Ndima Ya 116

U Lugisela Vhaapostola u Ṱuwa Hawe

ZWIḼIWA zwa khumbudzo zwo no fhira, fhedzi Yesu na vhaapostola vhawe vha kha ḓi vha nḓuni ya nṱha. Naho Yesu a tshi ḓo ṱuwa hu si kale, u na zwithu zwinzhi zwine a kha ḓi fanela u amba navho. U a vha khuthadza: “Dzimbilu dzaṋu dzi so ngo tshenuwa; tendani Mudzimu.” Fhedzi u a engedza nga uri: “Ni tende na nṋe.”

Yesu u bvela phanḓa uri: “Nḓuni ya Khotsi hu na madzulo manzhi. . . . Ndi ya u ni lugisela madzulo . . . uri ni ḓe huné nṋe nda vha hone. Huné nṋe nda ya hone, ni a hu ḓivha, na nḓila ni a i ḓivha-vho.” Vhaapostola a vha ṱalukanyi zwa uri Yesu u khou amba nga u ya ṱaḓulu, ngauralo Thoma u a vhudzisa: “Murena, huné wa ya hone a ri hu ḓivhi; huno nḓila ri nga i ḓivha hani?”

Yesu u a fhindula: “Ndi nṋe nḓila na mafhungo-ngoho na vhutshilo.” Ee, nga u mu ṱanganedza na u edzisa buḓo ḽa vhutshilo hawe muthu a nga kona u dzhena nḓuni ya ṱaḓulu ya Khotsi, samusi Yesu a tshi ri: “A huna ane a ḓa ha Khotsi, arali á sa ḓi nga nṋe.”

Filipo u a humbela: “Murena, ri sumbedze Khotsi, ndi hone ri si tsha ḓo vha na tshiné ra vhilaela.” Nga hu re khagala Filipo u ṱoḓa Yesu a tshi sumbedza musumbedzo u vhonalaho wa Mudzimu, sa we wa vhuya wa sumbedzwa mabononi a kale zwifhingani zwa Mushe, Elia, na Yesaya. Fhedzi, vhukuma, vhaapostola vha na tshiṅwe tshithu tshi fhiraho mabono a wonouḽa mufuda, samusi Yesu a tshi swaya hezwi: “Tshe nda dzula na inwi! iwe a U athu u nḓivha, Filipo? A vhonaho nṋe, u vhona Khotsi.”

Yesu u sumbedza nga ho fhelelaho vhumuthu ha Khotsi awe lune nga u tshila nae na nga u mu vhona, zwi nga vhukuma u khou vhona Khotsi. Naho zwo ralo, Khotsi ndi muhulwane kha Murwa, samusi Yesu a tshi tenda: “Mafhungo ané nda ni vhudza, a thi ambi a tshi bva kha nṋe.” Yesu nga ho teaho u ṋea ndugelo yoṱhe ya u funza hawe kha Khotsi awe wa ṱaḓulu.

Zwi fanela u vha zwo ṱuṱuwedza vhaapostola lungafhani musi zwino vha tshi pfa Yesu a tshi vha vhudza uri: “Ndi a ni vhudza, a tendaho nṋe u ḓo shuma-vho mishumo ye nda i ita, na i fhiraho iyo u ḓo shuma.” Yesu ha ambi uri vhatevheli vhawe vha ḓo sumbedza maanḓa mahulwane a vhuṱolo u fhira he a ita. Aiwa, fhedzi u amba uri vha ḓo bvela phanḓa na vhuḓinḓa tshifhinga tshilapfu, mivhunduni mihulwane vhukuma, na kha vhathu vho engedzeaho.

Yesu ha nga ṱutsheli vhafunziwa vhawe musi o no ṱuwa. U a fulufhedzisa: “Na tshiné na humbela nga dzina ḽanga ndi ḓo tshi ita.” A tshi bvela phanḓa, u ri: “Huno nṋe ndi ḓo humbela Khotsi uri a ni fhe Muimeleli muṅwe, wa u dzula na inwi lini na lini. Ndi Muya wa mafhungo-ngoho.” Nga murahu, musi o no gonyela ṱaḓulu, Yesu u shululela vhafunziwa vhawe muyamukhethwa, hoyu ane a vha muimeleli.

