Ndima Ya 123

“Vhonani, Muthu-ḓe!”

O KWAMEA nga u ḓifara ha Yesu na u ṱhogomela u sa vha hawe na mulandu, Pilato u ṱoḓa iṅwe nḓila ya u mu vhofholola. U vhudza gogo uri: “Huufha inwi nó ḓowela uri nga Paseka ndi ni vhofhololele muthu.”

Baraba, phondi i ḓivheaho, na ene o farwa sa tshivhotshwa, ngauralo Pilato u a vhudzisa: “Ni funa ndi tshi vhofholola ufhio? Ni funa Baraba, kana ni funa Yesu, ané vha ri ndi Kristo?”

Vha tshi ṱuṱuwedzwa nga vhotshifhe vhahulu vhe vha vha dzikusa, vhathu vha humbela uri hu vhofhololwe Baraba, fhedzi uri Yesu a vhulahwe. Pilato a sa fheli mbilu, u a aravha, a tshi dovha u vhudzisa uri: “Kha avha vhavhili ni nanga ufhio, ndi mu vhofholole?”

Vha zhamba vha ri: “Baraba!”

Pilato u vhudzisa o nyabwa a ri: “Huno Yesu, ané vha ri ndi Kristo, ndi ḓo mu ita’ni?”

Vha zhamba mazha nga khuwa i dzingisaho na nḓevhe, vha fhindula vha ri: “Nga a vhambiwe!” ‘Mu vhambe! Mu vhambe!’

A tshi zwi ḓivha uri vha khou ṱoḓa u vhulaha muthu a si na mulandu, Pilato u a luvhelela: “O tshinya’ni? Nṋe a thi wani mulandu wo eḓanwaho nga lufu kha ene. Litshani ndi mu rwe, ndi mu vhofholole.”

Hu sa londwi ndingedzo dzawe, gogo ḽo sinyuwaho, ḽi ṱuṱuwedzwaho nga vharangaphanḓa vhaḽo vha vhurereli, ḽa bvela phanḓa ḽi tshi zhamba ḽa ri: “Mu vhambe!” Ḽi tshi ṱuṱuwedzwa nga vhotshifhe, gogo ḽi ṱoḓa malofha. Nahone ri tshi tou humbula, maḓuvha maṱanu fhedzi o fhiraho, khamusi vhaṅwe vhavho vho vha vhe vhukati ha vhe vha ṱanganedza Yesu sa Khosi Yerusalema! Zwifhinga zwoṱhe, vhafunziwa vha Yesu, arali vhe hone, vho sokou fhumula nahone vho ḓidzumba.

Pilato, a tshi vhona uri khumbelo dzawe a dzi khou shuma tshithu, nṱhani hazwo, u zhamba hu khou hulela, a dzhia maḓi a ṱamba zwanḓa zwawe phanḓa ha gogo, nahone u ri: “Nṋe a thi na mulandu kha malofha a muthu uyu o lugaho; ndi mafhungo aṋu ayo.” Nga zwenezwo, vhathu vha fhindula vha ri: “Malofha awe kha a ḓe kha riṋe na kha vhana vhashu.”

Ngauralo, a tshi ṱoḓa u fusha zwine vha ṱoḓa​—nahone a tshi ṱoḓa u fusha gogo nṱhani ha u ita zwine a ḓivha uri zwo luga​—Pilato u vha vhofhololela Baraba. A dzhia Yesu nahone a ita uri a bvulwe nahone a rwiwe. Hohu ho vha hu si u rwa ho ḓoweleaho. The Journal of the American Medical Association i ṱalusa maitele a Vharoma a u rwa nga u rali:

