Ndima Ya 15

Vhuṱolo ha Yesu ha U Thoma

ḼO VHA ḽi tshi tou vha ḓuvha kana mavhili fhedzi u bva tshee Andrea, Petro, Yohane, Filipo, Nathanaele, nahone khamusi na Yakobo vha vha vhafunziwa vha Yesu vha u thoma. Zwino havha vha nḓilani yavho ya u ya hayani tshiṱirikini tsha Galilea, hune vhoṱhe vha bva hone. Hune vha ḓo swikela hone ndi Kana, ḓorobo ya hayani ha Nathanaele, i re kha muvhundu hu si kule na Nazareta, he Yesu ene muṋe a alutshela hone. Vho rambiwa munyanyani wa mbingano kha ḽa Kana.

Mme a Yesu na ene o ḓa mbinganoni. Sa khonani ya muṱa wa vhane vha khou vhingana, Maria u vhonala a tshi ṱanganela kha u langa ṱhoḓea dza vhaeni vhanzhi. Ngauralo u ṱavhanya u ṱhogomela u ṱahela ha zwithu, hune a hu vhiga kha Yesu: “A vha na veine.”

Nga zwenezwo musi Maria, a tshi nga u limusa uri Yesu a ite tshiṅwe tshithu nga u sa vha hone ha veine, Yesu u a koloṅwa. U a vhudzisa: “Ndi na mafhungo-ḓe na iwe?” Sa Khosi yo nangiwaho ya Mudzimu, ho ngo fanela u vhudzwa uri a ite mini nga vha muṱa kana nga dzikhonani. Ngauralo Maria u sia mafhungo zwanḓani zwa murwa wawe nga vhuṱali, a tshi amba nga hu leluwaho na vhaḓinḓa: “Na tshiné a ni vhudza ni ite.”

Ee, hu na nkho dza matombo dza maḓi dza rathi, dzine iṅwe na iṅwe yadzo i nga fara lithara dza 40. Yesu u laedza havha vhaḓinḓa a ri: “Ḓadzani dzinnkho maḓi.” Nahone vhenevho vhaḓinḓa vha dzi ḓadza dza guma nga milomo. Zwenezwo Yesu u ri: “Zwino ikani ni ise ha ṋenḓila.”

Ṋenḓila u takadzwa nga u ḓifha ha yeneyo veine, a sa zwi ṱhogomeli uri yo bveledzwa nga vhuṱolo. A tshi vhidza muhwe, u ri: “Vhathu vhoṱhe vha thoma u ḓisa veine yavhuḓi; musi vhó no fura vha kona u ḓisa iḽa i sí yavhuḓi. Iwe veine yavhuḓi wo i vhulunga u swika zwino.”

Hovhu ndi vhuṱolo ha u thoma ha Yesu, nahone vha tshi vhu vhona, lutendo lwa vhafunziwa vhawe vhaswa lu a khwaṱhiswa. Nga murahu, e na mme awe na vharathu vhawe, vha ṱutshela ḓoroboni ya Kapernaume tsini na Lwanzhe lwa Galilea. Yohane 2:1-12.

▪ Mbingano ya Kana yo bvelela lini vhukatini ha vhuḓinḓa ha Yesu?

▪ Ndi ngani Yesu a tshi hana nyeletshedzo ya mme awe?

▪ Ndi vhuṱolo vhufhio vhune Yesu a vhu ita, nahone ndi ṱhuṱhuwedzo ifhio ine ha vha nayo kha vhaṅwe?