Ndima Ya 97

Vhashumi Tsimuni

YESU u kha ḓi bva u ri: “Vhanzhi vha re ma-ranga-phanḓa vha ḓo vha tsalela; tsalela dza vha ma-ranga-phanḓa.” Zwino u ṱalutshedza hezwi nga u anetshela mafhungo. U a thoma: “Muvhuso wa ṱaḓulu u nga muṋe wa muṱa, we a bva nga matsheloni a yo rambela tsimu yawe vhashumi.”

Yesu u bvela phanḓa: “Huno musi [ṋemuḓi] ó no tendelana na vhashumi uri ndi ḓo ni ṋea sheleni nga ḓuvha, a vha ruma tsimuni yawe. A bva nga tshikhathi tsha vhuraru a wana vhaṅwe vhó ima khoroni vhá si na mushumo, a amba navho’ a ri: Na inwi iyani tsimuni yanga, ndi ḓo ni ṋea zwo ni eḓanaho. Vhone vha ya. A dovha a bva nga tshikhathi tsha vhuṱanu-na-vhuthihi na nga tsha vhuṱanu-na-vhuṋa, a ḓi ralo. Nga tshikhathi tsha fumi na vhuthihi a bva, a wana vhaṅwe vhó ima vhá si na mushumo, a amba navho’ a ri: Ndi mini ni tshi ṱwa ḓuvha ḽoṱhe nó ima ní si na mushumo? Vha amba nae’ vha ri: A huna we a ri ramba. A amba navho’ a ri: Na inwi iyani tsimuni.”

Ṋemuḓi, kana muṋe wa tsimu, ndi Yehova Mudzimu, nahone tsimu ndi lushaka lwa Isiraele. Vhashumi tsimuni ndi vhathu vhe vha dzheniswa kha mulanga wa Mulayo; nga ho khetheaho ndi Vhayuda vhe vha vha vha tshi tshila zwifhingani zwa vhaapostola. Ho itwa thendelano ya muholo na vhashumi vha ḓuvha ḽoṱhe. Muholo wa mushumo wa ḓuvha ḽoṱhe ndi sheleni. Samusi “tshikhathi tsha vhuraru” tshi 9:00 nga matsheloni, vhe vha rambiwa nga awara ya vhu-3, ya vhu-6, ya vhu-9, na ya vhu-11, muṅwe na muṅwe wavho u shuma awara dza 9, 6, 3, na 1.

Vhashumi vha awara dza 12, kana vhashumi vha ḓuvha ḽoṱhe, vha imela vharangaphanḓa vha Vhayuda vhe zwifhinga zwoṱhe vha dzula vho farekanea kha tshumelo ya vhurereli. A vha fani na vhafunziwa vha Yesu, vhe vhunzhi ha vhutshilo havho vha vha vho tholiwa u fasha khovhe kana u ita miṅwe mishumo ya shango. Ndi u swikela nga 29 C.E. he “muṋe wa muṱa” a rumela Yesu Kristo u itela uri a kuvhanganye havha uri vha vhe vhafunziwa vhawe. Nga zwenezwo vho vha “tsalela,” kana vhashumi vha tsimuni vha awara ya vhu-11.

