Ndima Ya 34

U Nanga Vhaapostola Vhawe

TSHO vha tshi tshifhinga tshi ṱoḓaho u vha ṅwaha na tshipiḓa tshee Yohane Mulovhedzi a ḓivhadza Yesu sa Ngwana ya Mudzimu nahone Yesu a thoma vhuḓinḓa hawe ha khagala. Nga tshenetsho tshifhinga Andrea, Simoni Petro, Yohane, khamusi na Yakobo (mukomana wa Yohane), khathihi na Filipo na Nathaniele (ane a dovha a vhidzwa Baratholomeo), vho vha vhafunziwa vhawe vha u thoma. Nga u ya ha tshifhinga, vhaṅwe vhanzhi vha ṱanganela navho kha u tevhela Kristo.

Zwino Yesu o ḓiimisela u khetha vhaapostola vhawe. Havha vha ḓo vha khonani dzawe dza tsini-tsini vhane vha ḓo ṋewa ngudo yo khetheaho. Fhedzi musi a sa athu u vha khetha, Yesu u ya thavhani nahone u fhedza vhusiku hoṱhe a tshi khou rabela, khamusi a tshi khou humbela vhuṱali na phaṱutshedzo ya Mudzimu. Musi ḽi tshi tsha, u vhidza vhafunziwa vhawe nahone u nanga vha 12 vhukati havho. Naho zwo ralo, samusi vha tshi bvela phanḓa u vha vhathu vha Yesu, vha kha ḓi vhidzwa vhafunziwa.

Vha rathi vhe Yesu a vha khetha, vho buliwaho afho nṱha, ndi vhone vhe vha vha vhafunziwa vhawe vha u thoma. Mateo, we Yesu a mu vhidza e mushumoni wawe wa u thelisa, na ene u a khethiwa. Vhaṅwe vhaṱanu vhe vha nangiwa ndi Yuda (ane a dovha a vhidzwa Thadeo), Yudasi Iskariote, Simoni wa Kana, Thoma, na Yakobo murwa wa Alifeo. Hoyu Yakobo u dovha a vhidzwa Yakobo Muṱuku, khamusi nga nṱhani ha uri ndi muṱuku nga mbonalo ya muvhili kana ndi muṱuku nga miṅwaha kha munwe muapostola Yakobo.

Zwa zwino vhenevha vha 12 vho vha vhe na Yesu tshifhinga tshilapfu, nahone u a vha ḓivha zwavhuḓi. Zwi re zwone ndi uri vhunzhi havho ndi mashaka awe. Yakobo na mukomana wawe Yohane zwi vhonala uri ndi vhazwala vha Yesu vha u thoma. Nahone zwi vhonala uri Alifeo o vha e mukomana wa Yosefa, khotsi-muunḓi wa Yesu. Ngauralo murwa wa Alifeo, muapostola Yakobo, na ene o vha a tshi ḓo vha muzwala wa Yesu.

Vhukuma, Yesu ha na vhuleme ha u humbula madzina a vhaapostola vhawe. Fhedzi naa ni nga vha humbula? Ee, itani u humbula uri hu na vhavhili vhane vha vhidzwa Simoni, vhavhili vhane vha vhidzwa Yakobo, na vhavhili vhane vha vhidzwa Yudasi, na uri Simoni u na mukomana ane a pfi Andrea, na uri Yakobo u na mukomana ane a pfi Yohane. Heyo ndi nḓila ya u humbula vhaapostola vha malo. Vhaṅwe vhaṋa vha katela na muthelisi (Mateo), we nga murahu a timatima (Thoma), we a vhidzwa e fhasi ha muri (Nathaniele), na khonani yawe Filipo.

Vhaapostola vha fumi na muthihi vha bva Galilea, shango-haya ḽa Yesu. Nathaniele u bva Kana. Filipo, Petro, na Andrea vha bva Betsaida, Petro na Andrea nga murahu vho pfulutshela Kapernaume, hune zwa vhonala uri Mateo o vha a tshi dzula hone. Yakobo na Yohane vho vha vhe kha mushumo wa u rea khovhe nahone zwi vhonala uri na vhone vho vha vha tshi dzula Kapernaume kana tsini naho. Zwi vhonala uri Yudasi Iskariote, we nga murahu a ambulula Yesu, ndi ene muapostola e eṱhe ane a bva Yudea. Marko 3:13-19; Luka 6:12-16.

▪ Ndi vhaapostola vhafhio vhane vha nga vha vho vha vhe mashaka a Yesu?

▪ Vhaapostola vha Yesu ndi vhonnyi, nahone ni nga humbulisa hani madzina avho?

▪ Vhenevho vhaapostola vho vha vha tshi bva mashangoni afhio?