Ndima Ya 28

U Vhudziswa Nga Ha U Ḓidzima

HU ṰOḒAHO u vha ṅwaha wo no fhira u bva tshee Yesu a ya Pasekani ya 30 C.E. Zwa zwino, Yohane Mulovhedzi o vhoxwa miṅwedzi yo no vhalaho. Naho o vha a tshi ṱoḓa uri vhafunziwa vhawe vha vhe vhatevheli vha Kristo, a si vhoṱhe vhe vha ralo.

Zwino vhaṅwe vha havha vhafunziwa vha Yohane o vhoxwaho vha ḓa ha Yesu vha vhudzisa: “Huufha riṋe na Vhafarisei ri tshi ḓi-dzima zwiḽiwa ka-nzhi; vhafunziwa vhau ndi mini vha tshi litsha u ḓi-dzima?” Vhafarisei vha ḓidzima luvhili nga vhege sa mukhuvha wa vhurereli havho. Nahone khamusi vhafunziwa vha Yohane vha tevhela wonoyo mukhuvha. Hu nga kha ḓi vha hu uri vha khou ḓidzimela u lilela u vhoxwa ha Yohane nahone vha mangadzwa nga uri ndi ngani vhafunziwa vha Yesu vha sa ṱanganeli navho kha hoyu musumbedzo wa u ṱungufhala.

A tshi fhindula Yesu u a ṱalutshedza: “Khonani dza muhwe dzi nga lila hani muhwe á kha ḓi vha navho’? A kha ḓi ḓo ḓa maḓuvha ané muhwe a ḓo ṱuswa kha vhone; ndi hone vha tshi ḓo ḓi-dzima.”

Vhafunziwa vha Yohane vha fanela u elelwa uri Yohane nga dzawe o amba nga ha Yesu sa Muhwe. Ngauralo musi Yesu a tshee hone, Yohane ha nga ḓo zwi dzhia zwo fanela u ḓidzima, na vhafunziwa vha Yesu nga hu fanaho. Nga murahu, musi Yesu a tshi fa, vhafunziwa vhawe vha a lila na u ḓidzima. Fhedzi musi a tshi vuswa vhafuni na musi a tshi ya ṱaḓulu, a vha tshee na tshiitisi tsha u ḓidzima vha tshi lila.

Lu tevhelaho, Yesu u amba hetshi tshifanyiso: “A huna muthu ane a rungela tshinamo tsha ṅwenda muswa kha nguvho ndala. Tshinamo itsho tshi nga ḓo namuwa tshoṱhe tsha hudza buli kha nguvho. Na hone, a huna muthu ane a fhonḓela tuvhu kha nnkho yo ṱahalaho. Á ralo, nnkho i ḓo afhuwa, tuvhu ḽa shuluwa, ha pwashea na nnkho. Tuvhu ḽi fhonḓelwa kha nnkho ntswa.” Izwi zwifanyiso zwi tshimbidzana hani na u ḓidzima?

Yesu o vha a tshi khou thusa vhafunziwa vha Yohane Mulovhedzi u pfesesa uri hu songo vhuya ha vha na muthihi ane a lavhelela vhatevheli vhawe u tendelana na zwiito zwa kale zwa Vhuyuda, zwi ngaho mukhwa wa u ḓidzima. Ho ngo ḓa u nama na u engedza maitele a kale o ṱahalaho a vhurereli e a vha o fanelwa nga u laṱiwa. Vhukriste ho vha vhu sa nga ḓo itwa uri vhu tendelane na Vhuyuda ha tshenetsho tshifhinga na masialala aho a vhathu. Hai, ho vha vhu sa nga ḓo nga sa tshinamo tshiswa kha nguvho ndala kana tuvhu ḽiswa kha nnkho ya kale. Mateo 9:14-17; Marko 2:18-22; Luka 5:33-39; Yohane 3:27-29.

▪ Ndi vhonnyi vhane vha ḓidzima, nahone vha tshi itela mini?

▪ Ndi ngani vhafunziwa vha Yesu vha sa ḓidzimi musi a tshee navho, nahone nga murahu tshiitisi tsha u ḓidzima tshi ḓo ṱavhanya u fhela nga nḓila-ḓe?

▪ Ndi zwifanyiso zwifhio zwine Yesu a zwi anetshela, nahone zwi amba mini?