Ndima Ya 125

U Vhuṱunguni kha Danda

YESU khathihi na mavemu mavhili vha khou iswa u vhulahwani. Hu si kule na muḓi, muduba u ḓa wa ima fhethu hune ha pfi Golgota, kana Dziṱhohoni dza Vhathu.

Zwivhotshwa zwi a bvulwa nguvho dzazwo. Nga zwenezwo hu lugiselelwa veine yo shelwaho mushonga. Zwi vhonala uri yo lugiswa nga vhafumakadzi vha Yerusalema, nahone Vharoma a vha hani wonoyo mushonga wa u dzimula vhuṱungu u tshi shumiswa nga vhane vha khou vhambiwa. Naho zwo ralo, musi Yesu a tshi u thetshela, u landula u u nwa. Ndi ngani? Zwi tou vha khagala uri ha ṱoḓi zwipfi zwawe zwi tshi dzidzivhadzwa vhukati ha hoyu mulingo muhulwane wa lutendo lwawe.

Zwino Yesu u rambaladzwa kha danda zwanḓa zwawe zwo vhewa nṱha ha ṱhoho yawe. Zwenezwo maswole a a ombela mabigiri kha zwanḓa zwawe na kha ṋayo dzawe. U a tsukunyea nga u pfa vhuṱungu musi zwenezwo zwibigiri zwi tshi phula ṋama na mikala yawe. Musi danda ḽi tshi imiselwa nṱha, vhuṱungu vhu a ṋaṋa vhukuma, ngauri tshileme tsha muvhili tshi ngangamula ntho dzo itwaho nga zwibigiri. Naho zwo ralo, nṱhani ha uri a ofhe, Yesu u rabelela maswole a Vharoma: “Khotsi-anga! Vha hangwele, ngauri a vha ḓivhi tshiné vha ita.”

Pilato o nambatedza luṅwalo kha danda lune lwa vhalea nga u rali: “Yesu wa Nazareta Khosi ya Vha-Yuda.” Zwi vhonala uri o ṅwala hezwi hu si ngauri u ṱhonifha Yesu fhedzi, fhedzi ngauri u vhenga vhotshifhe vha Vhayuda nge vha mu dzhenisa kha mulandu wa u vhulaha Yesu. Ngauralo uri vhoṱhe vha kone u vhala lwonolwo luṅwalo, Pilato o ita uri lu ṅwalwe nga nyambo tharu​—nga Luheberu, nga Lulatini lu re mulayoni, na nga Lugerika lwo ḓoweleaho.

Vhotshifhe vhahulu, u katela na Kayafa na Hanna vha a nyabwa. Hohu u ḓivhadzwa ho tou livhaho hu tshinya tshifhinga tshavho tsha gundo. Ngauralo vha a vhilaela: “U songo ṅwala wa ri: Khosi ya Vha-Yuda! U ri: O amba a ri: ndi khosi ya Vha-Yuda.” O sinyuswa nge a shumiswa u bveledza ndivho dza vhotshifhe, Pilato u a fhindula nga u nyadza huhulwane: “Zwe nda ṅwala ndo ṅwala.”

Vhotshifhe, khathihi na gogo ḽihulu, zwino vha kuvhangana fhethu ha u vhulahela, nahone vhotshifhe vha sasaladza vhuṱanzi ha lwonolwo luṅwalo. Vha a dovholola vhuṱanzi ha mazwifhi he ha ambiwa mathomoni tsengoni ya Magota. Nga zwenezwo, zwi sa mangadzi, vhafhiri vha gondo vha a thoma u mu sema, vha tshi dzungudza dziṱhoho dzavho vha tshi mu goḓa nahone vha tshi ri: “Iwe mudzia-u-ri: ndi ḓo thutha nnḓu khethwa, nda i fhaṱa nga maḓuvha mararu! Ḓi-tshidze, arali U Murwa wa Mudzimu! Itsá afho [“kha danda ḽa tshengedzo,” NW]!”

