Ndima Ya 57

U Pfela Vhuṱungu vho Tsikeledzeaho

MUSI o no sasaladza Vhafarisei nga masialala avho a u ḓiṱoḓela zwavho, Yesu u a ṱuwa na vhafunziwa vhawe. Murahunyana, ni nga elelwa uri musi a tshi lingedza u ṱuwa navho uri a yo awelanyana o thithiswa nga magogo musi a tshi vha wana. Zwino, e na vhafunziwa vhawe, u ya dzinguni ḽa Tiro na ḽa Sidoni, dzimaela nnzhi u ya thungo ya devhula. Holu zwi vhonala uri ndi lwone lwendo lune Yesu a lu fara na vhafunziwa vhawe u bvela nnḓa ha mikano ya Isiraele.

Musi vho no wana nnḓu ya u dzula khayo, Yesu u a ḓivhadza uri ha ṱoḓi naho e nnyi a tshi ḓivha hune vha vha hone. Naho zwo ralo, naho hu henefha tsimuni ya vha si Vhaisiraele, a ḓi wanala. Musadzi wa Mugerika, we a bebelwa henefha Fenikia ḽa Siria, u a mu wana nahone u thoma u humbela: “Nkhathutshele Murena, murwa-Davida. Ṅwananyana wanga o dzulwa luvhi nga muya muvhi.” Naho zwo ralo, Yesu ha fhinduli.

Mafheleloni, vhafunziwa vhawe vha vhudza Yesu: “Mu vhofholole zwau, ngauri o sala murahu hashu a tshi zhamba.” A tshi ṱalutshedza tshiitisi tsha u sa mu londa, Yesu u ri: “A tho ngo rumiwa huṅwe, arali hú si kha nngu dzo xelaho dza nnḓu ya Isiraele.”

Naho zwo ralo, onoyo musadzi ha neti. U ya ha Yesu nahone a gwadama phanḓa hawe. U a humbela, “Murena, mpfarise!”

Mbilu ya Yesu i fanela u vha yo sudzuluswa zwihulu nga khumbelo ya vhukuma ya onoyo musadzi! Naho zwo ralo, u sumba hafhu kha vhuḓifhinduleli hawe ha u thoma, u shumela vhathu vha Mudzimu vha Isiraele. Naho zwo ralo, khamusi u itela u linga lutendo lwawe, u amba nga ha mavhonele a luvhengelambiluni lwa Vhayuda kha vha dziṅwe dzitshaka, a tshi hanedza: “A zwo ngo fanela muthu a tshi dzhia vhuswa ha vhana a vhu posa dzimbwanana.”

Nga muungo wa ipfi ḽawe ḽi pfelaho vhuṱungu na mbonalo ya tshifhaṱuwo, Yesu o sumbedza zwa vhukuma maḓipfele awe a vhulenda kha vha si Vhayuda. U ita na u leludza u vhambedzwa ha Vhannḓa na dzimmbwa nga u vha vhidza uri ndi “dzimbwanana,” kana zwibwanana. Nṱhani ha u sinyuwa, onoyo musadzi o shumisa eneo maipfi a Yesu a luvhengelambiluni lwa Vhayuda nahone nga u ḓiṱukufhadza u amba hezwi: “Nangoho Murena, huno naho zwi tshi ralo, dzimbwanana dzi ḓi ḽa matshakatshaka ane a wa vhuḽeloni ha vhaṋe vhadzo.”

Yesu u a fhindula: “Hee musadzi, lutendo lwau ndi luhulu! Nga zwi vhe hone zwe wa zwi tama.” Nahone zwa itea! Musi a tshi swika hayani, u wana ṅwananyana wawe kha mmbete, o fhola tshoṱhe.

U bva henefho dzinguni ḽa khunzikhunzi ḽa Sidoni, Yesu na vhafunziwa vhawe vha buḓekanya shango, vho livha tshisimani tsha Mulambo wa Yorodane. Zwi vhonala uri vho pfuka Yorodane huṅwe fhethu nṱha ha Lwanzhe lwa Galilea nahone vha dzhena Miḓini ya Fumi vhubvaḓuvha ha lwonolwo lwanzhe. Henefha vha gonya thavhani, fhedzi magogo a vha wana nahone a ḓisela Yesu vha u ṱudza, zwihole, mabofu, na madzinganḓevhe, na vhanzhi vhane vha lwala nga iṅwe nḓila na vho holefhalaho. Vha vha vhea milenzheni ya Yesu, nahone a vha fhodza. Vhathu vha kanuka, musi vha tshi vhona zwimuma zwi tshi amba, zwihole zwi tshi tshimbila, nahone mabofu a tshi vhona; nahone vha renda Mudzimu wa Isiraele.

Yesu u ṱhogomela nga ho khetheaho muṅwe muthu a re dzinganḓevhe nahone ha koni u amba na kathihi. Madzinganḓevhe kanzhi vha ṱavhanya u shona, zwihuluhulu tshigwadani. Yesu a nga ṱhogomela u tshuwa ho khetheaho ha onoyo munna. Nga zwenezwo Yesu a mu dzhia nga u mu pfela vhuṱungu a bvela nae thungo ha tshigwada. Musi vhe vhoṱhe, Yesu u a sumbedza zwine a khou ṱoḓa u mu ita zwone. U dzhenisa minwe yawe nḓevheni dza onoyo munna, nahone musi o no pfa mare, a kwama lulimi lwawe. Zwenezwo, a tshi khou lilala ṱaḓulu, Yesu u fhihamelwa zwihulu nahone u ri: “Dzivhuluwa!” Nga zwenezwo, nḓevhe dza onoyo munna dza thivhuluwa, nahone u a kona u amba zwavhuḓi.

Musi Yesu o no ita honohu u fhodza hunzhi, magogo a aravha nga u livhuha. A ri: “Zwoṱhe o zwi nakisa, hú madzinga–nḓevhe u a a pfisa, hú zwimuma zwi vhó amba nga ene.” Mateo 15:21-31; Marko 7:24-37.

▪ Ndi ngani Yesu a sa fhodzi nga u ṱavhanya ṅwana wa musadzi wa Mugerika?

▪ Nga murahu, Yesu u isa vhafunziwa vhawe ngafhi?

▪ Yesu u fhodza hani nga u mu pfela vhuṱungu munna wa dzinganḓevhe ane a si kone u amba?