U ṱuwa ha Yesu hu tsini, samusi a tshi ri: “Hú si kale shango a ḽi tsha ḓo mbona.” Yesu u ḓo vha tshivhumbiwa tsha muya tshine muthu a sa ḓo tshi vhona. Fhedzi Yesu u dovha a fulufhedzisa vhaapostola vhawe vha fulufhedzeaho uri: “[Ni] ḓo mbona, ngauri ndi a tshila, huno na inwi ni ḓo tshila.” Ee, hu si uri Yesu u ḓo vhonala nga tshivhumbeo tsha muthu nga murahu ha lufu lwawe, fhedzi nga tshifhinga tsho teaho u ḓo vha vusela vhutshiloni nae ṱaḓulu sa zwivhumbiwa zwa muya.

Zwino Yesu u bula mulayo u leluwaho u no ri: “A re na milayo yanga, a ita zwiné ya amba, ndi ene a mpfunaho. A mpfunaho u ḓo funwa nga Khotsi-anga, na nṋe ndi ḓo mu funa nda ḓivhonadza kha ene.”

Zwenezwo muapostola Yudasi, ane a dovha a vhidzwa Thadeo, a dzhenelela a ri: “Murena, U ḓo vha U tshi itela’ni U tshi ḓi-vhonadza kha riṋe, shango ḽí si U vhone?”

Yesu u a fhindula: “Arali muthu a tshi mpfuna u ḓo vhulunga fhungo ḽanga; na Khotsi-anga u ḓo mu funa . . . A sá mpfuni, maipfi anga ha a vhulungi.” U fhambana na vhatevheli vhawe vha ḓiṱukufhadzaho, shango ḽi nyadza pfunzo dza Kristo. Ngauralo ha ḓisumbedzi khavho.

Vhukatini ha vhuḓinḓa hawe kha ḽifhasi, Yesu o funza vhaapostola vhawe zwithu zwinzhi. Naa vha ḓo zwi humbula hani zwoṱhe, zwihuluhulu u bva tsheetsho, u swika na tshino tshifhinga, vha tshi kundwa u humbula zwinzhi? Zwi takadzaho ndi uri Yesu u a fulufhedzisa: “Ene Muimeleli, Muya mukhethwa, ané Khotsi a ḓo mu ruma dzinani ḽanga, onoyo u ḓo ni funza zwoṱhe, u ḓo ni eletshedza zwoṱhe zwe nda ni vhudza.”

Hafhu a tshi vha khuthadza, Yesu u ri: “Ndi sia mulalo kha inwi, ndi ni fha mulalo wanga . . . Dzimbilu dzaṋu dzi songo dzinginyea.” I ngoho, Yesu u khou ṱuwa, fhedzi u a ṱalutshedza: “Arali nó vha ni tshi mpfuna, ndi musi ni tshi takala ndi tshi ya ha Khotsi; ngauri Khotsi ndi muhulwane kha nṋe.”

Tshifhinga tsha Yesu tsho salaho tsha u vha navho ndi tshiṱuku. U ri: “A thi tsha ḓo amba zwinzhi na inwi, ngauri muvhusi wa shango ḽino u khou ḓa, huno ene ha na na tshithihi kha nṋe.” Sathane Diabolo, we a kona u dzhena kha Yudasi nahone a mu langa, ndi muvhusi wa ḽino shango. Fhedzi a hu na vhushayanungo ha tshivhi kha Yesu vhune Sathane a nga kona u shumela khaho u mu thivhela uri a si shumele Mudzimu.

U Ḓiphina nga Vhushaka ha Tsini-tsini

Nga murahu ha khumbudzo, Yesu o vha a tshi khou ṱuṱuwedza vhaapostola vhawe nga nyambedzano i bvaho mbiluni. Hu nga vha ho no fhira vhukati ha vhusiku. Ngauralo Yesu u a khadeledza: “Takuwani, nḓarieni ri ṱuwe.” Naho zwo ralo, vha sa athu ṱuwa, o kwamea nga u vha funa hawe, Yesu, u bvela phanḓa u amba, a tshi vha ṋea tshifanyiso tshi ṱuṱuwedzaho.

