Ndima Ya 108

Vha Kundwa u Fasha Yesu

NGAURI Yesu o vha a tshi khou funza thembeleni nahone u kha ḓi bva u vhudza maswina awe a vhurereli zwifanyiso zwiraru zwe zwa bvukulula vhuvhi havho, Vhafarisei vho sinyuwa nahone vha ṱoḓa u mu fasha nga u amba tshiṅwe tshithu tshine tsha nga ita uri a fariwe. Vha langana nahone vha ruma vhafunziwa vhavho, khathihi na vhatevheli vha Herode, uri vha mu fashe.

Vhenevha vhanna vha ri: “Mufunzi, ri a zwi ḓivha zwauri a U zwifhi, na uri U funza vhathu nḓila ya Mudzimu nga-ngoho, na uri a U londi muthu, ngauri a U lavhelesi tshifhaṱuwo tsha vhathu. Ri vhudze-ha, iwe U ri mini, ndi zwone naa khosi ri tshi i ṋea lutho, kana a si zwone?”

Yesu ha fhuriwi nga muhoyo. U ṱhogomela uri arali a fhindula a ri, ‘Hai, a zwiho mulayoni kana a zwo ngo tea ni tshi bvisa hoyu muthelo,’ u ḓo vha na mulandu wa u vutshela Roma. Naho zwo ralo, arali a ri, ‘Ee, ni fanela u bvisa hoyu muthelo,’ Vhayuda, vhane vha si ṱoḓe u vhuswa nga Roma, vha ḓo mu vhenga. Ngauralo u a fhindula: “Naa ni ndingela’ni, vhadzia-tshimbevha-ḓinwi! Ntsumbedzeni mali ya lutho!”

Musi vha tshi mu ṋea, u a vhudzisa: “Naa itshi tshifanyiso na luṅwalo ndi zwa nnyi?”

Vha a fhindula: “Ndi zwa khosi.”

“Khosi i ṋeeni-ha zwi re zwa khosi, Mudzimu ni mu ṋee zwi re zwa Mudzimu!” Ee, musi vhenevha vhanna vha tshi pfa phindulo ya Yesu ya vhuṱali, vha mangala. Nahone vha ṱuwa vha mu sia e eṱhe.

Vha tshi vhona u kundwa ha Vhafarisei u wana tshiṅwe tshithu kha Yesu, Vhasadukei, vhane vha ri a huna mvuwo ya vhafu, vha ya khae vha vhudzisa: “Mufunzi, Mushe o ri: Arali muthu a tshi fa á si na vhana, murathu wawe nga a dzee musadzi wawe, a bebele mukomana wawe vhana! Zwino ro vha ri na vhanna vhaṱanu-na-vhavhili vharwa vha muthu muthihi. Wa tanzhe a dzea musadzi, a fa á si na vhana. Musadzi a sala a vha wa murathu wawe. Na wa vhuvhili zwa ralo, na wa vhuraru, zwa vhuya zwa guma nga wa vhuṱanu-na-vhuvhili. Musadzi a sala, a vhuya a fa na ene. Zwino musi vhafu vha tshi vuwa, musadzi u ḓo vha wa nnyi kha avho vhaṱanu-na-vhavhili? ngauri vhoṱhe vho vha vho mu dzea.”

A tshi fhindula Yesu u ri: “Nandi, a si uri ni khakhiswa nge ni si ḓivhe maṅwalo na maanḓa a Mudzimu? Musi vha tshi vuwa vhafuni, a vha tsha ḓo dzea, a vha tsha ḓo dzewa; vha ḓo nga vharuṅwa ngei ṱaḓulu. Ḽa u ri vhafu vha a vuwa naa a no ngo ḽi vhala buguni ya Mushe, ḽa musi é tshiṱakani, Mudzimu a tshi amba nae’ a ri: Ndi nṋe Mudzimu wa Abrahamu, Mudzimu wa Isaka, Mudzimu wa Yakobo. Zwino-ha, Mudzimu a si Mudzimu wa vhafu, ndi Mudzimu wa vha tshilaho. No khakha zwinzhi.”

Hafhu magogo a kanukiswa nga phindulo ya Yesu. Na vhaṅwe vha vha maṅwalo vha a ṱhogomela: “Mufunzi, wo amba zwone.”

Musi Vhafarisei vha tshi vhona uri Yesu o fhumudza Vhasadukei, vha ḓa khae vhe tshigwada. U itela u mu linga hafhu, muṅwe wa maṅwalo vhukati havho u a vhudzisa: “Mufunzi, mulayo muhulu kha milayo ndi ufhio?”

Yesu u a fhindula: “Mulayo muhulu kha milayo yoṱhe ndi une wa ri: Thetshelesa Isiraele, Murena Mudzimu washu ndi Mudzimu muthihi. U fune Murena Mudzimu wau nga mbilu yau yoṱhe, na nga muya wau woṱhe, na nga u ṱalukanya hau hoṱhe, na nga maanḓa au oṱhe. Ndi wone mulayo muhulu kha yoṱhe. Muṅwe u ngaho wone ndi une wa ri: Funa wa hau vhunga U tshi ḓi-funa. A huna muṅwe mulayo u fhiraho yeneyo.” Zwi re zwone ndi uri Yesu u a engedza: “Milayo yoṱhe na vhaporofita zwo faredzwa kha milayo heyo mivhili.”

Uḽa munna wa maṅwalo u a tenda: “Ndi zwavhuḓi, Mufunzi; U amba mafhungo-ngoho U tshi ri: Mudzimu ndi muthihi, a huna muṅwe; U tshi ri: u mu funa nga mbilu yoṱhe, na nga u ṱalukanya hoṱhe, na nga maanḓa oṱhe​—na u ri: Funa wa hau vhunga U tshi ḓi-funa, zwi fhira zwidzimu zwoṱhe na zwiṱhavhelo.”

A tshi vhona uri uḽa wa maṅwalo o fhindula zwi ḓivhaleaho, Yesu u mu vhudza uri: “A U kule na muvhuso wa Mudzimu.”

Kha maḓuvha mararu zwino​—Swondaha, Musumbuluwo, na Ḽavhuvhili​—Yesu o vha a tshi khou funza thembeleni. Vhathu vho mu thetshelesa nga dakalo, naho zwo ralo vharangaphanḓa vha vhurereli vha ṱoḓa u mu vhulaha, fhedzi u swika zwino ndingedzo dzavho dzo kundwa. Mateo 22:15-40; Marko 12:13-34; Luka 20:20-40.

▪ Vhafarisei vha luka maano afhio u itela u fasha Yesu, nahone ho vha hu tshi ḓo bvelela mini arali o vha o fhindula nga uri ee kana hai?

▪ Yesu u kunda hani ndingedzo dza Vhasadukei dza u mu fasha?

▪ Ndi ifhio iṅwe ndingedzo ine Vhafarisei vha i ita u itela u linga Yesu, nahone hu na mvelelo ifhio?

▪ Kha vhuḓinḓa hawe ha u fhedza kha ḽa Yerusalema, Yesu o funza maḓuvha mangana thembeleni, nahone hu na mvelelo ifhio?