini uri Petro o semana na u ana?

▪ Ndi mini tshine tsha ita uri Petro a landule uri u ḓivha Yesu?