Ndima Ya 131

U Vhonala lwa U Fhedza, na Pentekoste ya 33 C.E.

NGA tshiṅwe tshifhinga Yesu u laedza vhaapostola vhawe vhoṱhe vha 11 uri vha ṱangane nae thavhani ya Galilea. Zwi vhonala uri vhaṅwe vhafunziwa vho vhudziwa nga ha wonoyo muṱangano, nahone hu kuvhangana vhathu vhane vha fhira 500. Ndi buthano ḽi takadzaho lungafhani musi Yesu a tshi bvelela nahone a thoma u vha funza!

Zwiṅwe hafhu, Yesu u ṱalutshedza gogo ḽihulu uri Mudzimu o mu ṋea maanḓa oṱhe ngei ṱaḓulu na kha ḽifhasi. U a ṱuṱuwedza: “Iyani-ha ni ite vhathu vhoṱhe vhafunziwa nga u vha lovhedza dzinani ḽa Khotsi na ḽa Murwa na ḽa Muya-mukhethwa, Ni vha funze u ita zwoṱhe zwe nda ni laya.”

Edzanu u humbula! Vhanna, vhasadzi, na vhana vhoṱhe vha ṋewa heyi ndaela i fanaho ya u ṱanganela kha mushumo wa u ita vhathu vhafunziwa. Vhahanedzi vha ḓo lingedza u thivhela u huwelela na u funza havho, fhedzi Yesu u a vha khuthadza: “Vhonani, ndi na’nwi misi yoṱhe u swika vhufheloni ha ḽifhasi.” Yesu u vha na vhatevheli vhawe nga muyamukhethwa, u vha thusa u ḓadzisa vhuḓinḓa havho.

Yesu u ḓisumbedza kha vhafunziwa vhawe maḓuvha a 40 nga murahu ha mvuwo yawe. Tshifhingani tsha u ḓivhonadza honohu u vha funza nga ha Muvhuso wa Mudzimu, nahone u ombedzela vhuḓifhinduleli havho vhune vha vha naho sa vhafunziwa vhawe. Nga tshiṅwe tshifhinga u ita na u ḓisumbedza na kha murathu wawe Yakobo nahone u fusha onoyu we u thomani a vha a sa tendi uri ndi Ene Kristo zwa vhukuma.

Musi vhaapostola vha kha ḓi vha Galilea, zwi tou pfala uri Yesu u vha laya uri vha vhuyelele Yerusalema. Musi a tshi ṱangana navho henengei, u ri khavho: “Vha songo ṱuwa Yerusalema, a ri: Lindelani zwe Khotsi a ni vhavhalela, zwe na zwi pfa nga nṋe. Ngauri Yohane o lovhedza maḓini, huno inwi ni ḓo lovhedzwa Muyani-mukhethwa hú so ngo fhela maḓuvha manzhi.”

Nga murahu Yesu u ṱangana hafhu na vhaapostola vhawe nahone u vha isa tsini na muḓi wa Bethania, u re tshivhangani tsha vhubvaḓuvha ha Thavha ya Miṱwari. Zwi mangadzaho ndi uri naho hu sa londwi zwithu zwoṱhe zwe a zwi amba malugana na u ṱuwa hawe a tshi ya ṱaḓulu, vha kha ḓi tenda uri Muvhuso wawe u ḓo imiswa kha ḽifhasi. Ngauralo vha a vhudzisa: “Murena, nga itsho tshifhinga U ḓo dovha wa imisa muvhuso wa Isiraele kani?”

Nṱhani ha uri a lingedze u khakhulula u sa pfesesa havho, Yesu u a fhindula: “A si mafhungo aṋu u ḓivha zwifhinga na zwikhathi zwe Khotsi a vhea nga u kona hawe ene muṋe.” Nga zwenezwo, a tshi ombedzela hafhu mushumo une vha fanela u u ita, u ri: “Fhedzi ni ḓo dzhia maanḓa musi Muya-mukhethwa a tshi ḓa kha inwi na vha dziṱhanzi dzanga ngei Yerusalema na kha ḽoṱhe ḽa Yudea na Samaria na swika nga mugumo wa shango.”