U thoma nga uri: “Ndi nṋe muṱokola vhukuma, muṱavhi ndi Khotsi-anga.” Muṱavhi Muhulwane, Yehova Mudzimu, o ṱavha hoyu muṱokola wa pfanyisedzo musi a tshi ḓodza Yesu nga muyamukhethwa ndovhedzoni yawe mafheloni a 29 C.E. Fhedzi Yesu u bvela phanḓa u sumbedza uri muṱokola u fanyisela zwo engedzeaho u fhira ene fhedzi, a tshi ṱhogomela hezwi: “Davhi ḽi re kha nṋe, ḽi sá aṋwi mitshelo, u a ḽi khwatha. Ḽi aṋwaho mitshelo u a ḽi khwathela uri ḽi anze mitshelo. . . . Vhunga davhi ḽí sa koni u aṋwa mitshelo nga ḽone ḽine, arali ḽi sa dzuli kha muṱokola, na kha inwi zwi ḓo ralo, arali ní sa dzuli kha nṋe. Ndi nṋe muṱokola, inwi ni matavhi.”

Nga Pentekoste, nga murahu ha maḓuvha a 51, vhaapostola na vhaṅwe vha vha matavhi a muṱokola musi muyamukhethwa u tshi shululelwa khavho. Mafheleloni, vhathu vha 144 000 vha vha matavhi a muṱokola wa pfanyisedzo. Khathihi na tsinde ḽa muṱokola, Yesu Kristo, havha vha ita muṱokola wa pfanyisedzo u bveledzaho mitshelo ya Muvhuso wa Mudzimu.

Yesu a tshi ṱalutshedza khoṋololo ya u bveledza mitshelo u ri: “A dzulaho kha nṋe, nṋe nda vha kha ene, ndi ene ane a ḓo aṋwa mitshelo minzhi; ngauri ní si na nṋe, a ni koni u ita tshithu.” Naho zwo ralo, arali muthu a tshi kundwa u aṋwa mitshelo, Yesu u ri, “u a laṱwa kule vhunga davhi ḽo omaho, ḽiné muthu a doba a ḽi kudza muliloni ḽa swa.” Kha ḽiṅwe sia, Yesu u a fulufhedzisa: “Arali ni tshi dzula kha nṋe, na mafhungo anga á dzula kha inwi, ni ḓo humbela zwiné na zwi funa, na zwi wana.”

Zwiṅwe hafhu, Yesu uri kha vhaapostola vhawe: “Zwiné Khotsi-anga a wana vhugala ngazwo’, ndi musi ni tshi aṋwa mitshelo minzhi na vha vhafunziwa, vhanga.” Mitshelo ine Mudzimu a i ṱoḓa kha matavhi ndi u ḓisumbedza pfaneleo dzine dza nga dza Kristo, zwihuluhulu lufuno. Zwiṅwe hafhu, samusi Kristo o vha e muḓivhadzi wa Muvhuso wa Mudzimu, mitshelo i ṱoḓeaho i dovha ya katela mishumo yavho ya u ita vhafunziwa samusi o zwi ita.

Zwino Yesu u a khadeledza: “Dzulani ni kha lufuno lwanga.” Naho zwo ralo, vhaapostola vha nga ita nga u ralo hani? U ri: “Arali ni tshi ita zwiné milayo yanga ya amba, ndi hone ni kha lufuno lwanga.” Yesu a tshi bvela phanḓa, u a ṱalutshedza u ri: “Mulayo wanga ngoyu: Funanani vhunga nṋe ndó ni funa. A huna a re na lufuno lu fhiraho lwa uyo a ṅaledzaho vhutshilo hawe a tshi itela khonani dzawe.”

Nga dziawara dzi si gathi, Yesu u ḓo sumbedza holu lufuno luhulwane nga u ṋekedza vhutshilo hawe a tshi itela vhaapostola vhawe, u katela na vhaṅwe vhoṱhe vhane vha ḓo sumbedza lutendo khae. Tsumbo yawe i fanela u kwama na vhatevheli vhawe u vha na lufuno lwa u ḓikumedza nga tshavho. Holu lufuno lu ḓo vha swaya, samusi Yesu o zwi bula mathomoni uri: “Ndi zwiné vhathu vhoṱhe vha ḓo ḓivha ngazwo’ zwauri ni vhafunziwa vhanga arali u funana hu hone kha inwi.”

Yesu a tshi ṱalula khonani dzawe, u ri: “Khonani dzanga ndi inwi arali ni tshi ita zwe nda ni laya. A thi tsha ri ni vhalanda, ngauri mulanda ha ḓivhi zwiné muṋe wawe a ita. Inwi ndo ni vhudza nda ri: Ni khonani dzanga ngauri ndo ni vhudza zwoṱhe zwe nda zwi pfa nga Khotsi-anga.”

