Ndima Ya 60

U Vhona Hu Tshee Nga Phanḓa Vhugala ha Muvhuso wa Kristo

YESU u huṅwe fhethu Kesarea Filipi, nahone u khou funza gogo ḽa vhathu ḽine ḽa katela na vhaapostola vhawe. U ita heyi nḓivhadzo i vha nyanyulaho: “Ngoho ndi a ni vhudza ndi ri: Henefha ho ima vhaṅwe vhane vha ḓo vhona Murwa-muthu a tshi bvelela é vhuhosini hawe, vhone vha sathu u thetshela lufu.”

Vhafunziwa vha fanela u vha vho mangala uri ‘Yesu u amba mini?’ Hu ṱoḓaho u vha vhege nga murahu, Yesu a ṱuwa na Petro, Yakobo, na Yohane, vha gonya thavha ndapfu. Hu fanela u vha hu vhusiku, samusi vhafunziwa vha tshi khou kumedza. Musi Yesu a tshi khou rabela, a shandukiswa phanḓa havho. Tshifhaṱuwo tshawe tshi thoma u penya sa ḓuvha, nahone zwiambaro zwawe zwa tshena sa tshedza.

Zwenezwo, ha bvelela vhanna vhavhili, vha vhonala vhe “Mushe na Elia,” vha thoma u amba na Yesu nga ha ‘u ṱuwa u ya u vuledza mushumo wawe Yerusalema.’ U ṱuwa honoho nga hu re khagala ho vha hu tshi ambela kha lufu lwa Yesu na u ḓo vuswa vhafuni nga u ṱavhanya. Nga zwenezwo, heyi khaseledzo i sumbedza uri lufu lwawe lu mu nyadzisaho ndi tshithu tshine a si fanele u tshi iledza, samusi Petro o vha a tshi tama zwi tshi ralo.

Vho no karuwa tshoṱhe zwino, vhafunziwa vhawe vha sedza na u thetshelesa nga ganuko. Naho heḽi ḽi bono, ḽi vhonala ḽi ḽa vhukuma lune Petro a thoma u ṱanganela kha zwine zwa khou itea, a tshi ri: “Ri fhano, ndi havhuḓi. Arali U tshi funa ndi nga fhaṱa thumba tharu fhano, iṅwe ya vha yau, iṅwe ya vha ya Mushe, iṅwe ya vha ya Elia.”

Musi Petro a tshi khou amba, gole ḽi penyaho ḽa vha tiba, ha bva ipfi kha gole ḽi tshi ri: “Hoyu ndi Murwa wanga, ané nda mu funa, ané nda mu takalela; ni mu thetshelese!” Musi vha tshi pfa ipfi ḽeneḽo, vhafunziwa vha wa nga zwifhaṱuwo zwavho. Fhedzi Yesu u ri: “Takuwani, ni songo ofha.” Musi vha tshi ralo, vha si tsha vhona muthu nga nnḓa ha Yesu.

Ḓuvha ḽi tevhelaho musi vha tshi khou tsa thavhani, Yesu u a vha laya: “Ni songo vhudza muthu heḽi bono, ni litshe Murwa-muthu a thome u vuwa vhafuni.” U bvelela ha Elia bononi hu takusa mbudziso mihumbuloni ya vhafunziwa. Vha a vhudzisa: “Vha maṅwalo vha amba mini vha tshi ri: Hu fanela u ranga u ḓa Elia?”

Yesu u ri: “Elia o no ḓa, huno a vho ngo mu ḓivha.” Naho zwo ralo, Yesu u khou amba nga ha Yohane Mulovhedzi, we a ita mushumo u fanaho na wa Elia. Yohane o lugisela Kristo nḓila, samusi Elia o ita nga u ralo a tshi itela Elisa.

Iḽi bono ḽi vhonala ḽi tshi khwaṱhisa lungafhani, kha Yesu khathihi na vhafunziwa vhawe! Ḽeneḽo bono ḽi sumbedza hu tshee nga phanḓa vhugala ha Muvhuso wa Kristo. Zwi re zwone ndi uri vhafunziwa vho vhona “Murwa-muthu a tshi bvelela é vhuhosini hawe,” samusi Yesu o vha o fulufhedzisa nga vhege yo fhiraho. Nga murahu ha lufu lwa Yesu, Petro o ṅwala nga ha musi ‘vha tshi vhona vhuhulu ha Yesu thavhani khethwa.’

Vhafarisei vho humbela Yesu vhuṱolo vhu sumbedzaho uri o vha e ene o fulufhedziswaho Maṅwaloni uri ndi Khosi yo nangiwaho nga Mudzimu. A vho ngo ṋewa vhuṱolo honoho. Kha ḽiṅwe sia, vhafunziwa vha Yesu vha tsini-tsini vha tendelwa uri vha vhone u shandukiswa ha Yesu sa khwaṱhisedzo ya vhuporofita ha Muvhuso. Nga zwenezwo, Petro u ṅwala hezwi nga murahu: “Huno ri na ipfi ḽa vhuporofita ḽo khwaṱhesaho.” Mateo 16:13, 28–17:13; Marko 9:1-13; Luka 9:27-37; 2 Petro 1:16-19.

▪ Vha sa athu u thetshela lufu, vhaṅwe vha vhona hani Kristo e Muvhusoni wawe?

▪ Bononi, ndi mini zwine Mushe na Elia vha amba nga hazwo vhe na Yesu?

▪ Ndi ngani iḽi bono ḽi ḽi thusaho u khwaṱhisa vhafunziwa?