Mafheleloni, ḓuvha ḽa mushumo ḽa pfanyisedzo ḽi fhela nga u fa ha Yesu, nahone hu ḓa tshifhinga tsha u holela vhashumi. Hu tevhelwa maitele a songo ḓoweleaho a u holela wa u fhedza u thoma, samusi zwi tshi ṱalutshedzwa: “Musi ho no vha madekwana muṋe wa tsimu a amba na mukoma wawe a ri: Vhidza vhashumi U vha ṋee mukovhe wavho, U thome nga vha masalela, U fhedzise nga vha ma-ranga-phanḓa. Ndi hone hu tshi ḓa vho rambiwaho nga tshikhathi tsha fumi na vhuthihi, vhoṱhe vha ṋewa sheleni-sheleni. Musi vha ma-ranga-phanḓa vha tshi ḓa vha ri, khamusi ri ḓo ṋewa zwi fhiraho zwa vhaḽa vhaṅwe; na vhone vha ḓi ṋewa sheleni-sheleni. Vha tshi ṋewa yeneyo vha halalela muṋe wa muṱa. Vha ri: Havha vha masalela vho fhedza tshikhathi tshithihi fhedzi vha tshi shuma, zwino wo ḓi vha eḓanya na riṋe ro shengelaho nga muhwalo wa ḓuvha ḽoṱhe na nga biko. Ene a fhindula a amba na muṅwe wavho a ri: Khonani yanga, a thi U tshinyi. A ro ngo pfana yeneyo sheleni nthihi naa? Dzhia tshi re tshau U tshimbile. Á vha uyu wa ḽisalela ndi funa u mu ṋea zwine zwa nga zwau. Kani a zwo ngo ndingana ndi tshi ita tshiné nda funa nga zwi re zwanga? U vho nzwondolola nge nṋe nda vha na vhuthu naa?” A tshi phetha, Yesu o dovholola mbuno ye a i amba mathomoni, a tshi ri: “Na zwino, tsalela dzi ḓo vha thanzi, thanzi dza vha tsalela.”

U ṱanganedzwa ha sheleni a hu itei musi Yesu a tshi fa, fhedzi hu itea nga Pentekoste ya 33 C.E., musi Kristo, “mukoma,” a tshi shululela muyamukhethwa kha vhafunziwa vhawe. Havha vhafunziwa vha Yesu vha nga “tsalela,” kana vhashumi vha awara ya vhu-11. Sheleni a i imeli tshifhiwa tsha muyamukhethwa wone uṋe. Sheleni ndi tshithu tshine vhafunziwa vha fanela u tshi shumisa fhano kha ḽifhasi. Ndi tshithu tshine tsha amba vhutshilo havho, vhutshilo havho vhu sa fheli. Ndi ndugelo ya u vha Vhaisiraele vha muya, vho ḓodzwaho u itela u funza nga ha Muvhuso wa Mudzimu.

Nga u ṱavhanya vho tholiwaho u thoma vha ṱhogomela uri vhafunziwa vha Yesu vho holelwa, nahone vha vha vhona vha tshi khou shumisa sheleni ya pfanyisedzo. Fhedzi vha ṱoḓa zwi fhiraho muyamukhethwa na ndugelo dzi tshimbidzanaho nawo dza Muvhuso. U gungula havho na u ita khakhathi havho hu ḓa nga tshivhumbeo tsha u tovhola vhafunziwa vha Kristo, vhashumi tsimuni vhane vha vha “tsalela.”

Naa honoho u ḓadzea ha ḓana ḽa u thoma ḽa miṅwaha ndi hone u ḓadzea fhedzi ha itshi tshifanyiso tsha Yesu? Hai, nga ṅwambo wa vhuimo havho na vhuḓifhinduleli havho, vhafunzi vha ḽa Vhudzhagane kha ḽino ḓana ḽa vhu-20 ḽa miṅwaha vho vha vho tholiwa sa “ma-ranga-phanḓa” kha mushumo wa tsimu ya pfanyisedzo ya Mudzimu. Vho dzhia vhahuweleli vho ḓiṋekedzaho vha tshimbidzanaho na Watch Tower Bible and Tract Society vhe “tsalela” uri vha nga vha na mushumo naho u ufhio tshumeloni ya Mudzimu. Fhedzi zwi re zwone ndi uri ndi vhenevha, vhe vhafunzi vha vha nyadza, vhe vha ṱanganedza sheleni​—khuliso ya u shumela sa vhaimeli vho ḓodzwaho vha Muvhuso wa Mudzimu wa ṱaḓulu. Mateo 19:30–20:16.

▪ Ndi mini zwine zwa imelwa nga tsimu? Ndi vhafhio vhane vha imelwa nga muṋe wa tsimu na nga vhashumi vha awara dza 12 na vha awara nthihi?

▪ Ḓuvha ḽa mushumo ḽa pfanyisedzo ḽo fhela lini, nahone muholo wo itwa lini?

▪ Ndi mini zwine zwa imelwa nga muholo wa sheleni?