Ndi u vha na vhushaka havhuḓi lungafhani​—u vha khonani dza tsini-tsini dza Yesu! Fhedzi u itela u bvela phanḓa u ḓiphina nga hovhu vhushaka, vhatevheli vhawe vha fanela u dzula vha “tshi aṋwa mitshelo.” Arali vha tshi aṋwa, Yesu u ri “na tshine na humbela nga dzina ḽanga, ndi ḓo tshi ita.” Vhukuma, heyo ndi mpho khulwane lungafhani ya u aṋwa mitshelo ya Muvhuso! Musi o no dovha a khadeledza vhaapostola ‘u funana nga tshavho,’ Yesu u ṱalutshedza uri shango ḽi ḓo vha vhenga. Naho zwo ralo, u a vha khuthadza: “Arali shango ḽi tshi ni vhénga, ni ḓivhe zwauri ḽo ranga u vhénga nṋe.” Lu tevhelaho Yesu u a dzumbulula uri ndi ngani shango ḽi tshi vhenga vhatevheli vhawe, a tshi ri: “Ḽi a ni vhénga, ngauri a ni vha shango ḽino, ndo ni nanga na bva kha ḽone.”

A tshi bvela phanḓa u ṱalutshedza tshiitisi tsha vengo ḽa shango, Yesu u bvela phanḓa uri: “Hezwo zwoṱhe vha ḓo ni ita nge na vha na dzina ḽanga, ngauri [Yehova Mudzimu] o nthumaho a vha mu ḓivhi.” Zwihuluhulu, mishumo ya Yesu ya vhuṱolo, i ṱanzielela havha vha mu vhengaho, samusi a tshi ṱhogomelisa uri: “Ngavhe ndí so ngo shuma mishumo kha vhone, mishumo i sathu shumiwa nga muṅwe, ndi misi vhá si na zwivhi. Zwino hone vho i vhona vha fhedza vha ḓi mbénga na Khotsi-anga vha mu vhénga.” Nga zwenezwo, samusi Yesu a tshi amba, luṅwalo lu a vuledzwa: “Vho mbénga ndi si na mulandu.”

Samusi o zwi ita mathomoni, Yesu u dovha u vha khuthadza nga u vha fulufhedzisa uri u ḓo vha rumela muthusi, muyamukhethwa, ane a vha maanḓa mahulwane a shumaho a Mudzimu. “Ene u ḓo vha ṱhanzi yanga. Hone na inwi ni a ṱanziela.”

U Bvela Phanḓa a tshi Laya nga ha u Ṱuwa Hawe

Yesu na vhaapostola vhawe vha lugela u bva nḓuni ya nṱha. U a bvela phanḓa u ri “Mafhungo asia ané nda ni vhudza ndi tshi ri ni sa ḓo khukhuliswa.” Nga zwenezwo a vha ṋea tsevho i pfisaho vhuṱungu ya uri: “Vha ḓo ni bvisa tshivhidzoni; na hone hu ḓa tshikhathi, tshiné muthu ané a ni vhulaha a ḓo ri ndi hone a tshi khou shumela Mudzimu.”

Vhukuma vhaapostola vho khakhisea vhukuma nga heyi tsevho. Naho Yesu mathomoni o amba uri shango ḽi ḓo vha vhenga, ho ngo bvukulula nga ho livhaho uri vha ḓo vhulahwa. Yesu u a ṱalutshedza: “Ndí so ngo ni vhudza na kale, ndi ngauri ndo vha ndi tshee na inwi.” Naho zwo ralo, ndi zwavhuḓi lungafhani u vha shomedza hu tshee nga phanḓa nga hovhu vhuṱanzi a sa athu u ṱuwa!

Yesu u a bvela phanḓa: “Zwino ndi ya ha uyo we a nthuma. A huna muthu kha inwi ané a mbudzisa a ri: U ya ngafhi?” Nga tshikovhelelo, vho vha vho vhudzisa hune a khou ya hone, fhedzi zwino vho tshuswa vhukuma nga zwe a vha vhudza lune vha kundwa na u bvela phanḓa u mu vhudzisa nga ha hezwi. Samusi Yesu a tshi ri: “Hone zwino ndó ni vhudza ayo, mbilu dzaṋu dzo ḓala vhuṱungu.” Vhaapostola vho ṱungufhala hu si nga uri vha vho zwi ḓivha uri vha ḓo tambula nga u tovholwa hu vhavhaho na u vhulahiwa fhedzi, fhedzi na ngauri Muṋe wavho u khou vha sia.

