Ndima Ya 66

Vhuṱamboni ha Mishasha

YESU u vho ḓihwa hoṱhe vhukatini ha miṅwaha i ṱoḓaho u vha miraru u bva tshee a lovhedzwa. Vhathu vhanzhi vha zwigidi vho vhona vhuṱolo hawe, na mivhigo nga ha mishumo yawe yo phaḓalalaho shango ḽoṱhe. Zwino, musi vhathu vho kuvhanganela Vhuṱambo ha Mishasha Yerusalema, vha mu ṱoḓa henefho. Vha ṱoḓa u ḓivha, “Uḽa muthu u ngafhi?”

Yesu o no vha ane vha ṱaṱisana ngae. Vhaṅwe vha ri: “Ndi muthu wavhuḓi!” Vhaṅwe vha ri: “Aiwa, u xedza vhathu.” Hu na nyambo dzo raliho maḓuvhani a u thoma a vhuṱambo. Naho zwo ralo a hu na na muthihi a re na tshivhindi tsha u amba khagala a tshi ambela Yesu. Hezwi ndi nga ṅwambo wa uri vhathu vha ofha u ṱarafiwa nga vharangaphanḓa vha Vhayuda.

Musi vhuṱambo ho no ṱangana, Yesu a mbo swika. A gonya a ya thembeleni, he vhathu vha kanukiswa nga vhukoni hawe ha u funza. Samusi Yesu a songo vhuya a ya zwikoloni zwa vhufunzi, Vhayuda vha kanuka: “Uyu muthu, maṅwalo u a ḓivha hani á so ngo funzwa?”

Yesu u a ṱalutshedza: “Pfunzo yanga a si yanga, ndi ya o nthumaho. Arali muthu a tshi funa u ita zwi funwaho nga onoyo, ndi ene ane a ḓo ṱalukanya pfunzo i tshi bva ha Mudzimu, namusi ndi tshi amba anga nṋe muṋe.” Pfunzo ya Yesu i farelela tshoṱhe kha mulayo wa Mudzimu. Nga zwenezwo, zwi fanela u vha khagala uri u ṱoḓa hu tshi ṋewa Mudzimu vhugala, hu si ene. Yesu u a vhudzisa: “Mushe ha ngo ni ṋea mulayo naa?” Nga nḓila ya u vha sola, u ri: “Huno kha inwi ha fhedza ha si vhe na a itaho zwiné mulayo wa amba.”

Zwenezwo Yesu u a vhudzisa: “Ni ṱoḓela’ni-ha u mbulaha?”

Vhathu vha re tshigwadani, khamusi vho dalaho vhuṱamboni, a vha vhu ṱhogomeli honoho vhuḓidini ha u ṱoḓa u mu vhulaha. Vha zwi dzhia zwi sa nga vhuyi zwa itea u vhulaha mufunzi wavhuḓi nga u ralo. Nga zwenezwo vha tenda uri hu fanela u vha hu na tsho khakheaho nga Yesu musi a tshi humbula nga u ralo. Vha ri: “U na muya muvhi; ndi nnyi a ṱoḓaho u U vhulaha?”

Vharangaphanḓa vha Vhayuda vha ṱoḓa Yesu a tshi vhulahwa, naho gogo ḽi sa nga zwi limuhi. Musi Yesu a tshi fhodza muṅwe munna nga Sabatha ṅwaha na tshipiḓa wo fhiraho, vharangaphanḓa vho lingedza u mu vhulaha. Zwino Yesu u amba nga ha vhutsilu havho nga u vha vhudzisa uri: “Zwino muthu a tshi rubiswa nga Sabatha, uri hu si pfukiwe mulayo wa Mushe, ni ntsinyutshela’ni nge nda fhodza muthu muvhili woṱhe nga Sabatha? Ni songo haṱula nga u ṱalula; haṱulani nga khaṱhulo yo lugaho.”

Vhadzulapo vha Yerusalema, vhane vha khou ṱhogomela vhuimo, zwino vha ri: “Naa muthu uyu a si uḽa naa ané vha ṱoḓa u mu vhulaha? Huno ngoyu u amba e khagala, vhá sa mu vhudzi tshithu. A si uri khamusi na vhahulwane vho zwi vhona zwauri ndi ene Kristo?” Havha vhadzulapo vha Yerusalema vha a ṱalutshedza uri ndi ngani vha sa tendi uri Yesu ndi Kristo: “Hone uyu ri ḓivha huné a bva hone; Kristo arali a tshi ḓa, a hu nga ḓivhi muthu huné a bva hone.”

Yesu u a fhindula: “Nṋe ni a nḓivha, na huné nda bva hone ni a hu ḓivha; hone ndi tshi ḓa, a tho ngo tou ḓi-ḓisa, o nthumaho u hone ngangoho; ndi ene ané ni si mu ḓivhe. Nṋe ndi a mu ḓivha, ngauri ndi bva ha ene, huno ndi ene o nthumaho.” Zwenezwo vha lingedza u mu fara, khamusi u mu valela khothoni kana u mu vhulaha. Naho zwo ralo vha si zwi kone ngauri a tshi athu u vha tshifhinga tsha Yesu tsha u fa.

Naho zwo ralo, vhanzhi vha tenda Yesu, samusi zwo tea uri vha ralo. Ee, o vha o tshimbila nṱha ha maḓi, o kaidza maḓumbu, a dzikisa maḓumbu a lwanzhe, o ṋea vha maḓana na maḓana zwinnkwa na dzikhovhe nga vhuṱolo, o fhodza vhalwadze, a ita uri zwihole zwi tshimbile, a bonyolosa maṱo a mabofu, a fhodza vha mapele, a ita na u vusa vho faho. Ngauralo vha vhudzisa: “Naa arali Kristo a tshi ḓa, u ḓo ita mishumo ya vhuṱolo i fhiraho ye uyu a ita naa?”

Musi Vhafarisei vha tshi pfa gogo ḽi tshi amba-amba nga ha hezwi zwithu, vhone na vhotshifhe vhahulu vha ruma vhaḓinḓa u ya u fara Yesu. Yohane 7:11-32.

▪ Yesu u swika lini vhuṱamboni, nahone vhathu vha ri mini nga hae?

▪ Ndi ngani vhaṅwe vha tshi nga amba uri Yesu u na muya muvhi?

▪ Vhadzulapo vha Yerusalema vha dzhia hani Yesu?

▪ Ndi ngani vhanzhi vha tshi tenda Yesu?