Vhotshifhe vhahulu na khonani dzavho dza zwa vhurereli vha dzhenelela nga uri: “Vhaṅwe o vha a tshi vha tshidza, u ḓi-tshidza u a kundwa. Arali e ene khosi ya Isiraele, nga a tse zwino [“kha danda ḽa tshengedzo,” NW] ndi hone ri tshi ḓo mu tenda. O vha a tshi fulufhela Mudzimu; nga a mu tshidze-ha zwino arali a tshi mu funa; ngauri o amba a ri: Ndi Murwa wa Mudzimu!”

Vhe kha muya wonoyo, maswole na one a khou tamba nga Yesu. Vha tshi mu goḓa vha mu fha mukumbi wo vhilaho, zwi vhonala uri vha u farela tsini ha mulomo wawe wo omaho nga ḓora. Vha a goḓa: “Arali Ú khosi ya Vha-Yuda, ḓi-tshidze.” Na mavemu​—ḽiṅwe ḽo vhambiwaho kha tshanḓa tsha u ḽa tsha Yesu, na ḽiṅwe kha tshanḓa tshawe tsha monde—​vha mu goḓa. Edzanu u humbula! Muthu wa bvumo we a vhuya a tshila, ee, we a ṱanganela kha u sika zwithu zwoṱhe na Yehova Mudzimu, u khetha u tambudzwa honohu hoṱhe!

Maswole vha dzhia nguvho dza Yesu dza nga nnḓa nahone vha dzi kherukanya dza vha mikovhe miṋa. Vha a ita madeṅwa uri vha vhone uri dzi ḓo vha dza nnyi. Naho zwo ralo, khanzu ya nga ngomu, ndi i si na murungo, ine ya vha ya vhuimo ha nṱha. Ngauralo maswole vha amba nga tshavho vha ri: “Ri songo i kherula; nga ri ite madeṅwa, ri vhone ané ya ḓo vha yawe.” Nga zwenezwo, vha sa zwi limuwi, vha ḓadzisa luṅwalo lune lwa ri: “Vha kovhekana nguvho dzanga; khanzu yanga vha i itela madeṅwa!”

Nga u ya ha tshifhinga, muṅwe wa mavemu u thoma u pfesesa uri i ngoho Yesu ndi khosi. Nga zwenezwo, a tshi sema khonani yawe, u ri: “Atsina na iwe a U ofhi Mudzimu, ngeno Ú khomboni nthihi na ene. Á vha riṋe zwo ri fanela; ngauri ri itwa zwe ra ḓi-ṱoḓela nga mishumo yashu. Hone uyu ha na tshe a tshinya.” Zwenezwo u amba na Yesu, a tshi humbela uri: “U ṋyelelwe U tshi swika muvhusoni wau.”

Yesu u a fhindula: “Ngoho, ndi a U vhudza ṋamusi, U ḓo vha na nṋe paradisoni.” Heḽi fulufhedziso ḽi ḓo ḓadzea musi Yesu a tshi vhusa sa Khosi ṱaḓulu na u vusela vhutshiloni onoyo muitazwivhi o rembuluwaho kha ḽifhasi ḽa Paradiso ḽine vhaponyoki vha Haramagedo na khonani dzavho vha ḓo vha na ndugelo ya u ḽi lima. Mateo 27:33-44; Marko 15:22-32; Luka 23:27, 32-43; Yohane 19:17-24.

▪ Ndi ngani Yesu a tshi hana u nwa veine yo shelwaho mushonga?

▪ Zwi vhonala uri ndi ngani hu na luṅwalo kha danda ḽa Yesu, nahone lu vusa nyambedzano ifhio vhukati ha Pilato na vhotshifhe vhahulu?

▪ Ndi u tambudzwa hufhio huṅwe hune Yesu a hu wana kha danda, nahone ndi mini zwine zwa vhonala zwi zwone zwe zwa hu ṱuṱuwedza?

▪ Vhuporofita vhu ḓadzea hani kha zwine zwa itwa nga nguvho dza Yesu?

▪ Ndi tshanduko ifhio ine muṅwe wa mavemu a i ita, nahone Yesu u ḓo ḓadza hani khumbelo yawe?