Ngauralo Yesu u a ṱalutshedza: “Ndi tshi ṱuwa ndi u ni tonda. Ngauri arali ndá sa ṱuwa Muimeleli ha nga ḓi ha inwi. Hone ndá ṱuwa, ndi ḓo mu ruma ha inwi.” Sa muthu, Yesu a nga vha fhethu huthihi fhedzi nga tshifhinga tshithihi, fhedzi musi e ṱaḓulu, a nga ruma muimeleli, muyamukhethwa wa Mudzimu, kha vhatevheli vhawe naho hu ngafhi hune vha nga vha vhe hone kha ḽifhasi. Ngauralo u ṱuwa ha Yesu hu ḓo vhuyedza.

Yesu u ri muyamukhethwa, “u ḓo rovhedza shango tshivhi, na u luga, na khaṱulo.” Tshivhi tsha shango, u kundwa haḽo u vha na lutendo kha Murwa wa Mudzimu, tshi ḓo bvukululwa. Zwiṅwe hafhu, vhuṱanzi vhu fushaho ha u luga ha Yesu vhu ḓo sumbedzwa nga u gonya hawe a tshi ya ha Khotsi. Nahone u kundwa ha Sathane na shango ḽawe ḽa vhuvhi u fhelisa u fulufhedzea ha Yesu ndi vhuṱanzi vhu fushaho ha uri muvhusi wa shango o haṱulelwa lu vhavhaho.

Yesu u bvela phanḓa uri: “Ndi tsha ḓi vha na manzhi e nda vha ndi tshi funa u ni vhudza, hone zwino a nga ḓo ni lemela.” Ngauralo Yesu u fulufhedzisa uri musi a tshi shululela muyamukhethwa, ane a vha maanḓa a shumaho a Mudzimu, u ḓo vha thusa u pfesesa hezwi zwoṱhe u ya nga hune nungo dzavho dza kona u zwi fara ngaho.

Nga ho khetheaho vhaapostola vha kundwa u pfesesa uri Yesu u ḓo fa nahone nga zwenezwo a vhonala khavho musi a tshi vuswa. Ngauralo vha vhudzisana nga tshavho uri: “Ndi mini zwiné a amba na riṋe a ri: Hú si kale a ni tsha ḓo mbona, ha dovha he’ hú si kale na mbona, na zwauri; ndi khou ṱuwa ndi ya ha Khotsi?”

Yesu u ṱhogomela uri vha ṱoḓa u mu vhudzisa, ngauralo u a ṱalutshedza: “Ngoho, ngoho, ndi a ni vhudza ndi ri: Inwi ni ḓo lila zwililo, shango ḽone ḽi ḓo takala. Inwi ni ḓo ṱungufhala, huno vhuṱungu haṋu vhu ḓo shanduka ha vha dakalo.” Nga murahunyana ha ḽeneḽo ḓuvha, nga masiari, musi Yesu a tshi vhulahwa, vharangaphanḓa vha vhurereli vha shango vha a takala, fhedzi vhafunziwa vha a ṱungufhala. Naho zwo ralo, vhuṱungu havho ho shanduka ha vha dakalo lungafhani, musi Yesu a tshi vuswa! Nahone dakalo ḽavho ḽi a bvela phanḓa musi a tshi vha ṋea maanḓa nga Pentekoste uri vha vhe ṱhanzi dzawe nga u vha shululela muyamukhethwa wa Mudzimu!

A tshi vhambedza vhuimo ha vhaapostola na ha mufumakadzi a re na maṱungu a u beba, Yesu u ri: “Musadzi arali a tshi beba u na vhuṱungu ngauri tshikhathi tshawe tsho swika.” Fhedzi Yesu u a amba uri ha tsha humbula maṱungu awe musi ṅwana wawe o no bebwa, nahone u ṱuṱuwedza vhaapostola vhawe, a tshi ri: “Na inwi-vho zwino ni na vhuṱungu; hone ndi ḓo dovha nda ni vhona [musi ndi tshi vuswa], huno mbilu dzaṋu dzi ḓo takala; huno iḽo dakalo ḽaṋu a ni nga ṱangulwi nga muthu.”

