Ndima Ya 27

U Vhidzwa ha Mateo

NGA u ṱavhanya musi o no fhodza o omaho miraḓo, Yesu u bvela nnḓa ha Kapernaume a ya Lwanzheni lwa Galilea. Magogo a vhathu a dovha a ḓa ha ene, nahone u thoma u a funza. A tshi khou ḓi tshimbila, u vhona Mateo, ane a dovha a vhidzwa nga ḽa Levi, o dzula nḓuni ya muthelo. Yesu u a mu ramba, “Ntevhele.”

Zwi vhonala uri Mateo u vho ḓivha pfunzo dza Yesu, samusi zwo vha zwo ralo nga Petro, Andrea, Yakobo, na Yohane musi vha tshi vhidzwa. Nahone u fana navho, nga u ṱavhanya Mateo u aravha kha honoho u rambiwa. U a takuwa, u litsha mishumo yawe sa muthelisi, nahone a tevhela Yesu.

Nga murahu, khamusi a tshi ita vhuṱambo ha u vhidzwa hawe, Mateo u vha na tshimima tshihulu nḓuni yawe. Nga nnḓa ha Yesu na vhafunziwa Vhawe, vhe vha vha vhe khonani dza Mateo vha hone-vho. Havha vhanna nga u tou angaredza vha a nyadziwa nga Vhayuda vhahavho ngauri vha kuvhanganya muthelo vha tshi itela vhavhusi vha Vharoma vha vhengiwaho. Zwiṅwe hafhu, kanzhi vha ṱoḓa nga u sa fulufhedzea tshelede nnzhi kha vhathu u fhira ndinganyo ya muthelo yo vhewaho.

Vha tshi vhona Yesu e tshimimani na vhathu vho raloho, Vhafarisei vha vhudzisa vhafunziwa vhawe: “Mufunzi waṋu ndi mini a tshi ḽa na vha-lutho na vha-ita-zwivhi?” A tshi pfa yeneyo mbudziso, Yesu u fhindula Vhafarisei a ri: “Vho takalaho a vha lili ṅanga, tshayo ndi u lilwa nga vhalwadze. Tshimbilani ni yo ḓi-funza zwiné fhungo ḽa amba ḽa ri: Tshiné nda funa ndi khathutshelo, a si zwiṱhavhelo! ngauri a tho ngo ḓela vho lugaho, ndo ḓa u vhidza vha-ita-zwivhi.”

Zwi vhonala uri Mateo o rambela havha vhathelisi hayani hawe u itela uri vha thetshelese Yesu nahone vha alafhiwe muyani. Ngauralo Yesu u ṱanganela navho u itela u vha thusa uri vha vhe na vhushaka havhuḓi na Mudzimu. Yesu ha nyadzi vho raloho, samusi Vhafarisei vha ḓiitaho vho lugesaho vha tshi ralo. Nṱhani hazwo, zwi re zwone ndi uri a tshi sudzuluswa nga u vha pfela vhuṱungu u shuma sa ṅanga ya muya khavho.

Nga zwenezwo u vha na khathutshelo ha Yesu kha vhaitazwivhi a si u vhuyafhedza zwivhi zwavho, fhedzi ndi musumbedzo wa maḓipfele a lufuno we a u sumbedza kha vha lwalaho ṋamani. Sa tsumbo, humbulani musi nga u pfela vhuṱungu a tshi sendela a kwama we a vha e na mapele, a tshi ri: “Ndi a funa, fhola!” Na riṋe-​vho nga ri sumbedze khathutshelo yo raloho nga u thusa vhathu vha shayaho, zwihuluhulu ri tshi vha thusa nga nḓila ya muya. Mateo 8:3; 9:9-13; Marko 2:13-17; Luka 5:27-32.

▪ Mateo u ngafhi musi a tshi vhonwa nga Yesu?

▪ Mushumo wa Mateo ndi ufhio, nahone ndi ngani vhathu vho raloho vha tshi nyadziwa nga vhaṅwe Vhayuda?

▪ Vhathu vha gungulela Yesu nga uri mini, nahone u aravha hani?

▪ Ndi ngani Yesu a tshi konana na vhaitazwivhi?