Ndima Ya 51

U Ponda Nga Tshimima tsha Ḓuvha ḽa Mabebo

MUSI o no ṋea vhaapostola vhawe dzindaela, Yesu u vha ruma tsimuni nga vhavhili nga vhavhili. Khamusi vhana vha muthu Petro na Andrea vha tshimbila vhoṱhe, na Yakobo na Yohane, Filipo na Baratholomeo, Thoma na Mateo, Yakobo na Thadeo, na Simoni na Yudasi Iskariote. Zwipano zwa rathi zwa vhaevangeli zwi ḓivhadza mafhungo maḓifha a Muvhuso nahone zwi ita vhuṱolo ha u fhodza huṅwe na huṅwe hune zwa ya.

Zwa zwino, Yohane Mulovhedzi u tshee khothoni. U henefho hu ṱoḓaho u vha miṅwaha mivhili zwino. Ni nga kha ḓi elelwa uri Yohane o ḓivhadza khagala uri Herode Antipas o vha o khakha musi a tshi dzhia Herodia, musadzi wa murathu wawe Filipo, a mu ita musadzi wawe. Samusi Herode Antipas o vha a tshi ri u tevhela Mulayo wa Mushe, zwo vha zwo tea uri Yohane a bvukulule vhushaka hawe ha vhupombwe. Ngauralo Herode a ri Yohane a valelwe khothoni, khamusi a tshi kombetshedzwa nga Herodia.

Herode Antipas u ṱhogomela uri Yohane ndi muthu o lugaho nahone u takalela u mu thetshelesa. Nga zwenezwo, ha ḓivhi uri a nga mu ita mini. Herodia, kha ḽiṅwe sia, u vhenga Yohane nahone u ḓi ṱoḓa a tshi vhulahwa. Mafheleloni, ha swika tshifhinga tshe a vha o tshi lindela.

Nga u ṱavhanya nga murahu ha Paseka ya 32 C.E., Herode a ita tshimima tshihulu tsha ḓuvha ḽa mabebo awe. Vho kuvhanganelaho tshimima vho vha vhe dzinduna na vhalangammbi vha Herode vhoṱhe, khathihi na vhakoma vha Galilea. Nga honoho vhusiku, Salome, ṅwananyana muṱuku wa Herodia wa munna wawe wa u thoma Filipo, a dzhena a tshinela vhaeni. Vhanna vho dzulaho tshimimani vha takalela u tshina hawe.

Herode a takadzwa vhukuma nga Salome. A amba a ri: “Nkhumbele tshiné nda ḓo U ṋea.” A ita na u ana a ri: “Tshiné wa ḓo nkhumbela ndi ḓo U ṋea, namusi hu u U fhandulela shango ḽanga nga vhukati.”

A sa athu u fhindula, Salome a ya a vhudzisa mme awe. U a vhudzisa: “Ndi humbele mini?”

Tshibuli tsho vhuya tsha vha hone mafheleloni! Herodia a fhindula nga u ṱavhanya a ri: “Humbela ṱhóho ya Yohane Mulóvhedzi.”

Nga u ṱavhanya Salome a humela ha Herode a mu humbela a ri: “Ndi funa U tshi mpha ṱhóho ya Yohane Mulóvhedzi nga ndilo zwino rí henefha.”

Herode a ṱungufhala zwihulu. Naho zwo ralo nge vhaeni vhawe vha mu pfa a tshi ana, a shona u hana u ita zwenezwo, naho hezwi zwi tshi amba u vhulaha muthu a si na mulandu. Muvhulahi a ṱavhanya a rumiwa khothoni na wonoyo mulaedza u ofhisaho. Nga u ṱavhanya a vhuya na ṱhoho ya Yohane i kha ndilo, nahone a i ṋea Salome. Ene, a i isa-vho ha mme awe. Musi vhafunziwa vha Yohane vha tshi pfa zwe zwa itea, vha ḓa vha dzhia mutumbu wawe nahone vha u vhulunga, nahone vha vhigela Yesu eneo mafhungo.

Nga murahu, musi Herode a tshi pfa nga ha musi Yesu a tshi fhodza vhathu na u pandela mimuya mivhi, u a tshuwa, a tshi ofha uri Yesu ndi Yohane o vuswaho vhafuni. Nga murahu, a tama u vhona Yesu, hu si u pfa a tshi funza, fhedzi u khwaṱhisa arali a tshi khou ofha zwo tea kana hai. Mateo 10:1-5; 11:1; 14:1-12; Marko 6:14-29; Luka 9:7-9.

▪ Ndi ngani Yohane e khothoni, nahone ndi ngani Herode a sa ṱoḓi u mu vhulaha?

▪ Herodia o kona hani u ita uri Yohane mafheleloni a vhulahwe?

▪ Musi Yohane o no fa, ndi ngani Herode a tshi ṱoḓa u vhona Yesu?