U swika zwino, vhaapostola a vha athu u humbela dzinani ḽa Yesu. Fhedzi zwino u ri: “Na tshiné na ḓo humbela Khotsi u ḓo ni ṋea dzinani ḽanga. . . . ngauri ene muṋe, ene Khotsi, u a ni funa, nge inwi na mpfuna, na tenda zwauri nṋe ndo bva ha Khotsi. Ndo bva ha Khotsi, nda ḓa shangoni. Ndi dovha nda ṱutshela shango, nda ya ha Khotsi.”

Maipfi a Yesu ndi ṱhuṱhuwedzo khulwane kha vhaapostola. Vha ri: “Ri tenda ngazwo’ zwauri wo bva ha Mudzimu.” Yesu a vhudzisa a ri: “Zwino ni a tenda? Vhonani, hu ḓa tshikhathi, na zwino tsho no swika, tshiné na ḓo balanganywa noṱhe, muṅwe a ya hawe, muṅwe a ya hawe; nṋe na ntsia ndi ndoṱhe.” Naho zwi tshi vhonala sa zwi sa tendei, hezwi zwi itea ḽi sa athu u tsha!

Yesu u fhedza nga uri: “Ndi tshi ralo ndi itela uri ni vhe na mulalo kha nṋe. Fhano shangoni ni vhuṱunguni; hone ni songo ofha, ngauri nṋe shango ndo ḽi kunda.” Yesu o kunda shango nga u vuledza lufuno lwa Mudzimu nga u fulufhedzea hu sa londwi zwoṱhe zwe Sathane na shango ḽawe vha lingedza u zwi ita u itela u tshinya u fulufhedzea ha Yesu.

Thabelo ya u Fhedza Nḓuni ya Nṱha

A tshi sudzuluswa nga lufuno luhulwane kha vhaapostola vhawe, Yesu o vha a tshi khou vha lugiselela u ṱuwa hawe ha zwenezwino. Zwino, musi o no vha laya na u vha khuthadza tshifhinga tshilapfu, u lilala ṱaḓulu nahone a humbela Khotsi awe uri: “U ṋee Murwa wau vhugala, uri na Murwa wau a U ṋee vhugala. Ngauri wo mu kumedza vhathu vhoṱhe, uri vhoṱhe vhe wa mu ṋea a vha fhe vhutshilo vhu sá fheli.”

Ndi tshiṱoho tshi nyanyulaho lungafhani tshine Yesu a tshi thoma​—vhutshilo vhu sa fheli! Nge a “kumedzwa vhathu vhoṱhe,” Yesu a nga ṋea zwivhuya zwa tshidzimu tshawe tsha phuluso kha vhathu vhoṱhe vhane vha khou fa. Naho zwo ralo, u ṋea fhedzi “vhutshilo vhu sá fheli” vhane Khotsi a vha ṱanganedza. A tshi fhaṱa mafhungo awe kha yenei ṱhoho ya vhutshilo vhu sa fheli, Yesu u bvela phanḓa na thabelo yawe:

“Vhutshilo vhu sá fheli ndi uri vha ḓivhe iwe, U re Mudzimu nga ngoho Ú woṱhe; vha ḓivhe na Yesu Kristo, we wa mu ruma.” Ee, u tshidzwa ho ḓisendeka nga u vha hashu na nḓivho ya Mudzimu khathihi na Murwa wawe. Fhedzi hu ṱoḓea zwo engedzeaho u fhira u sokou dzhenisa nḓivho ṱhohoni.

Muthu u fanela u vha ḓivha vhukuma, a vhe khonani yavho i pfesesaho. Muthu u fanela u ḓipfa nga nḓila ine vha ḓipfa ngayo nga ha zwiṅwe zwithu nahone a vhone zwithu nga nḓila ine vha zwi vhona ngayo. Nahone zwi fhiraho zwoṱhe, muthu u fanela u lwela u edzisa pfaneleo dzavho dzi sa vhambedzwi na tshithu a tshi shuma na vhaṅwe.

Lu tevhelaho Yesu u a rabela: “Ndo U ṋea vhugala fhano shangoni, nge nda vuledza mushumo we wa mpha uri ndi u shume.” Nga zwenezwo samusi o no vuledza mushumo wawe u swika kha honovhu vhuimo nahone a na fulufhelo ḽa uri vhumatshelo hawe vhu ḓo vha na mvelelo, u humbela uri: “Zwino ṋea nṋe vhugala, iwe Khotsi, tsini hau, vhugalani he nda vha ndi naho’ ndí na iwe shango ḽí sathu u vha hone.” Ee, zwino u vho humbela u vhuyedzedzwa kha vhugala hawe he a vha e naho ṱaḓulu nga u vuswa vhafuni.

