Ndima Ya 12

U Lovhedzwa ha Yesu

HUNE ha nga vha miṅwedzi ya rathi musi Yohane a tshi thoma u huwelela, Yesu, ane zwino a vha na miṅwaha ya 30, u ḓa khae Yorodane. Nga tshiitisi tshifhio? U mu dalela lwa vhukonani? Naa Yesu u sokou vha na dzangalelo kha uri Yohane u khou bvela hani phanḓa kha mushumo wawe? Aiwa, Yesu u humbela Yohane uri a mu lovhedze.

Zwenezwo Yohane u a hana a ri: “Ndi nṋe ndo fanelaho u lovhedzwa nga iwe; huno iwe U ḓa ha nṋe hani?” Yohane u a zwi ḓivha uri muzwala wawe Yesu ndi Murwa wa Mudzimu o khetheaho. Ee, Yohane o tamba thumbuni ya mme awe nga dakalo musi Maria, o ḓihwala nga Yesu, a tshi vha dalela! Mme a Yohane, Elisabetha, a zwi timatimisi uri o mu vhudza nga hezwi. Nahone a nga vha o dovha a mu vhudza nga ha musi muruṅwa a tshi ḓivhadza nga ha u bebwa ha Yesu na musi vharuṅwa vha tshi amba na vhalisa vhusiku he Yesu a bebwa ngaho.

Ngauralo Yesu a si mutsinda kha Yohane. Nahone Yohane u a zwi ḓivha uri ndovhedzo yawe a si ya Yesu. Ndi ya vhane vha khou rembuluwa zwivhini zwavho, fhedzi Yesu ha na tshivhi. Naho zwo ralo, hu sa londwi u hana ha Yohane, Yesu u a kombetshedza: “Afha litsha u hana; zwo ri fanela u vuledza zwo lugaho zwoṱhe nga u ralo.”

Ndi ngani zwo tea uri Yesu a lovhedzwe? Ngauri ndovhedzo ya Yesu ndi ya pfanyisedzo, hu si ya u rembuluwa zwivhini, fhedzi ya u ḓiṋekedza nga dzawe u itela u ita lufuno lwa Khotsi awe. Yesu o vha e muvhaḓi, fhedzi zwino tshifhinga tsho swika tsha uri a thome vhuḓinḓa he Yehova Mudzimu a mu rumela hone uri a ḓe a vhu ite kha ḽifhasi. Naa ni humbula uri Yohane u lavhelela uri hu itee naho tshi tshifhio tshi songo ḓoweleaho musi a tshi lovhedza Yesu?

Ee, nga murahu Yohane u a vhiga: “Hone o nthumaho u lovhedza maḓini, ndi ene we a mbudza a ri: Ané wa ḓo vhona Muya u tshi tsa wa dzula kha ene, ndi ene ane a ḓo lovhedza nga Muya mukhethwa.” Ngauralo Yohane u khou lavhelela muya wa Mudzimu u tshi kavha kha muṅwe ane a mu lovhedza. Nga zwenezwo, khamusi ha ngo akhamala na kathihi, musi Yesu a tshi bva maḓini, Yohane a tshi vhona “Muya wa Mudzimu u tshi tsa vhunga ḽiivha u tshi ḓa kha ene.”

Fhedzi hu itea zwi fhiraho hezwo musi Yesu a tshi lovhedzwa. ‘Ḽiṱaḓulu ḽi a vulelwa’ ene. Zwi amba mini? Nga hu re khagala zwi amba uri musi a tshi khou lovhedzwa, muhumbulo wa vhutshilo hawe ha ṱaḓulu ha musi a sa athu u vha muthu wa ṋama u vhuyelela khae. Nga zwenezwo, zwino Yesu u elelwa nga vhuḓalo vhutshilo hawe sa murwa wa muya wa Yehova Mudzimu, u katela na zwithu zwoṱhe zwe Mudzimu a mu vhudza e ṱaḓulu vhukatini ha u vha hone hawe a sa athu u vha muthu.

Nga ho engedzeaho, tshifhingani tsha u lovhedzwa hawe, ipfi ṱaḓulu ḽa huwelela ḽa ri: “Ndi ene Murwa-mufunwa wanga uyu, ané nda mu takalela.” Ndi ipfi ḽa nnyi? Naa ndi ipfi ḽa ene muṋe Yesu? Aiwa, na khathihi! Ndi ḽa Mudzimu. Nga hu re khagala, Yesu ndi Murwa wa Mudzimu, a si Mudzimu ene muṋe, samusi vhaṅwe vhathu vha tshi amba nga u ralo.

Naho zwo ralo, Yesu ndi murwa wa muthu wa Mudzimu, samusi zwo vha zwo ralo nga Adamu, muthu wa u thoma. Mufunziwa Luka, musi o no ṱalusa ndovhedzo ya Yesu, u ṅwala uri: “Huno Yesu, misi a tshi thoma mushumo wawe, o vha o no vha na miṅwaha ya mahumi mararu; huno vhathu vho vha vha tshi mu ita murwa wa Yosefa, wa Eli, . . . wa Davida, . . . wa Abrahamu, . . . wa Noaxe, . . . wa Adamu, wa Mudzimu.”

Samusi Adamu o vha e ‘murwa wa Mudzimu’ wa muthu, na Yesu zwo ralo-vho. Yesu ndi muthu muhulwane we a vhuya a tshila, zwine zwa vha khagala musi ri tshi ṱolisisa vhutshilo ha Yesu. Naho zwo ralo, u lovhedzwani hawe, Yesu u dzhena vhushakani vhuswa na Mudzimu, a tshi dovha a vha Murwa wa Mudzimu wa muya. Zwino zwi nga Mudzimu u khou mu vhidza uri a vhuye ṱaḓulu, nga u mu thomisa buḓo ḽine ḽa ḓo mu ita uri a ṋekedze tshoṱhe vhutshilo hawe ha muthu sa tshiṱhavhelo tsha vhathu vho semiwaho. Mateo 3:13-17; Luka 3:21-38; 1:34-36, 44; 2:10-14; Yohane 1:32-34; Vha-Heberu 10:5-9.

▪ Ndi ngani Yesu e si mutsinda kha Yohane?

▪ Samusi Yesu a songo vhuya a ita zwivhi, ndi ngani a tshi lovhedzwa?

▪ U ya nga zwine Yohane a zwi ḓivha nga ha Yesu, ndi ngani a sa akhamali musi muya wa Mudzimu u tshi ḓa kha Yesu?