Ndima Ya 26

U Vhuyelela Hayani Kapernaume

ZWA zwino bvumo ḽa Yesu ḽo vha ḽo no phaḓalala hoṱhe-hoṱhe, nahone vhathu vhanzhi vho tshimbila vha tshi bva mivhunduni ya kule vha tshi ya hune a dzula hone. Naho zwo ralo, nga murahu ha maḓuvha a si gathi, u vhuyelela Kapernaume nga Lwanzheni lwa Galilea. Nga u ṱavhanya fhungo ḽa phaḓalala na muḓi woṱhe uri o vhuya hayani, nahone vhanzhi vha ḓa nḓuni ine a vha khayo. Vhafarisei na vhafunzi vha Mulayo vha ḓa vha tshi bva kule u swika nga Yerusalema.

Gogo ndi ḽihulu lune ḽa thivha na muṋango wa nnḓu, nahone a hu na na nḓila ine muṅwe a nga dzhena ngomu nḓuni ngayo. Hetshi tshiitea tsho dzudzanyiwa uri tshi vhe tsho swayeaho vhukuma. Zwine zwa khou bvelela nga hetshi tshifhinga ndi zwa ndeme vhukuma, ngauri zwi ri thusa uri ri pfesese uri Yesu u na maanḓa a u fhelisa tshiitisi tsha u tambula ha muthu na u vhuyedzedza mutakalo kha vhoṱhe vhane a vha nanga.

Musi Yesu a tshi khou funza ḽeneḽo gogo, vhanna vhaṋa vha ḓisa nga vhulalo muthu o omaho miraḓo henefho nḓuni. Vha ṱoḓa Yesu a tshi fhodza khonani yavho, fhedzi nga ṅwambo wa gogo, a vha koni u dzhena nga ngomu. Zwi nyabwisa lungafhani! Naho zwo ralo a vha humi. Vha gonya nṱha ha ṱhanga yo itaho tswititi, vha phula buli khayo, nahone vha tsitsela vhulalo vhu re na muthu o omaho miraḓo fhasi tsini ha Yesu.

Naa Yesu o sinyuwa nge a thithiswa? Na kathihi! Nṱhani hazwo, u kwamea vhukuma nga lutendo lwavho. A ri kha o omaho miraḓo: “Wo hangwelwa zwivhi zwau.” Fhedzi naa vhukuma Yesu a nga hangwela zwivhi? Vha maṅwalo na Vhafarisei a vha humbuli nga u ralo. Vha elekanya mbiluni dzavho vha ri: “Muthu uyu u amba zwithu-ḓe? U sema Mudzimu. Ndi nnyi a konaho u hangwela zwivhi, arali e si Mudzimu fhedzi?”

Yesu a tshi ḓivha mihumbulo yavho, u amba navho a ri: “Ni elekanya’ni zwithu izwo mbiluni dzaṋu? Tshi sa konḓiho ndi tshifhio: kana ndi u vhudza muthu uyo o omaho miraḓo wa ri: Wo hangwelwa zwivhi zwau! Kana ndi uri: Vuwa U hwale vhulalo hau U tshimbile?”

Zwenezwo, Yesu u tendela gogo ḽa vhathu, u katela na vhasasaladzi vhawe, vha tshi vhona musumbedzo u swayeaho une wa ḓo dzumbulula uri u na maanḓa a u hangwela zwivhi kha ḽifhasi na uri i ngoho ndi muthu a re na bvumo we a vhuya a vha hone. A vhudza muthu uyo o omaho miraḓo a ri: “Vuwa, u hwale vhulalo hau, U ye hayani hau.” A mbo ḓi vuwa na zwenezwo, a tshimbila na vhulalo hawe vhoṱhe vha tshi zwi vhona! Vha tshenuwa vhoṱhe, vha renda Mudzimu vha ri: “Zwauralo a ri a thu u zwi vhona”!

Naa no zwi ṱhogomela uri Yesu u bula zwivhi a tshi zwi ṱumanya na vhulwadze na uri u hangwelwa ha zwivhi hu tshimbidzana na u wana mutakalo wa ṋama? Bivhili i ṱalutshedza uri mubebi washu wa u thoma, Adamu, o tshinya na uri riṋe roṱhe ro mamela mvelelo dza hetshi tshivhi, dzine dza vha vhulwadze na lufu. Fhedzi nga fhasi ha vhuvhusi ha Muvhuso wa Mudzimu, Yesu u ḓo hangwela zwivhi zwa vhoṱhe vhane vha funa Mudzimu na u Mu shumela, nahone zwenezwo malwadze oṱhe a ḓo fheliswa. Zwi ḓo vha zwi takadzaho lungafhani! Marko 2:1-12; Luka 5:17-26; Mateo 9:1-8; Vha-Roma 5:12, 17-19.

▪ Itshi tshiitea tshi swayeaho tsho itea ngafhi?

▪ Muthu o omaho miraḓo o swika hani ha Yesu?

▪ Ndi ngani roṱhe ri na tshivhi, fhedzi Yesu o fha hani fulufhelo ḽa uri u hangwelwa ha zwivhi zwashu na mutakalo wo fhelelaho zwi a konadzea?