“Tshishumiswa tsho ḓoweleaho tsho vha tshi tshimebi tshipfufhi (luzwa) tshi re na nnzwa dzo vhalaho dzo imaho nga dzoṱhe kana dzo lukwaho dza vhulapfu ho fhamba-fhambanaho, dzine khadzo ha vhofhelelwa fhaḽa na fhaḽa vhutzimbi ho itaho vhupulumbu vhuṱuku kana zwipiḓa zwa marambo a nngu zwi tsheaho. . . . Musi maswole a Vharoma a tshi rwa lunzhi-lunzhi nga nungo dzao dzoṱhe, onoyo muthu o tshinyaho, zwitzimbi zwa zwipulumbu zwo vha zwi tshi vula mbanga khulwane, nahone nnzwa dza mukumba na marambo a nngu o vha a tshi fhandula lukanda na tsikila dza fhasi ha lukanda. Nga zwenezwo, musi u rwa hu tshi bvela phanḓa, mbanga dzi a aṱama dza swika kha misipha nahone ṋama dza kherukana dza nzwuruma malofha.”

Nga murahu ha hohu u rwa hu vhavhaho, Yesu u iswa nḓuni ya muvhusi, nahone mavhuthu oṱhe a a kuvhanganywa. Henefho maswole a bvela phanḓa na u mu goḓa nga u mu lukela khare ya mipfa nahone vha i ndondomedza ṱhohoni yawe. Vha longa luṱanga tshanḓani tshawe tsha u ḽa nahone vha mu ambadza nguvho ya muvhala wa bulusele yo rondovhelaho, mufuda une wa fukwa nga vhakololo. Nga zwenezwo vha mu goḓa vha ri: “Ri a losha, Khosi ya Vha-Yuda!” Hafhu, vha mu pfela mare nahone vha mu vhanda tshifhaṱuwo. Vha dzhia luḽa luṱanga lwo khwaṱhaho tshanḓani tshawe, vha lu shumisela u mu rwa ngalwo kha ṱhoho, vha tshi ṋaṋisa u ndondomedza mipfa ya “khare” ya u mu goḓa kha lukanda lwa ṱhoho yawe.

Tshirunzi na maanḓa a swayeaho e Yesu a vha e nao musi o sedzana na u tambudzwa zwi kwama Pilato lwe a vhuya a tama u ita iṅwe ndingedzo ya u mu rengulula. U vhudza gogo a ri: “Vhonani, ndi mu ḓisa ha inwi ngeno nnḓa, uri ni ḓivhe zwauri a thi wani mulandu kha ene.” Khamusi u humbula uri vha tshi vhona Yesu o rwiwa lu pfisaho vhuṱungu vha ḓo mu khathutshela. Musi Yesu a tshi ima phanḓa ha tshigwada tshi si na khathutshelo, o ambara khare ya mipfa na nguvho ya muvhala wa bulusele yo rondovhelaho nahone a tshi pfa vhuṱungu tshifhaṱuwoni tshawe tshi nzwurumaho malofha, Pilato u a ḓivhadza: “Vhonani, muthu-ḓe!”

Naho o vhaisala na u huvhadzwa, hafha ho ima muthu wa vhuimo vhuhulwane kha ḓivhazwakale yoṱhe, i ngoho muthu a re na bvumo we a vhuya a tshila! Ee, Yesu u na tshirunzi tsho dzikaho tshine tsha sumbedza vhuhulwane vhune na Pilato a fanela u vhu ṱhogomela, ngauri zwi vhonala uri maipfi awe o ṱanganana na u mu ṱhonifha na u mu pfela vhuṱungu. Yohane 18:39–19:5; Mateo 27:15-17, 20-30; Marko 15:6-19; Luka 23:18-25.

▪ Ndi nga nḓila ifhio ine Pilato a lingedza uri Yesu a vhofhololwe?

▪ Pilato u lingedza hani u ḓibvisa mulanduni?

▪ Ndi mini zwine zwa katelwa kha u rwiwa?

▪ Yesu u goḓwa hani musi o no rwiwa?

▪ Ndi ifhio iṅwe ndingedzo ine Pilato a i ita u itela u vhofholola Yesu?