Ndima Ya 8

U Ponyoka kha Muvhusi wa Tshiṱuhu

YOSEFA u vusa Maria uri a mu vhudze mafhungo a tshihaḓu. Muruṅwa wa Yehova o vha a tshi kha ḓi tou bva u amba nae, a tshi ri: “Vuwa U dzhie ṅwana na mme-awe, U shavhele Egipita U dzule hone. Tshifhinga tsha u vhuya ndi ḓo U vhudza. Ngauri Herode u ṱoḓa ṅwana a tshi ri a mu vhulahe.”

Nga u ṱavhanya, vhuraru havho vha mbo shavha. Nahone ho vha hu tshi tou vha nga tshifhinga tshone ngauri Herode o vha a tshi vho zwi ḓivha zwa uri vhagudi vha ṋaledzi vho mu fhura nahone vha shavha shangoni ḽeneḽo. Humbulani, vho vha vho fanela u mu ḓivhisa musi vha tshi wana Yesu. Herode u a sinyuwa. Ngauralo a tshi lingedza u vhulaha Yesu, u laedza uri hu vhulahwe vhatukana vhoṱhe vha Betlehema na zwiṱirikini zwawo vha re na miṅwaha mivhili na i re nga fhasi hayo. U thea heyi miṅwaha musi a tshi vhalela nga vhuṱanzi he a vhu wana mathomoni kha vhagudi vha ṋaledzi vha bvaho Vhubvaḓuvha.

U vhulahwa ha vhana vhoṱhe vha vhatukana ndi zwiṅwe zwithu zwi ofhisaho lungafhani u zwi vhona! Mmbi ya Herode i dzhena miḓini yoṱhe. Nahone musi vha tshi wana ṅwana wa mutukana, vha mu dzhavhula zwanḓani zwa mme awe. A ri na vhuṱanzi uri vho vhulaha vhana vhangana, fhedzi tshililo tshihulu na u ṱungufhala ha vhomme hu ḓadza vhuporofita ha Bivhilini nga muporofita wa Mudzimu Yeremia.

Nga tshenetsho tshifhinga, Yosefa na muṱa wawe vho zwi kona u swika Egipita vho londea, nahone zwino vha khou dzula henefho. Fhedzi vhuṅwe vhusiku muruṅwa wa Yehova a amba hafhu na Yosefa muloroni. Muruṅwa u ri: “Takuwa U dzhie ṅwana na mme-awe U ye shangoni ḽa Isiraele, ngauri vhadzia-u-ṱoḓa u vhulaha ṅwana vho fa.” Ngauralo u ḓadza vhuṅwe vhuporofita ha Bivhili vhune ha ri Murwa wa Mudzimu u ḓo bviswa Egipita, muṱa u humela shangohaya ḽahawo.

Vhukuma Yosefa u ṱoḓa u dzula Yudea, he vha vha vha tshi khou dzula hone muḓini wa Betlehema musi vha sa athu u shavhela Egipita. Fhedzi a pfa uri Arikelao murwa muvhi wa Herode, zwino ndi khosi ya Yudea, nahone kha muṅwe muloro Yehova u mu sevhela nga ha yeneyo khombo. Ngauralo Yosefa na muṱa wawe vha fara lwendo lwa u ya devhula nahone vha dzula muḓini wa Nazaretha kha ḽa Galilea. Yesu u alutshela henefha, kule na tshisima tsha vhutshilo ha vhurereli ha Tshiyuda. Mateo 2:13-23; Yeremia 31:15; Hosea 11:1.

▪ Musi vhagudi vha ṋaledzi vha songo tsha vhuya, ndi tshifhio tshithu tshi ofhisaho tshe Khosi Herode a tshi ita, fhedzi Yesu u tsireledzwa hani?

▪ Musi Yosefa a tshi vhuyelela Egipita, ndi ngani a sa dovhi a dzula Betlehema?

▪ Ndi vhuporofita vhufhio ha Bivhili vhune ha khou ḓadzea nga tshenetshi tshifhinga?