Ndima Ya 106

Vha Bvukululwa nga Zwifanyiso zwa Tsimu ya Miṱokola

YESU u thembeleni. U kha ḓi tou bva u hanedza vharangaphanḓa vha vhurereli vhe vha vha vha tshi ṱoḓa u ḓivha uri ndi maanḓa-ḓe ane a shuma ngao. Musi vha sa athu u dzivhuluwa kha u ḓaḓa havho, Yesu u a vhudzisa: “Ipfani-ha ḽanga ni mphindule.” Nga zwenezwo, nga u shumisa tshifanyiso, u vha sumbedza mufuda wa vhathu une vha vha wone.

Yesu u a anetshela: “Muṅwe muthu o vha e na vharwa vhavhili; a vhudza we a thoma ngae’ a ri: Ṅwana-nga, tshimbila U yo shuma tsimuni yanga ṋamusi. Ene a fhindula a ri: A thi funi! Ngavhuya a ḓi-sola a ya. Uḽa munna a amba na murwa wa vhuvhili a mu ruma. Uyo a ri: Nṋe ndi a ya, Muṋe wanga! hone a si ye.” Yesu u a vhudzisa: “Kha vhavhili avha o itaho zwi funwaho nga khotsi-avho ndi ufhio?”

Vhahanedzi vhawe vha a fhindula: “Ndi uḽa we a thoma ngae’.”

Ngauralo Yesu u a ṱalutshedza: “Vha-lutho na dziphombwe vha ḓo ni sia vha dzhena muvhusoni wa ṱaḓulu.” Zwihuluhulu, vha-lutho na dziphombwe, mathomoni vho hana u shumela Mudzimu. Fhedzi nga tshenetsho tshifhinga, u fana na ṅwana wa u thoma, vho rembuluwa vha mu shumela. Kha ḽiṅwe sia, vharangaphanḓa vha vhurereli, u fana na ṅwana wa vhuvhili, vha ḓiamba uri vha shumela Mudzimu, naho zwo ralo, samusi Yesu a tshi ṱhogomela: “Yohane [Mulovhedzi] o ḓa ha inwi a ni funza nḓila ya u luga, inwi ni si mu tende, a tendwa nga vha-lutho na nga dziphombwe. Na nga matshelo, nó no zwi vhona, no ḓi litsha u ḓi-sola na u mu tenda.”

Yesu lu tevhelaho u sumbedza uri u kundwa ha vhenevho vharangaphanḓa vha vhurereli a hu sokou vha u litshelela u shumela Mudzimu. Hai, fhedzi ndi vhathu vhavhi zwa vhukuma. Yesu u a anetshela: “Muṅwe muthu, muṋe wa muṱa, o vha o lima tsimu yawe, a i vhiela nga luhura, a fhaṱa ḓingo, a i kumedza vhalimi, ene a fara lwendo. Musi tshifhinga tsha u kaṋa tshó swika, a ruma vhaḓinḓa vhawe uri vha yo dzhia misumo yawe ha vhalimi. Vhalimi vhone vha fara vhaḓinḓa vhawe, muṅwe vha mu rwa, muṅwe vha mu vhulaha, muṅwe vha mu kanḓa nga matombo. A dovha a ruma vhaṅwe vhaḓinḓa vha fhiraho vhaḽa vha u thoma, vha vha ita zwenezwo-vho.”

“Vhaḓinḓa” ndi vhaporofita vhe “muṋe wa muṱa,” Yehova Mudzimu, a vha ruma kha “vhalimi” vha “tsimu” yawe. Havha vhalimi ndi vhaimeleli vha rangaho phanḓa vha lushaka lwa Isiraele, lushaka lune Bivhili ya lu ṱalusa sa “tsimu” ya Mudzimu.

Samusi “vhalimi” vha tshi fara luvhi na u vhulaha “vhaḓinḓa,” Yesu u a ṱalutshedza: “[Muṋe wa tsimu] a kona u ruma murwa wawe a ri: Murwa wanga vha ḓo mu ofha. Vhalimi vha tshi vhona murwa vha amba nga tshavho vha ri: Uyu ndi ene mu-ḽa-ifa; nḓarieni ri mu vhulahe; ndi hone ifa ḽi tshi ḓo ḽiwa nga riṋe. Vha mu fara, vha mu khurumedzela nnḓa ha tsimu, vha mu vhulaha.”

Zwino, a tshi khou amba na vharangaphanḓa vha vhurereli, Yesu u a vhudzisa: “Zwino hu tshi ḓo ḓa muṋe wa tsimu, vhaḽa vhalimi u ḓo vha ita’ni?”

Vharangaphanḓa vha vhurereli vha a fhindula: “Avho vhavhi u ḓo vha vhulaha luvhi, a kumedza tsimu vhaṅwe vhalimi, vha u ḓo mu ṋea misumo nga tshifhinga tshayo.”

Nga zwenezwo vha ḓihaṱula vha sa zwi ṱhogomeli, samusi vha tshi katelwa vhukati ha “vhalimi” vha Vhaisiraele vha “tsimu” ya lushaka lwa Yehova lwa Isiraele. Mitshelo ine Yehova a i lavhelela kha vhenevho vhalimi ndi u tenda kha Murwa wawe, Messia wa ngoho. Nga u kundwa havho u bveledza yeneyo mitshelo, Yesu u a sevha: “Ni nga a ni athu u vhala kha maṅwalo [kha Psalme ya 118:22, 23] he ha pfi: Tombo ḽi-nyadzwa-nga-vhafhaṱi ḽo vha thikho ya mutsheṱo; hezwo zwo itwa nga Murena; ndi bono ḽa maṱo ashu! Ndi zwiné nda ni vhudza nda ri: Ni ḓo dzhielwa muvhuso wa Mudzimu, wa ṋewa lwonolwo lushaka lune lwa ḓo bveledza misumo yawo. A welaho kha ḽiḽa tombo, u ḓo pwashekana; ané ḽa mu wela, ḽi ḓo mu suka.”

Vha maṅwalo na vhotshifhe vhahulwane zwino vha ṱhogomela uri Yesu u khou amba ngavho, nahone vha ṱoḓa u mu vhulaha, “mu-ḽa-ifa” o fanelaho. Ngauralo vha ḓo dzhielwa ndugelo ya u vha vhavhusi Muvhusoni wa Mudzimu sa lushaka, nahone lushaka luswa lwa ‘vhalimi vha tsimu’ lu ḓo thomiwa, lune lwa ḓo bveledza mitshelo yo fanelaho.

Ngauri vharangaphanḓa vha vhurereli vha ofha mavhuthu, ane a dzhia Yesu sa muporofita, a vha lingedzi u mu vhulaha nga hetshi tshifhinga. Mateo 21:28-46; Marko 12:1-12; Luka 20:9-19; Yesaya 5:1-7.

▪ Vhana vhavhili vha tshifanyisoni tsha Yesu tsha u thoma vha imela vhonnyi?

▪ Kha tshifanyiso tsha vhuvhili, ndi vhonnyi vha imelwaho nga “muṋe wa muṱa,” “tsimu,” “vhalimi,” “vhaḓinḓa,” na “mu-ḽa-ifa”?

▪ Hu ḓo itea mini nga ‘vhalimi vha tsimu,’ nahone vha ḓo dzhielwa vhudzulo nga vhonnyi?