A tshi nweledza mushumo wawe muhulwane kha ḽifhasi, Yesu u ri: “Ndo ḓivhadza dzina ḽau kha vhathu, vhe wa mpha vha tshi bva kha shango. Vho vha vhe vhau, wa vha kumedza nṋe; zwiné fhungo ḽau ḽa amba, vho zwi ita.” Yesu o shumisa dzina ḽa Mudzimu, Yehova, vhuḓinḓani hawe nahone o ḽi bula nga nḓila yo teaho, fhedzi o ita zwo engedzeaho u fhira u ita uri dzina ḽa Mudzimu ḽi ḓivhiwe kha vhaapostola vhawe. O ita na u ṱanḓavhudza nḓivho yavho na u pfesesa havho Yehova, nga ha vhumuthu hawe, na nga ha ndivho dzawe.

A tshi dzhia Yehova sa Muhulwane wawe, Ane a shuma fhasi hawe, nga u ḓiṱukufhadza Yesu u a tenda u ri: “Ngauri mafhungo e wa mpha ndi one e nda vha fha. Vhone vho a ṱanganedza, vha ḓivha nga-ngoho zwauri ndo ḓa ndi tshi bva ha iwe; vho tenda zwauri ndi iwe wo nthumaho.”

A tshi ita phambano vhukati ha vhatevheli vhawe na vhathu vhoṱhe, Yesu lu tevhelaho u a rabela: “Ndi humbelela vhone; a thi humbeleli shango. Ndi humbelela vhe wa mpha . . . ndo vha farisa . . . , ndo vha linda, hu si vhe na o xelaho kha vhone, arali e si uyo ṅwana o xelaho,” a vhidzwaho, Yudasi Iskariote. Nga tshenetshi tshifhinga, Yudasi u kha tshimbevha tshawe tsha vhuvhi tsha u ambulula Yesu. Nga zwenezwo, Yudasi u khou ḓadza Maṅwalo a sa zwi ṱhogomeli.

Yesu u bvela phanḓa u rabela: “Shango ḽa vha vhénga. A thi ri: vha bvise shangoni ḽino; tshiné nda humbela ndi uri: vha pilele uri vha si dzhene vhuvhini. Vhone a si vha shango ḽino, vhunga na nṋe ndí si wa shango ḽino.” Vhatevheli vha Yesu vha shangoni, ḽa vhathu vho dzudzanywaho vha vhuswaho nga Sathane, fhedzi vha fanela u dzula vho fhandekana tshoṱhe naḽo na vhuvhi haḽo.

Yesu u a bvela phanḓa: “Vha ite vhakhethwa nga mafhungo-ngoho au; mafhungo au ndi a ngoho.” Hafha Yesu u vhidza Maṅwalo o hevhedzwaho a Luheberu, ane a redza khao zwifhinga zwoṱhe, uri ndi “mafhungo-ngoho.” Fhedzi zwe a funza vhafunziwa vhawe na zwe nga murahu vha zwi ṅwala nga fhasi ha u hevhedzwa sa Maṅwalo a Tshikriste a Lugerika na one ndi “mafhungo-ngoho.” Haya mafhungo-ngoho a nga khetha muthu, a shandula vhutshilo hawe tshoṱhe, nahone a mu ita muthu o fhandekanaho na shango.

Zwino Yesu u a rabela “a thi humbeleli vhone fhedzi, ndi humbelela na vha u ḓo ntenda vhó pfa vhone.” Ngauralo Yesu u rabelela na vhane vha ḓo vha vhatevheli vhawe vho ḓodzwaho na vhaṅwe vhafunziwa vhawe vha tshifhingani tshi ḓaho vhane na vhone vha ḓo kuvhanganywa vha vha “sambi ḽithihi.” Avha vhoṱhe u vha humbelela mini?

