Ndima Ya 20

Vhuṱolo ha Vhuvhili Musi e Kana

MUSI Yesu a tshi vhuyelela shangoni ḽa hawe nga murahu ha fulo ḽa u huwelela nga ho ṱanḓavhuwaho kha ḽa Yudea, ha aweli. Nṱhani hazwo, u thoma vhuṅwe vhuḓinḓa vhuhulwane kha ḽa Galilea, shango ḽe a alutshela khaḽo. Fhedzi vhafunziwa vhawe, nṱhani ha u dzula nae, vha vhuyelela mahayani avho kha vha miṱani ya havho na mishumoni ye vha vha vha tshi i shuma.

Ndi mulaedza ufhio une Yesu a thoma u u huwelela? Ndi hoyu: “Muvhuso wa Mudzimu u tsini; shandukani, ni tende mafhungo-maḓifha.” Nahone vhathu vha aravha hani? Vhagalilea vha ṱanganedza Yesu. U ṱhonifhiwa nga vhoṱhe. Naho zwo ralo, hezwi a zwi khou itiswa nga mulaedza wawe, fhedzi nṱhani hazwo, nga ṅwambo wa uri vhunzhi havho vho vha vhe Pasekani Yerusalema miṅwedzi minzhi hu tshee nga phanḓa nahone vha vhona zwiga zwi swayeaho zwe a zwi ita.

Zwi vhonala uri Yesu u thoma vhuḓinḓa hawe vhuhulwane ha Galilea kha ḽa Kana. Ni nga elelwa uri u thomani musi a tshi vhuya kha ḽa Yudea, o shandula maḓi a vha veine vhuṱamboni ha mbingano henefho. Zwino lwa vhuvhili, ṅwana wa nduna ya Khosi Herode Antipas u khou lwala nga maanḓa. I tshi pfa uri Yesu o ḓa Kana a tshi bva Yudea, yeneyo nduna i bva muḓini wayo Kapernaume u itela u wana Yesu. O ṱungufhala, onoyo munna u a khadeledza: ‘Ndi khou humbela uri u ḓe nga u ṱavhanya, ṅwana wanga a sa athu u fa.’

Yesu u a aravha: ‘Humela hayani. Murwa wau o fhola!’ Nduna ya Herode i a tenda nahone i fara lwendo lulapfu lwa u vhuyelela hayani. Nḓilani u ṱanganedzwa nga vhalanda vhawe, vhe vha gidimela u mu vhudza uri zwoṱhe zwo luga​—murwa wawe o dzivhuluwa! U a vhudzisa: ‘O thoma lini u vha khwine?’

Vha a fhindula: ‘Mulovha nga 1:00 nga masiari.’

Yeneyo nduna i humbula uri ndi tshifhinga tshe Yesu a amba ngatsho uri, ‘Murwa wau o fhola!’ Nga murahu ha zwenezwo, onoyo munna na muṱa wawe woṱhe vha vha vhafunziwa vha Kristo.

Nga zwenezwo Kana ha vha fhethu hu takalelwaho he, musi a tshi sumbedza u vhuya hawe a tshi bva Yudea, Yesu a ita vhuṱolo luvhili. Vhukuma, hovhu a si hone vhuṱolo vhu hoṱhe he a vhu ita u swika hetshi tshifhinga, fhedzi vhu a swayea ngauri vhu swaya u vhuyelela hawe kha ḽa Galilea.

Zwino Yesu u livha hayani Nazareta. Ndi mini zwe zwa mu lindela henengei? Yohane 4:43-54; Marko 1:14, 15; Luka 4:14, 15.

▪ Musi Yesu a tshi vhuyelela Galilea, hu bvelela mini kha vhafunziwa vhawe, nahone vhathu vha mu ṱanganedza hani?

▪ Ndi vhuṱolo vhufhio vhune Yesu a vhu ita, nahone vhu kwama hani vhane vha katelwa?

▪ Nga zwenezwo Kana hu takalelwa hani nga Yesu?