Ndima Ya 67

Vha Kundwa u Mu Fara

MUSI Vhuṱambo ha Mishasha vhu tshi kha ḓi bvela phanḓa, vharangaphanḓa vha vhurereli vha ruma vhaḓinḓa uri vha fare Yesu. Ha lingedzi u dzumbama. Nṱhani hazwo, Yesu u ḓi bvela phanḓa u funza khagala, a tshi ri: “Ndi kha ḓi vha na tshifhinganyana tshiṱuku ndí na inwi, ndi kone u ṱuwa ndi ye ha o nthumaho. Ni ḓo nṱoḓa ni si ṅgwane; huné nda ya hone a ni nga koni u swika.”

Vhayuda a vha pfesesi, nahone nga zwenezwo vha vhudzisana nga tshavho vha ri: “Muthu uyu u ḓo ya ngafhi, a tshi ri a ri nga mu wani? U ḓo ya ngei ho fhalalelaho Vha-Gerika kani, a funza vhone Vha-Gerika? Fhungo iḽi ḽi ri mini ḽe a ri: Ni ḓo nṱoḓa ni si ṅgwane! na u ri: Huné nṋe nda ya hone a ni koni u swika!” Vhukuma, Yesu u khou amba nga ha lufu lwawe lune lwa khou ḓa na u vuswa vhafuni a tshi vuselwa u tshila ṱaḓulu, hune maswina awe a si kone u tevhela.

Ḓuvha ḽa vhusumbe na ḽa u fhedza ḽa vhuṱambo ḽa swika. Matsheloni maṅwe na maṅwe a vhuṱambo, tshifhe o vha a tshi shulula maḓi, e a a ka Dzivhani ḽa Siloa, u itela uri a elele aletareni. Khamusi a tshi khou eletshedza vhathu nga ha hoyu mukhwa wa ḓuvha ḽiṅwe na ḽiṅwe, Yesu a huwelela a ri: “A re na ḓora nga a ḓe ha nṋe a nwe. Ané a ntenda​—u̗ amba ha maṅwalo​—muvhilini wawe hu ḓo elela ha bva milambo ya maḓi a tshilaho.”

Zwi re zwone ndi uri hafha Yesu u khou amba nga ha mvelelo khulwane dza musi muyamukhethwa u tshi ḓo shululwa. Ṅwaha u tevhelaho hohu u shululwa ha muyamukhethwa hu itea nga Pentekoste. Henefho, milambwana ya maḓi a vhutshilo yo elela musi vhafunziwa vha 120 vha tshi thoma u ṱanziela kha vhathu. Fhedzi ḽeneḽo ḓuvha ḽi sa athu swika, a hu na muya nga muhumbulo wa uri a hu na na muthihi kha vhafunziwa vha Kristo o no ḓodzwaho nga muyamukhethwa nahone a vhidzelwa u tshila ṱaḓulu.

Vha tshi aravha kha pfunzo ya Yesu, vhaṅwe vha thoma uri: “Nga-ngoho uyu ndi ene Muporofita,” zwi tshi tou vha khagala uri vha khou ambela kha muporofita a fhiraho Mushe we a fulufhedziswa uri u ḓo ḓa. Vhaṅwe vha ri: “Ndi ene Kristo.” Fhedzi vhaṅwe vha a hanedza: “Naa Kristo u ḓo bva Galilea naa? Huufha maṅwalo a tshi ri u ḓo bva kha lushaka lwa Davida; Kristo u ḓo bva Betlehema, muḓini we Davida a bva khawo’!”

Ha vha na phambano vhukati ha vhathu. Vhaṅwe vha ṱoḓa Yesu a tshi farwa, fhedzi a huna a mu kwamaho. Musi vhaḓinḓa vha tshi huma vhe si na Yesu, vhotshifhe vhahulu na Vhafarisei vha a vhudzisa: “No kundiswa nga’ni u mu ḓisa fhano?”

Vhaḓinḓa vha fhindula vha ri: “A huna muthu we a vhuya a amba sa uyo muthu.”

Vhó sinyuwa, vharangaphanḓa vha vhurereli vha amba vha tshi holedza, vha tshi shanda mafhungo, na u vha vhidza nga madzina. Vha vha goḓa vha ri: “Naa na inwi no ungelelwa? Naa hu na muṅwe muhulwane kana Mufarisei a mu tendaho? Vhathu fhedzi vha sá ḓivhiho mulayo, ndi vhone vho xedzwaho.”

Zwenezwo, Nikodemo, Mufarisei na muvhusi wa Vhayuda (ndi uri muraḓo wa Magota), a ḓivhofha u ambelela Yesu. Ni nga kha ḓi humbula uri miṅwaha mivhili na tshipiḓa yo fhiraho, Nikodemo o ḓa ha Yesu vhusiku nahone a sumbedza lutendo khae. Zwino Nikodemo u ri: “Naa nga mulayo washu ri nga vhea muthu mulandu á sathu u sengiswa naa, ha vhonala zwe a ita?”

Vhafarisei vha ṋaṋa u sinyuwa musi muṅwe wavho a tshi lwela Yesu. Vha amba vha tshi mu hoya vha ri: “Atsina na iwe U Mu-Galilea? Ṱoḓá U vhone zwauri a huna muporofita we a pfi u ḓo vuwa Galilea.”

Naho Maṅwalo a sa ambi nga u tou livha uri ho vha hu tshi ḓo bva muporofita Galilea, a a sumba uri Kristo o vha a tshi ḓo bva e henengei, a tshi amba uri “tshedza tshihulu” tsho vha tshi tshi ḓo vhonala henefho fhethu. Zwiṅwe hafhu, Yesu o bebelwa Betlehema, nahone o vha e muḓuhulu wa Davida. Samusi Vhafarisei vha tshi zwi ḓivha hezwi, vha fanela u vha vhe na mulandu wa u phaḓaladza mihumbulo yo khakheaho ine vhathu vha vha nayo nga ha Yesu. Yohane 7:32-52; Yesaya 9:1, 2; Mateo 4:13-17.

▪ Nga matsheloni maṅwe na maṅwe a vhuṱambo hu itea mini, nahone Yesu a nga vha a tshi zwi ṱhogomela hani?

▪ Ndi ngani vhaḓinḓa vha tshi kundwa u fara Yesu, nahone vharangaphanḓa vha vhurereli vha aravha hani?

▪ Nikodemo ndi nnyi, mavhonele awe nga ha Yesu ndi afhio, nahone u fariwa hani nga Vhafarisei ngae?

▪ Ndi vhuṱanzi vhufhio vhu re hone ha uri Kristo o vha a tshi ḓo bva e Galilea?