“Uri vhoṱhe vha vhe vhathihi, vhunga iwe Khotsi Ú kha nṋe, nṋe nda vha kha iwe, . . . uri vha vhe vhathihi vhunga riṋe rí vhathihi.” Yesu na Khotsi awe a vha muthu muthihi nga lwa thevhedzaipfi, fhedzi vha tendelana kha zwithu zwoṱhe. Yesu u rabela uri vhatevheli vhawe vha ḓiphine nga hovhu vhuthihi vhu fanaho u itela “uri shango ḽi ḓivhe zwauri wo nthuma, na zwauri U vha funa vhunga nṋe U tshi mpfuna.”

A tshi itela vhe vha vha vha tshi ḓo vha vhatevheli vhawe vho ḓodzwaho, zwino Yesu u ita khumbelo kha Khotsi awe wa ṱaḓulu. Ya mini? “Uri huné nṋe nda vha hone, na vhe wa mpha vha vhe henefho na nṋe, uri vha vhone vhugala hanga he wa mpha; ngauri wo mpfuna, shango ḽi sathu u sikwa,” ndi uri, musi Adamu na Eva vha sa athu vha na ṅwana. Kale nga phanḓa ha zwenezwo, Mudzimu o funa Murwa wawe mubebwa e eṱhe, we a vha Yesu Kristo.

A tshi fhedza thabelo yawe, zwino Yesu u dovha a ombedzela uri: “Ndo vha ḓivhadza dzina ḽau, huno ndi ḓo ḓi vha ḓivhadza, uri lufuno lwe wa mpfuna ngalwo’ lu vhe kha vhone, nṋe ndi vhe kha vhone.” Kha vhaapostola, u guda nga ha dzina ḽa Mudzimu zwo katela u ḓivha lufuno lwa Mudzimu nga dzavho. Yohane 14:1–17:26; 13:27, 35, 36; 10:16; Luka 22:3, 4; Ekisodo 24:10; 1 Dzikhosi 19:9-13; Yesaya 6:1-5; Vha-Galata 6:16; Psalme ya 35:19; 69:4; Mirero 8:22, 30.

▪ Yesu u khou ya ngafhi, nahone ndi ifhio phindulo ine Thoma a i wana malugana na nḓila ya henefho?

▪ Nga khumbelo yawe, zwi tou vha khagala uri Filipo u ṱoḓa Yesu a tshi mu sumbedza mini?

▪ Ndi ngani we a vhona Yesu o dovha a vhona na Khotsi?

▪ Vhafunziwa vha Yesu vha ḓo ita mishumo mihulwane u fhira ye a ita nga nḓila-ḓe?

▪ Ndi nga muhumbulo ufhio une Sathane a si kone u langa Yesu?

▪ Yehova o ṱavha lini muṱokola wa pfanyisedzo, nahone vhaṅwe vha vha tshipiḓa tsha muṱokola lini nahone hani?

▪ Mafheleloni, ndi matavhi mangana ane muṱokola wa pfanyisedzo wa vha nao?

▪ Ndi mitshelo ifhio ine Mudzimu a i ṱoḓa kha eneo matavhi?

▪ Ri nga vha hani khonani dza Yesu?

▪ Ndi ngani shango ḽi tshi vhenga vhatevheli vha Yesu?

▪ Ndi ifhio tsevho ya Yesu ine ya khakhisa vhaapostola vhawe?

▪ Ndi ngani vhaapostola vha tshi kundwa u vhudzisa Yesu nga ha hune a khou ya hone?

▪ Ndi zwifhio zwihuluhulu zwe vhaapostola vha kundwa u zwi pfesesa?

▪ Yesu u fanyisa hani uri vhuimo ha vhaapostola vhu ḓo shanduka vhu tshi bva kha vhuṱungu vhu tshi ya kha dakalo?

▪ Yesu u amba uri vhaapostola vhawe vha ḓo ita mini zwenezwino?

▪ Yesu u kunda hani shango?

▪ Yesu o ‘kumedzwa vhathu vhoṱhe’ nga muhumbulo ufhio?

▪ Zwi amba mini u vha na nḓivho ya Mudzimu na Murwa wawe?

▪ Ndi nga nḓila dzifhio dzine ngadzo Yesu a ita uri dzina ḽa Mudzimu ḽi ḓivhiwe?

▪ “Mafhungo-ngoho” ndi mini, nahone a ita hani uri Mukriste a vhe ‘mukhethwa’?

▪ Mudzimu, Murwa wawe, na vharabeli vha ngoho vhoṱhe vha vha hani vhathihi?

▪ Ndi lini he “shango ḽi sathu u sikwa”?