Ndima Ya 71

U Sa Tenda Ha Vhafarisei ha Khole

VHABEBI vha we a vha e muhumbeli wa bofu vha a ofha musi vha tshi vhidzelwa phanḓa ha Vhafarisei. Vha a zwi ḓivha uri zwo ambiwa uri naho e nnyi ane a ri u tenda Yesu u ḓo pandelwa zwikoloni. U bviswa ho raloho vhukati ha vhaṅwe zwi nga ḓisa vhuleme vhukuma, zwihuluhulu muṱani u shengelaho. Nga zwenezwo vhabebi vhawe vha fhindula nga vhuṱali.

Vhafarisei vha a vhudzisa: “Naa uyu muthu ndi ṅwana waṋu naa, ané na ri o bebiwa e bofu? Zwino u vhona nga’ni?”

Vhabebi vha tenda: “Riṋe ri ḓivha zwauri uyu ndi ṅwana washu, na zwauri o bebiwa e bofu. Zwiné ri si zwi ḓivhe ndi uri o bonyolowa nga’ni, na o mu bonyolosaho a ri mu ḓivhi.” Vhukuma murwa wavho u fanela u vha o vha vhudza zwe zwa itea, fhedzi nga vhuṱali vhabebi vha ri: “Vhudzisani ene, ndi munna, u a ḓi-ambela.”

Nga zwenezwo, Vhafarisei vha dovha vha vhidza onoyo muthu. Zwino vha mu tshusa nga u mu sumbedza uri vho kuvhanganya vhuṱanzi ha uri Yesu ndi muitazwivhi. Vha mu kombetshedza vha ri: “Ṋea thendo Mudzimu; riṋe ri zwi ḓivha zwauri uyu muthu ndi mu-ita-zwivhi.”

Muthu we a vha e bofu ha hanedzi zwine vha amba, u ri: “Arali e mu-ita-zwivhi, nṋe a thi zwi ḓivhi.” Fhedzi u a engedza: “Tshiné nda ḓivha ngetshi: Ndo vha ndi bofu; zwino ndi a vhona.”

Vha tshi lingedza u wana vhukhakhi kha vhuṱanzi hawe, Vhafarisei vha dovha vha vhudzisa vha ri: “O U ita hani? O U bonyolosa hani maṱo?”

Onoyo muthu u a gungula: “Ndi kha ḓi bva u ni vhudza; naa a no ngo zwi pfa? Ni ṱoḓela’ni u dovha na zwi pfa?” A tshi vha goḓa a vha vhudzisa: “Ni ṱoḓa u vha vhafunziwa vhawe-vho kani?”

Heyi phindulo ya halifhisa Vhafarisei. Vha mu sema vha ri: “Mufunziwa wawe ndi iwe. Riṋe ri vhafunziwa vha Mushe. Riṋe ri ḓivha zwauri Mudzimu o amba na Mushe; huné uyu a bva hone a ri hu ḓivhi.”

A tshi vhonala o mangala, muhumbeli a ḓiṱukufhadzaho a aravha: “Izwo zwi a kanukisa, ní sa ḓivhi huné a bva hone, ngeno ó bonyolosa maṱo anga.” Ndi phetho ifhio ine ya fanela u waniwa kha izwi? Hoyu muhumbeli u amba nga ha mbuno yo ḓoweleaho: “Riṋe ri ḓivha zwauri Mudzimu ha pfi vha-ita-zwivhi, u pfa muthu a mu ofhaho na a itaho zwiné Mudzimu a zwi funa. Tshe shango ḽa sikwa a hu athu u pfala zwauri muthu o bonyolosa maṱo a muthu o bebwaho e bofu.” Nga zwenezwo, phetho i fanela u vha khagala: “Ngavhe uyu muthu á so ngo bva ha Mudzimu, ndi misi a sa koni u shuma tshithu.”

Vhafarisei a vha na phindulo kha ḽeneḽo fhungo ḽo livhaho, na ḽi pfalaho. A vha koni u livhana na ngoho, zwenezwo vha vutshela onoyo muthu: “Iwe wo bebelwa zwivhini tshoṱhe; zwino a nga vha iwe U ri funzaho?” Zwenezwo, vha khurumedzela onoyo muthu nnḓa, zwi tshi tou vha khagala uri vho mu pandela zwikoloni zwavho.

Musi Yesu a tshi pfa zwe vha ita, a wana onoyo muthu a ri: “Murwa wa Mudzimu U a mu tenda naa?”

A tshi fhindula, onoyo we a vha e muhumbeli wa bofu a vhudzisa a ri: “Murena, ndi ufhio uri ndi mu tende?”

Yesu a fhindula a ri: “Wo mu vhona; ndi ané a amba na iwe.”

Nga u ṱavhanya, onoyo munna u gwadama phanḓa ha Yesu a ri: “Murena, ndi a tenda!”

Zwenezwo Yesu a ṱalutshedza: “Nṋe tshe nda ḓela shangoni ḽino ndi u haṱula, uri vha sa vhoniho vha vhone; vha vhonaho vha vhe mabofu.”

Vha tshi pfa zwenezwo, Vhafarisei vhane vha khou thetshelesa vha vhudzisa: “Na riṋe ri mabofu kani?” Arali vha tshi nga tenda uri ndi mabofu nga lwa muhumbulo, vho vha vha tshi ḓo vha na tshiitisi tsha u hanedza Yesu. Samusi Yesu a tshi vha vhudza uri: “Ngavhe ní mabofu ndi misi ní si na zwivhi.” Naho zwo ralo, vha omisa mbilu vha farelela kha ḽa uri a si mabofu na uri a vha ṱoḓi tshedza tsha muya. Zwenezwo Yesu u a ṱhogomela uri: “Hone zwino ni ri: Ri a vhona! Ndi zwiné zwivhi zwaṋu zwa ḓo dzula zwí hone ngazwo’.” Yohane 9:19-41.

▪ Ndi ngani vhabebi vha we a vha e bofu na muhumbeli vha tshi ofha musi vha tshi vhidzwa phanḓa ha Vhafarisei, nahone vha fhindula hani nga vhuṱali?

▪ Vhafarisei vha lingedza hani u tshusa muthu we a vha e bofu?

▪ Ndi nyambedzano ifhio i pfalaho ya onoyo muthu ine ya sinyusa Vhafarisei?

▪ Ndi ngani Vhafarisei vhe si na tshiitisi tsha u hanedza Yesu?