Ndima Ya 110

U Phethwa ha Vhuḓinḓa Nḓuni Khethwa

YESU u ḓa nḓuni khethwa lwa u fhedza. Zwi re zwone ndi uri u khou fhedzisa vhuḓinḓa hawe ha khagala kha ḽifhasi nga nnḓa ha zwiitea zwa u lingwa na u vhulahwa hawe, zwine zwa ḓo itea nga murahu ha maḓuvha mararu. Zwino u bvela phanḓa na u sasaladza hawe vha maṅwalo na Vhafarisei.

Luraru hafhu u ri: “Khombo, inwi vha maṅwalo na Vhafarisei, vhadzia-u-ḓi-fhura!” Tsha u thoma, u amba khombo khavho ngauri vha kunakisa “kha̗vho na ndilo . . . nga nnḓa fhedzi; nga ngomu dzo ḓala zwa vhuvhava na zwa luḽo.” Ngauralo u a khuthadza: “Ranga u ṱanzwa khavho na ndilo nga ngomu, ndi hone zwó naka na nga nnḓa.”

Lu tevhelaho u amba khombo kha vha maṅwalo na Vhafarisei nga ṅwambo wa u sina na u tshinyala havho ha nga ngomu hune vha lingedza u hu dzumba nga u ḓiita vhakhethwa havho ha nga nnḓa. U ri: “Ni fana na zwalo zwo hulungwaho nga phemba, zwa naka nga nnḓa; ngeno nga ngomu é marambo a vhafu na dzitshikha fhedzi.”

Mafheleloni, u ḓiitisa havho hu vhonala nga u ḓifunela havho u fhaṱela vhaporofita mavhiḓa na u a hulunga u itela u ḓikokodzela ṱhogomelo ya uri vha ita mishumo mivhuya. Naho zwo ralo, samusi Yesu a tshi zwi dzumbulula, ndi “vhana vha vho vhulahaho vhaporofita!” I ngoho, ane a vhuya a bvukulula u ḓiitisa havho u khomboni!

A tshi bvela phanḓa, Yesu u bula maipfi awe a re na maanḓa a u sasaladza. U ri: “Hee inwi maṋowa na maḓána a mavuluvulu! Mulandu wa u ya Muliloni [“Gehenna,” NW] ni ḓo u ponyoka hani?” Gehenna ndi govha ḽine ḽa shumiswa sa ḓale-ḓale ḽa Yerusalema. Ngauralo Yesu u khou amba uri nga u tovhola havho buḓo ḽivhi, vha maṅwalo na Vhafarisei vha ḓo fheliswa tshoṱhe.

Malugana na vhane a vha ruma u itela u vha vhaimeli vhawe, Yesu u ri: “Kha vhenevho vhaṅwe ni ḓo vha vhulaha na vha vhamba. . . . Vhaṅwe ni ḓo vha rwa zwikoloni zwaṋu na vha tovhola na ṱanganya miḓi. Ndi zwone, malofha oṱhe o shululwaho fhasi á si na mulandu a ḓo ḓa kha inwi, u ranga nga malofha a Abele we a vha a si na mulandu u guma nga malofha a Sakaria murwa wa Berikia [we a vha a tshi vhidzwa Yoyada kha Koronika ya Vhuvhili] we na mu vhulaha vhukati ha aletare na nnḓu khethwa. Ngoho ndi a ni vhudza ndi ri: Hezwi zwoṱhe zwi ḓo ḓa kha lushaka holu.”

Nga ṅwambo wa uri Sakaria o sasaladza vharangaphanḓa vha Vhaisiraele, “vho mu itela tshimbevha, vha mu kanḓa nga matombo muṱani wa nnḓu ya Yehova.” Fhedzi, samusi Yesu a tshi dzula o amba, Isiraele ḽi ḓo lifha u shulula haḽo malofha oṱhe eneo a si na mulandu. Vha lifha miṅwahani ya 37 i ḓaho, nga 70 C.E., musi mmbi dza Vharoma dzi tshi fhelisa Yerusalema nahone ha vhulahwa Vhayuda vha fhiraho milioni.

