Ndima Ya 14

Vhafunziwa vha Yesu Vha U Thoma

NGA murahu ha maḓuvha a 40 e sogani, Yesu u vhuyelela ha Yohane, we a mu lovhedza. Musi a tshi sendela, zwi vhonala uri Yohane u a mu sumba nahone a vhudza vhe vha vha vhe hone a ri: “Vhonani Ngwana ya Mudzimu yo hwalaho zwivhi zwa shango. Uyo ndi ene we nda mu amba nda ri: ndi ḓo salwa murahu nga munna o nthangaho phanḓa, ngauri o vha e hone nṋe ndí sathu u vha hone.” Naho Yohane e muhulwane u fhira muzwala wawe Yesu, Yohane u a zwi ḓivha uri Yesu o tshila phanḓa hawe sa muthu wa muya wa ṱaḓulu.

Naho zwo ralo, vhegeni dzi si gathi dzo fhiraho, musi Yesu o ḓa u lovhedzwa, zwi vhonala uri Yohane o vha e si na vhuṱanzi ha uri Yesu o vha a tshi ḓo vha Messia. Yohane u a tenda: “Na nṋe ndo vha ndi sa mu ḓivhi; fhedzi, zwe nda ḓela zwone nda lovhedza maḓini, ndi uri a ḓihwe kha Isiraele.”

Yohane u a bvela phanḓa u ṱalutshedza vhathetshelesi vhawe zwe zwa itea musi a tshi lovhedza Yesu: “Ndo vhona Muya u tshi tsa vhunga ḽiivha u tshi bva ṱaḓulu, wa dzula kha ene. Na nṋe ndo vha ndi sa mu ḓivhi; hone o nthumaho u lovhedza maḓini, ndi ene we a mbudza a ri: Ané wa ḓo vhona Muya u tshi tsa wa dzula kha ene, ndi ene ane a ḓo lovhedza nga Muya mukhethwa. Nda zwi vhona nda ṱanziela nda ri: Uyo ndi ene Murwa wa Mudzimu.”

Ḓuvha ḽi tevhelaho Yohane o ima na vhafunziwa vhawe vhavhili. Hafhu, musi Yesu a tshi sendela u ri: “Vhonani Ngwana ya Mudzimu!” Nga zwenezwo, havha vhafunziwa vhavhili vha Yohane Mulovhedzi vha tevhela Yesu. Muṅwe wavho ndi Andrea, nahone muṅwe zwi tou vha khagala uri ndi onoyu muthu we a ṅwala hezwi zwithu, we na ene a vha a tshi pfi Yohane. U ya nga vhuṱanzi, hoyu Yohane na ene ndi muzwala wa Yesu, zwi tshi vhonala e ṅwana wa mukomana wa Maria, Salome.

Yesu a tshi rembuluwa nahone a tshi vhona Andrea na Yohane vha tshi mu tevhela, u a vhudzisa: “Ni ṱoḓa’ni?”

Vha a vhudzisa: “Mufunzi, U dzula ngafhi?”

Yesu u a fhindula: “Iḓani, ni yo vhona.”

Hu ṱoḓa u vha iri ya vhuṋa nga masiari, nahone Andrea na Yohane vha ṱwa na Yesu ḓuvha ḽeneḽo ḽoṱhe. Nga murahu Andrea o takalesa lune a gidimela u ṱoḓa mukomana wawe, ane a vhidzwa Petro. U mu vhudza uri: “Ro wana Messia.” Nahone u isa Petro ha Yesu. Khamusi Yohane nga tshenetsho tshifhinga u wana murathu wawe Yakobo nahone a mu isa ha Yesu; naho zwo ralo, Yohane u pfuka hovhu vhuṱanzi ha ene muṋe kha Evangeli yawe.

Ḓuvha ḽi tevhelaho, Yesu u wana Filipo, ane a bva Betsaida, muḓini une Andrea na Petro vha bva khawo. U a mu ramba: “Ntevhele!”

Nga zwenezwo Filipo u wana Nathanaele, ane a dovha a vhidzwa Baratholomeo, nahone u ri: “Uḽa, we Mushe milayoni na vhaporofita vha mu amba, ro mu wana; ndi Yesu murwa wa Yosefa wa Nazareta.” Nathanaele u a timatima. U a vhudzisa a ri: “Nazareta hu nga kona u bva tshithu tshavhuḓi tshifhio?”

Filipo u a khadeledza a ri: “Iḓá U vhone.” Musi vha tshi khou ḓa ha Yesu, Yesu a ri nga ha Nathanaele: “Vhonani Mu-Isiraele vhukuma, a sí na vhufhura.”

Nathanaele u a vhudzisa: “U nḓivhela’fhi?”

Yesu u fhindula a ri: “Musi Filipo á sathu u U vhidza, ndo U vhona U tsini ha muhuyu.”

Nathanaele o akhamala. U ri: “Mufunzi, ndi iwe Murwa wa Mudzimu, ndi iwe khosi ya Isiraele.”

Yesu u a vhudzisa: “U tenda nge nda ri: ndo U vhona Ú tsini ha muhuyu; U kha ḓi ḓo vhona zwi fhiraho izwo.” Nga zwenezwo u a fulufhedzisa u ri: “Ngoho, ngoho, ndi a ni vhudza, ni ḓo vhona ḽiṱaḓulu ḽó vulwa, na vharuṅwa vha Mudzimu vha tshi gonya vha tshi tsela kha Murwa-muthu.”

Nga u ṱavhanya nga murahu ha hezwi, Yesu, u katela na vhafunziwa vhawe vhane a kha ḓi tou bva u vha wana, vha ṱutshela Govha ḽa Yorodane nahone vha ya Galilea. Yohane 1:29-51.

▪ Ndi vhonnyi vhafunziwa vha Yesu vha u thoma?

▪ Petro, khamusi khathihi na Yakobo, vho ḓiswa hani kha Yesu?

▪ Ndi mini tshi itaho uri Nathanaele a fushee uri Yesu ndi Murwa wa Mudzimu?