Ndima Ya 39

Vha Ḓihudzaho na Vha Ḓiṱukufhadzaho

MUSI o no khoḓa Yohane Mulovhedzi, Yesu u amba nga ha vhathu vho mu tangaho vha ḓihudzaho, vhane vha si ime kha fhungo ḽithihi. U a ḓivhadza: “Lushaka ulu . . . Lu fana na vhana vho dzulaho khoroni vha tshi vhidzelelana vha ri: Ro ni lidzela dziṋanga, na hana u tshina; ro lila, na hana u ri lilisa.”

Yesu u amba mini? U a ṱalutshedza: “Yohane o ḓa, a ḓi-dzima zwa u ḽa na zwa u nwa; vha mu amba vha ri: U na muya muvhi. Murwa-muthu a ḓa, a ḽa, a nwa; vha mu amba vha ri: Vhonani muthu wa u ḽésa na mudzia-u-nwa, khonani ya vha-lutho na vha-ita-zwivhi.”

Zwi a konḓa u takadza vhathu. A hu na tshine tsha vha takadza. Yohane o vha a tshi tshila matshilele a songo serekanaho a u ḓidzima maṅwe madzanga sa Munazareta, a tshi tendelana na zwe muruṅwa a amba a tshi ri, “veine na zwo vhilaho ha nga nwi.” Nahone naho zwo ralo vhathu vha ri u na muya muvhi. Kha ḽiṅwe sia, Yesu u tshila sa vhaṅwe vhanna, hu si nga nḓila ya u ḓidzima zwithu, nahone u soliwa uri o fhirisa mpimo.

Avha vhathu zwi konḓa lungafhani u vha takadza! Vha nga vhana, vhane vhaṅwe vhavho vha hana u tshina musi vhaṅwe vhana vha tshi vha lidzela mbila kana u lila musi vhaṅwe ngavho vha tshi lila. Naho zwo ralo, Yesu u ri: “Vhuṱali vhu vhonala nga vhana vhaho.” Ee, vhuṱanzi​—mishumo—​vhu ita zwa pfala uri u soliwa hu itelwaho Yohane na Yesu ndi ha mazwifhi.

Yesu u bvela phanḓa u vhetshela thungo miḓi miraru u itela u i sola ine ya vha Xoratsima, Betsaida, na Kapernaume, he a ita vhunzhi ha mishumo yawe ya maanḓa. Arali o vha o ita mishumo yo raloho mashangoni a Fenikia a Tiro na Sidoni, Yesu u ri, heyi miḓi yo vha i tshi ḓo rembuluwa yo ambara madzadza yo dzula milorani. A tshi haṱula Kapernaume, he ha vha hu hayani hawe tshifhingani tsha vhuḓinḓa hawe, Yesu u a ḓivhadza: “Nga ḓuvha ḽa khaṱhulo iwe​—zwine zwa ḓo vhonwa nga shango ḽa Sodoma zwi ḓo vha khwine kha zwau.”

Lu tevhelaho Yesu u renda Khotsi awe wa ṱaḓulu khagala. U sudzuluswa u ita nga u ralo ngauri Mudzimu u dzumbela mafhungo-ngoho avhuḓi vho thanyaho na vho ṱalifhaho, fhedzi u dzumbululela hezwi zwithu zwi mangadzaho vha ḓiṱukufhadzaho, vhane vha nga vhana.

Mafheleloni, Yesu u vha ramba nga u tou vha humbela: “Iḓani ha nṋe noṱhe no netaho, no lemelwaho; nṋe ndi ḓo ni awedza. Ḓi-hweseni dzhogo yanga, ni funzwe nga nṋe; ngauri ndo vuḓa, ndi mudzia-u-ḓi-ṱukufhadza mbiluni; ndi hone dzimbilu dzaṋu dzi tshi ḓo rula. Ngauri dzhogo yanga a i gogoni, muhwalo wanga u a leluwa.”

Yesu u homolosa hani? U ita nga u ralo nga u vhofholola kha vhupuli ha masialala e vharangaphanḓa vha vhurereli vha lemedza vhathu ngao, sa tsumbo, u katela na u vhulunga ndaela dza Sabatha. U dovha a sumbedza nḓila ya u vhofholowa kha vhane vha lemedzwa nga maanḓa a vhuvhusi ha politiki na kha vhane vha lemedzwa nga zwivhi zwavho nga luvalo lwo vhaisalaho. U dzumbululela vhenevho vho tsikeledzeaho uri zwivhi zwavho zwi nga hangwelwa nga nḓila ifhio na uri vha nga ḓiphina hani nga vhushaka havhuḓi na Mudzimu.

Dzhogo i sa gogoni ine Yesu a i ṋea ndi ya u ḓiṋekedza tshoṱhe kha Mudzimu, ri tshi kona u shumela Khotsi ashu wa ṱaḓulu a pfelaho vhuṱungu na wa khathutshelo. Nahone muhwalo u sa lemeli une Yesu a u ṋea vhane vha ḓa khae ndi wa u thetshelesa ṱhoḓea dza vhutshilo dza Mudzimu, dzine dza vha ndaela Dzawe dzo ṅwaliwaho Bivhilini. Nahone u i thetshelesa a zwi konḓi na zwiṱukuṱuku. Mateo 11:16-30; Luka 1:15; 7:31-35; 1 Yohane 5:3.

▪ Vhathu vha ḓikukumusaho, vhane vha si ime kha fhungo ḽithihi vha misini ya Yesu vha nga vhana nga nḓila-ḓe?

▪ Ndi ngani Yesu a tshi sudzulusea u renda Khotsi awe wa ṱaḓulu?

▪ Ndi nga nḓila dzifhio dzine vhathu vha vha vho tsikeledzeaho ngadzo, nahone ndi tshihomolosi tshifhio tshine Yesu a vha ṋea tshone?