Musi Yesu a tshi amba nga ha hovhu vhuimo vhu ofhisaho, u pfa vhuṱungu. U dovha a ḓivhadza: “Hee Yerusalema, Yerusalema! . . . Ndi ka-ngana ndi tshi ri ndi kuvhanganye vhana vhau sa khuhu i tshi kuvhanganya khukhwana dzayo tsini ha phapha dzayo; iwe wa ro hana. Ni ḓo zwi vhona, nnḓu yaṋu i ḓo ṱutshelwa ya vha shubi.”

Zwenezwo Yesu u a engedza: “A ni tsha ḓo dovha na mbona hu vhuye hu ḓe musi uné na ḓo ri: Hu rendwe a ḓaho nga dzina ḽa Murena!” Ḽeneḽo ḓuvha ḽi ḓo vha nga musi Kristo a tshi dzhena Muvhusoni wawe wa ṱaḓulu nahone vhathu vha tshi mu vhona nga maṱo a lutendo.

Zwino Yesu u ya fhethu hune a nga kona u vhona mbulungelo dza nnḓu khethwa na vhathu vha tshi khou posa tshelede khadzo. Vho pfumaho vha posa mangwende manzhi. Fhedzi zwenezwo hu ḓa tshilikadzi ya mushai nahone ya posa mangwende maṱuku mavhili a ndeme ṱhuku-ṱhuku.

A tshi vhidzela vhafunziwa vhawe tsini, Yesu u ri: “Ngoho, ndi a ni vhudza iyi tshilikadzi ya mutshinyali afha mbulungeloni yo longa zwi fhiraho zwe vhoṱhe vha longa.” Vha fanela u vha vho mangala uri izwi zwi ḓa hani. Ngauralo Yesu u a ṱalutshedza: “Ngauri vhone vho longa vhoṱhe zwe vha ṱusa kha zwo ḓalaho; uyu musadzi ene o bvisa hu sí na tshithu. O longa zwoṱhe zwiné a vha nazwo’, zwiḽiwa zwawe zwoṱhe.” Musi o no amba hezwi zwithu, Yesu u ṱuwa nḓuni khethwa lwa u fhedza.

Vha tshi mangadzwa nga vhuhulwane na u naka ha nnḓu khethwa, muṅwe wa vhafunziwa vhawe u a kanuka: “Mufunzi, edzou vhona matombo aya na kufhaṱele uku.” Vhukuma, hu vhigiwa uri eneo matombo a fhira mithara dza 11 nga vhulapfu, a fhira mithara ṱhanu nga vhuphara, nahone vhunṱha a fhira mithara tharu!

Yesu u a fhindula: “U a i vhona iyi mitsheṱo mingafha? A hu nga sali tombo ḽi re kha tombo; a ḓo phusulwa oṱhe.”

Musi o no amba hezwi, Yesu na vhaapostola vhawe vha pfuka Govha ḽa Kidironi nahone vha gonya Thavha ya Miṱwari. Vhe henefho vha a kona u sedza nnḓu khethwa yo nakaho. Mateo 23:25–24:3; Marko 12:41–13:3; Luka 21:1-6; 2 Koronika 24:20-22.

▪ Yesu u ita mini musi a tshi dala nḓuni khethwa lwa u fhedza?

▪ U ḓiitisa ha vha maṅwalo na Vhafarisei hu vhonala hani?

▪ Hu ambiwa mini musi hu tshi pfi “mulandu wa u ya Muliloni [“Gehenna,” NW]”?

▪ Ndi ngani Yesu a tshi ri tshilikadzi yo bvisa zwinzhi zwi fhiraho zwa vho pfumaho?