Ndima Ya 55

Vhafunziwa Vhanzhi Vha Litsha U Tevhela Yesu

YESU u khou funza tshikoloni ngei Kapernaume malugana na ene muṋe sa vhuswa vhukuma vhu bvaho ṱaḓulu. Nyambo yawe zwi vhonala uri i khou engedza nyambedzano ye ya thoma na vhathu musi vha tshi mu wana vha tshi bva thungo ya vhubvaḓuvha ya Lwanzhe lwa Galilea, he vha ḽa zwinnkwa na khovhe zwe zwa ṋekedzwa lwa vhuṱolo.

Yesu u bvela phanḓa na ṱhaluso dzawe, nga uri: “Huno vhuswa vhuné nṋe nda ḓo mu ṋea, ndi muvhili wanga, uné nda u ṋekedza uri shango ḽi tshile.” Miṅwaha mivhili nga phanḓanyana, nga tshilimo tsha 30 C.E., Yesu o vhudza Nikodemo uri Mudzimu o funa shango zwingafha-ngafha a vhuya a ṋekedza Murwa wawe sa Mutshidzi. Nga zwenezwo, Yesu zwino u khou sumbedza uri naho e nnyi wa shango ḽa vhathu ane a ḽa lwa pfanyisedzo ṋama yawe, nga u tenda kha tshiṱhavhelo tshine a ḓo tshi ita hu si kale, a nga wana vhutshilo vhu sa fheli.

Naho zwo ralo, vhathu vha khukhuliswa nga maipfi a Yesu. Vha a vhudzisa: “Muthu uyu a nga ri ṋea hani muvhili wawe, ra u ḽa?” Yesu o ṱoḓa uri vhathetshelesi vhawe vha pfesese uri u ḽa muvhili wawe zwo vha zwi tshi ḓo itwa nga lwa pfanyisedzo. Nga zwenezwo, u itela u zwi ombedzela, u amba tshiṅwe tshithu tshine na tshone tsha hanedzea arali tsho dzhiiwa nga lwa thevhedzaipfi.

Yesu u a ḓivhadza: “Arali ná sa ḽa muvhili wa Murwa-muthu, na nwa malofha awe, ni nga si vhe na vhutshilo kha inwi. A ḽaho muvhili wanga, a nwa malofha anga, u na vhutshilo vhu sá fheli, huno nṋe ndi ḓo mu vusa nga ḓuvha ḽa vhufhelo. Muvhili wanga ndi tshone tshiḽiwa vhukuma; malofha anga ndi tshone tshinwiwa vhukuma. A ḽaho muvhili wanga a nwa malofha anga, u dzula e kha nṋe, huno nṋe ndi dzula ndí kha ene.”

I ngoho, pfunzo ya Yesu yo vha i tshi ḓo pfala i i vhaisaho nga maanḓa arali o vha a tshi khou amba nga vhudyavhathu. Fhedzi, vhukuma, Yesu ha khou amba u ḽa ṋama kana u nwa malofha lwo livhaho. U khou tou ombedzela uri vhoṱhe vha wanaho vhutshilo vhu sa fheli vha fanela u tenda kha tshiṱhavhelo tshine a ḓo tshi ita musi a tshi ṋekedza muvhili wawe wa muthu o fhelelaho na u shulula malofha awe a vhutshilo. Naho zwo ralo, na vhunzhi ha vhafunziwa vhawe a vha iti vhuḓidini ha u pfesesa pfunzo yawe nahone vha hanedza nga uri: “Ndi mafhungo a konḓaho ayo; ndi nnyi a konaho u a pfa?”

A tshi ḓivha uri vhunzhi ha vhafunziwa vhawe vha khou gungula, Yesu u ri: “Naa zwe nda amba zwi a ni khakhisa naa? Ni ḓo ri mini arali ni tshi vhona Murwa-muthu a tshi vhuyelela ngei ṱaḓulu he a vha e hone kale? . . . Maipfi anga e nda amba na inwi ndi Muya, ndi vhutshilo. Kha inwi hu ro vha na vhaṅwe vha sa tendiho.”

Yesu u bvela phanḓa: “Ndi zwe nda amba ngazwo’ nda ri: Haho’ a konaho u ḓa ha nṋe arali á songo fhiwa nga Khotsi.” Nga zwenezwo, vhunzhi ha vhafunziwa vhawe vha ṱuwa vha si tsha mu tevhela. Ngauralo Yesu a amba na vhaapostola vhawe vha 12 nahone a vha vhudzisa: “Kani na inwi ni funa u ṱuwa-vho?”

Petro u a fhindula: “Murena, ri ḓo ṱuwa ra ya ha nnyi? Huufha Ú na maipfi a vhutshilo vhu sa fheli. Huno riṋe ro tenda, ro zwi ḓivha zwauri ndi iwe Kristo Murwa wa Mudzimu.” Ndi u sumbedza u fulufhedzea havhuḓi lungafhani, naho hu uri Petro na vhaṅwe vhaapostola vha nga vha vha songo pfesesa nga vhuḓalo pfunzo ya Yesu nga ha haya mafhungo!

Naho o takadzwa nga phindulo ya Petro, Yesu u a ṱhogomela: “Naa a tho ngo ni nanga na vha fumi na vhavhili? Huno muṅwe waṋu ndi Diabolo.” U khou amba nga ha Yudasi Iskariote. Zwi re zwone ndi uri kha heḽi sia Yesu u sumba kha Yudasi ‘muthomi,’ kana murangi, wa buḓo ḽivhi.

Yesu u kha ḓi bva u shonisa vhathu nga u hana musi vha tshi ṱoḓa u mu ita khosi, nahone vha nga vha vha tshi khou humbula uri, ‘A nga vha hani Messia arali a sa ḓo ṱanganedza vhuimo ho fanelaho ha Messia?’ Na enea, o vha a tshi ḓo vha e mafhungo maswa mihumbuloni ya vhathu. Yohane 6:51-71; 3:16.

▪ Yesu u ṋekedzela muvhili wawe vhafhio, nahone avha vha ‘ḽa hani muvhili wawe’?

▪ Ndi afhio maṅwe maipfi a Yesu a tshusaho vhathu, naho zwo ralo u khou ombedzela mini?

▪ Musi vhanzhi vha tshi litsha u tevhela Yesu, Petro u aravha hani?