Ndima Ya 84

Vhuḓifhinduleli ha Vhufunziwa

MUSI o no ṱuwa nḓuni ya Mufarisei a ḓivhaleaho, ane zwa vhonala uri ndi muraḓo wa Gota, Yesu u bvela phanḓa o livha Yerusalema. Magogo mahulu a a mu tevhela. Fhedzi vha ṱuṱuwedzwa nga mini? Ndi mini tshine zwa vhukuma tsha katelwa kha u vha mutevheli wawe wa ngoho?

Musi vha tshi khou tshimbila, Yesu u a rembuluwa a amba na eneo magogo nahone khamusi u a a tshuwisa musi a tshi ri: “Arali muthu a tshi ḓa ha nṋe á sa vhéngi khotsi-awe na mme–awe na musadzi na vhana na vharathu na khaladzi, á sa vhéngi na vhutshilo hawe, ha koni u vha mufunziwa wanga.”

Yesu u khou amba mini? Yesu hafha ha khou amba uri vhatevheli vhawe vho vha vha tshi fanela u vhenga mashaka avho zwa vhukuma. Nṱhani hazwo, vha fanela u vha vhenga nga muhumbulo wa u sa vha funa u fhira ene. Yakobo makhulukuku wa Yesu hu pfi o “vhenga” (NW) Lea a funa Rahele, zwe zwa amba uri Lea o vha a sa funeswi u fana na Rahele.

Ṱhogomelani hafhu uri Yesu o ri mufunziwa u fanela u vhenga “vhutshilo hawe.” Hafhu zwine Yesu a amba ndi uri mufunziwa wa ngoho u fanela u Mu funesa u fhira na vhutshilo hawe. Nga zwenezwo Yesu u khou ombedzela uri u vha mufunziwa wawe ndi vhuḓifhinduleli vhuhulwane. A si tshithu tshine tsha fanela u dzhenelwa u songo tshi humbulela nga vhuronwane.

U vha mufunziwa wa Yesu zwi katela na vhuleme na u tovholwa, samusi a tshi bvela phanḓa u sumbedza: “A sá hwaliho tshifhambano tshawe a ntevhela, ha koni u vha mufunziwa wanga.” Nga zwenezwo, mufunziwa wa ngoho u fanela u ḓiimisela u hwala muhwalo u fanaho na wonoyo wa u nyadziwa we Yesu a u konḓelela, arali zwo tea, u katela na u vhulahwa nga maswina a Mudzimu, zwine Yesu a ḓo zwi tshenzhela hu si kale.

Nga zwenezwo, u vha mufunziwa wa Kristo, ndi mafhungo ane magogo ane a khou mu tevhela a fanela u a ṱhogomela nga vhuronwane vhukuma. Yesu u ombedzela heyi mbuno nga tshifanyiso. U ri: “Ndi ufhio kha inwi ané a tshi funa u fhaṱa mutsheṱo, a si range u dzula fhasi a vhala mali yawe uri a vhone arali e na yo linganaho u vuledza mushumo; Uri a sa ḓo ri ó thoma u fhaṱa, a kundwa u vuledza, a vho ḓo shonedzwa nga vhoṱhe vha zwi vhonaho; vha ri: Muthu uyu o thoma u fhaṱa a kundwa u vuledza.”

Ngauralo Yesu u khou fanyisela magogo ane a khou mu tevhela uri musi vha sa athu u vha vhafunziwa vhawe, vha fanela u ḓiimisela vhukuma uri vha ḓo kona u ḓadzisa zwine zwa katelwa, u fana na musi muthu ane a ṱoḓa u fhaṱa mutsheṱo a tshi ita vhungoho musi a sa athu u thoma uri u na zwishumiswa zwa u u vuledza. A tshi ita tshiṅwe tshifanyiso, Yesu u a bvela phanḓa:

“Ndi ifhio khosi i yaho u dia iṅwe khosi í so ngo ranga u dzula ya elekanya arali zwi tshi itea u bva na maḓana a ḓana u yo lwa na uḽa o rambaho maḓana a maḓana mavhili. A tshi vhona zwí sa itei, u ḓo ruma vhaḓinḓa, a luvha uḽa á kha ḓi vha kule.”

Nga zwenezwo Yesu u ombedzela mbuno ya tshifanyiso tshawe, nga uri: “Zwo ralo na kha inwi. A sá ṱutsheliho zwoṱhe zwiné a vha nazwo’, ha koni u vha mufunziwa wanga.” