Ndima Ya 25

U Pfela Vhuṱungu wa Mapele

MUSI Yesu na vhafunziwa vhawe vhaṋa vha tshi dalela miḓi ya Galilea, mafhungo nga ha zwithu zwavhuḓi zwine a khou zwi ita a phaḓalala dzinguni ḽoṱhe. Fhungo ḽa mishumo yawe ḽi swika kha muṅwe muḓi une ha vha na munna a re na mapele. Ṅanga Luka u mu ṱalusa sa we a “ḓala mapele.” Musi vhu tshi endelela, hovhu vhulwadze vhu vhulayaho vhu tshinya miraḓo yo fhamba-fhambanaho ya muvhili nga zwiṱuku nga zwiṱuku. Ngauralo hoyu wa mapele u vhuimoni vhu ṱungufhadzaho.

Musi Yesu a tshi swika muḓini wonoyo, onoyo muthu wa mapele u ḓa khae. U ya nga Mulayo wa Mudzimu, wa mapele u fanela u huwelela a tshi sevha, “Dzitshikha! Dzitshikha!” u itela u tsireledza vhaṅwe uri vha si sendele tsini na vhulwadze ha phirela vhu re khombo. Onoyo wa mapele zwino u wa nga tshifhaṱuwo a humbela Yesu a ri: “Murena, arali U tshi funa U nga kona u mphodza!”

Onoyo munna u na lutendo lungafhani kha Yesu! Nga zwenezwo, vhulwadze hawe vhu fanela u vha ho mu ita uri a ṱungufhadze lungafhani! Yesu u ḓo ita mini? No vha ni tshi ḓo ita mini? A tshi sudzuluswa nga u pfela vhuṱungu, Yesu u onyolosa tshanḓa tshawe a fara onoyo munna, a ri: “Ndi a funa, fhola zwau!” Nahone nga u ṱavhanya mapele a mu ṱutshela.

Naa no vha ni tshi ḓo ṱoḓa muṅwe muthu a pfelaho vhuṱungu nga u rali uri a vhe khosi yaṋu? Nḓila ine Yesu a fara ngayo hoyu wa mapele i ri ṋea fulufhelo ḽa uri vhukatini ha vhuvhusi ha Muvhuso Wawe, vhuporofita ha Bivhili vhu ḓo ḓadzea: “U khathutshela vhaṱoma na vhatshinyali, u khudisa mimuya ya vhatshinyali.” Ee, nga tshenetsho tshifhinga Yesu u ḓo ḓadzisa lutamo lwa mbilu yawe lwa u thusa vhoṱhe vha tambulaho.

Na nga phanḓa ha u fhodza onoyo wa mapele, vhuḓinḓa ha Yesu ho vha vhu tshi khou ḓi takadza vhathu nga maanḓa. A tshi ḓadzisa vhuporofita ha Yesaya, Yesu zwino u vhudza onoyo munna o fholaho uri: “U songo vhuya wa vhudza muthu.” Zwenezwo u a mu laedza: “U ṱuwe U yo ḓi-sumbedza tshifhé, U ise zwivhiho zwa vho fholaho zwo laiwaho nga Mushe uri zwi vhe thovhedzo kha vhone.”

Fhedzi onoyo munna o takala nga maanḓa lune a si kone u dzumba honoho vhuṱolo. U a ṱuwa a thoma u phaḓaladza mafhungo hoṱhe, zwi vhonala uri zwi ita dzangalelo na u ṱoḓa u ḓivha kha vhathu vhane Yesu a si kone u ya khavho muḓini. Nga zwenezwo, Yesu u dzula fhethu hu re thungo hu si na muthu, nahone vhathu vhane vha bva thungo dzoṱhe vha ḓa u mu thetshelesa na u fhodzwa malwadze avho. Luka 5:12-16; Marko 1:40-45; Mateo 8:2-4; Levitiko 13:45; 14:10-13; Psalme ya 72:13; Yesaya 42:1, 2.

▪ Ndi mvelelo ifhio ine mapele a nga vha nayo, nahone ndi tsevho ifhio ye wa mapele a vha a tshi fanela u i ṋea?

▪ Wa mapele u humbela hani kha Yesu, nahone ri nga guda mini kha phindulo ya Yesu?

▪ Onoyo munna o fhodzwaho u kundwa hani u thetshelesa Yesu, nahone mvelelo ndi dzifhio?