Musi vha tshee vho lavhelesa, Yesu u thoma u gonyela ṱaḓulu, nahone zwenezwo gole ḽa mu ṱusa phanḓa ha maṱo avho. Musi o no bvula muvhili wawe wa ṋama, u gonyela ṱaḓulu sa muthu wa muya. Musi vhenevho vha 11 vha tshee vho lavhelesa ṱaḓulu, hu bvelela vhanna vhavhili vhukati havho vho ambara nguvho tshena. Vhenevha vharuṅwa vho ḓishandukisaho vha a vhudzisa: “Vhanna vha Galilea, no imela’ni nó lavhelesa ṱaḓulu? Hoyu Yesu we a dovha a takulelwa ṱaḓulu a tshi bva kha inwi, u ḓo vhuya sa zwenezwi zwe na mu vhona a tshi ṱuwa, a tshi ya ṱaḓulu.”

Nḓila ine Yesu a kha ḓi tou bva u ṱuwa ngayo kha ḽifhasi ndi ye ya si vhonwe nga vhathu vhoṱhe, nahone ndi ye ya vhonwa nga vhatevheli vhawe vha fulufhedzeaho fhedzi. Ngauralo u ḓo vhuya sa zwenezwi​—a sa vhonwi nga vhathu vhoṱhe nahone a tshi vhonwa nga vhatevheli vhawe vha fulufhedzeaho fhedzi vhane vha ṱalukanya uri o no vhuya na uri o no thoma u vha hone maanḓani awe a Muvhuso.

Zwino vhaapostola vha tsa Thavhani ya Miṱwari, vha pfuka Govha ḽa Kidironi, vha dzhena hafhu Yerusalema. Vha dzula henengei vha tshi thetshelesa ndaela ya Yesu. Nga murahu ha maḓuvha a fumi, Vhuṱamboni ha Vhayuda ha Pentekoste ya 33 C.E., musi vhafunziwa vhane vha ṱoḓa u vha 120 vho kuvhangana nḓuni ya nṱha Yerusalema, nga khathihi fhedzi mubvumo u no nga ḓumbu ḽa maanḓa ḽi tshi vhudzula u ḓadza nnḓu yoṱhe. Ndimi dzi ngaho khavhu dza mulilo dzi a vhonala, nahone dzi kavha kha muṅwe na muṅwe wa vhoṱhe vhe vha vha vhe hone nahone vhafunziwa vhoṱhe vha thoma u amba nga ndimi dzo fhamba-fhambanaho. Hohu ndi u shululwa ha muyamukhethwa he Yesu a hu fulufhedzisa! Mateo 28:16-20; Luka 24:49-52; 1 Vha-Korinta 15:5-7; Mishumo 1:3-15; 2:1-4.

▪ Yesu u ṋea vhonnyi ndaela dza u ṱuwa thavhani ya Galilea, nahone ndi dzifhio dzenedzi ndaela?

▪ Ndi khuthadzo ifhio ine Yesu a i ṋea vhafunziwa vhawe, nahone u ḓo vha hani navho?

▪ Yesu u ḓisumbedza tshifhinga tshingafhani kha vhafunziwa vhawe nga murahu ha lufu lwawe, nahone u vha funza mini?

▪ Yesu u ḓisumbedza kha muthu ufhio ane zwa vhonala uri o vha e si mufunziwa musi Yesu a sa athu u fa?

▪ Ndi miṱangano ifhio mivhili ya u fhedza ine Yesu a vha nayo na vhaapostola vhawe, nahone hu bvelela mini nga zwenezwi zwifhinga?

▪ Ndi nga nḓila-ḓe ine Yesu a ḓo vhuya sa zwe a ṱuwisa zwone?

▪ Hu itea mini nga Pentekoste ya 33 C.E.?