Ndima Ya 98

Vhafunziwa Vha A Pikisana musi Lufu lwa Yesu lu Tsini

YESU na vhafunziwa vhawe vha tsini na Mulambo wa Yorodane, une vha u pfuka vha tshi bva tshiṱirikini tsha Perea vha tshi dzhena Yudea. Vhaṅwe vhanzhi vha khou tshimbila navho u ya kha Paseka ya 33 C.E., ine ha vha ho sala vhege kana u fhira afho uri i swike.

Yesu u khou tshimbila phanḓanyana ha vhafunziwa vhawe, nahone vha kanukiswa nga u ḓiimisela hawe nga tshivhindi. Humbulani uri vhege dzi si gathi dzo fhiraho musi Lazaro a tshi fa nahone Yesu a tshi vho ṱoḓa u ya Yudea a tshi bva Perea, Thoma o ṱuṱuwedza vhaṅwe a ri: “Nḓarieni nae’, ri yo fa nae’.” Dovhani ni humbule uri musi Yesu o no vusa Lazaro vhafuni, Gota ḽo luka maano uri Yesu a vhulahwe. Ndi ngazwo vhafunziwa vha tshi welwa nga nyofho musi vha tshi dzhena Yudea hafhu.

U itela u vha lugiselela zwi re phanḓa, Yesu u dzhia vha 12 a ya navho thungo nahone a vha vhudza uri: “Vhonani ri a gonya ri ya Yerusalema; huno Murwa-muthu u yo ṋekedzwa vho-tshifhé vhahulu na vha maṅwalo; vha ḓo mu sengisa vha ri a vhulahwe, vha mu kumedza vha nnḓa. Avho vha ḓo mu goḓa vha mu rwa, vha mu pfela mare, vha mu vhulaha; hone, hó fhira maḓuvha mararu, u ḓo vuwa.”

Holu ndi lwa vhuraru kha miṅwedzi ya zwenezwino he Yesu a vhudza vhafunziwa vhawe nga ha lufu lwawe na u vuswa vhafuni. Huno naho vha tshi mu thetshelesa, vha a kundwa u pfesesa. Khamusi ndi nga ṅwambo wa uri vha tenda kha u vhuedzedzwa ha muvhuso wa Isiraele kha ḽifhasi, nahone vho sedza phanḓa kha u ḓiphina nga vhugala na khuliso kha muvhuso wa kha ḽifhasi na Kristo.

Vhukati ha vhane vha khou ya Pasekani ndi Salome, mme a vhaapostola Yakobo na Yohane. Yesu o vhidza havha vhanna uri ndi “Vho-ra-tshibvumo,” lu sa timatimisi nga ṅwambo wa mavhonele avho a u fhisea. Nga muṅwe musi havha vhavhili vho vhuya vha vha na vhuhovheleli ha u ṱoḓa u vha vha u thoma Muvhusoni wa Kristo, nahone vha ita na u vhudza mme avho zwine vha zwi tama. Zwino mme avho u ḓa ha Yesu u vha ambela, a gwadama phanḓa hawe, nahone a humbela u tondiwa.

Yesu u a vhudzisa: “U ṱoḓa’ni?”

U a fhindula: “Amba uri avha vharwa vhanga vhavhili vhuhosini hau muṅwe a dzule thungo ya tshanḓa tsha u ḽa tshau, muṅwe a dzule thungo ya tsha monde.”

A tshi ṱhogomela uri khumbelo i bva ha vhonnyi, Yesu u amba na Yakobo na Yohane: “A ni ḓivhi zwiné na humbela. Tshinwelo tshiné nda yo tshi nwa, izwi ni nga tshi nwa-vho?”

Vha a fhindula: “Ri a kona.” Naho Yesu a tshi kha ḓi bva u vha vhudza uri o sedzana na u tovholwa hu ofhisaho nahone mafheleloni a vhulahwe, zwi vhonala vha sa pfesesi uri u khou amba zwone musi a tshi amba nga ha “tshinwelo” tshine a ḓo tshi nwa.

Naho zwo ralo, Yesu u vha vhudza uri: “Tshinwelo tshanga tshone ni ḓo tshi nwa; na ndovhedzo iné nda lovhedzwa ngayo, ni ḓo lovhedzwa-vho ngayo. Há vha u dzula tsini hanga thungo ya tsha u ḽa na tsha monde, a si zwiné nṋe nda kona u ni fha; ndi zwa avho vhe khotsi-anga a dzula ó vha lugisela.”

Nga tshenetsho tshifhinga vhaṅwe vhaapostola vha fumi vha a ṱhogomela uri Yakobo na Yohane vho humbela mini, nahone vha sinyuwa. Khamusi Yakobo na Yohane vho vha vhe vhone vha re phanḓa kha u pikisana vhukati ha vhaapostola nga ha uri ndi nnyi a re muhulwane. Khumbelo yavho ya zwino i dzumbulula uri a vho ngo shumisa nyeletshedzo ye Yesu a vha ṋea yone kha haya mafhungo. Zwi pfisaho vhuṱungu ndi uri lutamo lwavho lwa u vha vhahulwane lu kha ḓi vha lwo khwaṱha.

Nga zwenezwo u itela u piringulula heyi khakhathi ya zwenezwino na u sa pfana he ya hu bveledza, Yesu u vhidzela thungo vha 12 vhe vhoṱhe. A tshi vha eletshedza nga lufuno, u ri: “Ni a zwi ḓivha zwauri vhavhusi vha vhathu tshavho ndi u vhusa, na vhahulwane tshavho ndi u ita maanḓa. Kha inwi zwi songo ralo. A funaho u vha muhulwane kha inwi a vhe ene a ni shumelaho. A funaho u vha muvhusi kha inwi a nge mulanda waṋu.”

Yesu o vhea tsumbo ine vha fanela u i tevhela, musi a tshi ṱalutshedza: “Vhunga Murwa-muthu á songo ḓa u shumelwa, ó ḓa u shumela vhaṅwe na u kumedza vhutshilo hawe uri a phuluse vhanzhi.” Yesu ho ngo sokou shumela vhaṅwe, fhedzi u ḓo ita zwi fhiraho zwenezwo nga u fela vhathu! Vhafunziwa vha fanela u vha na muhumbulo wo raloho u ngaho wa Kristo wa u tama u shumela nṱhani ha u shumelwa na uri vha vhe vhaṱuku nṱhani ha u vha vhuimoni ha nṱha. Mateo 20:17-28; Marko 3:17; 9:33-37; 10:32-45; Luka 18:31-34; Yohane 11:16.

▪ Ndi ngani zwino vhafunziwa vha tshi welwa nga nyofho?

▪ Yesu u lugiselela hani vhafunziwa vhawe kha zwine zwa vha phanḓa?

▪ Yesu u humbelwa mini, nahone vhaṅwe vhaapostola vha kwamea hani?

▪ Yesu u piringulula hani vhuleme vhu re vhukati ha vhaapostola vhawe?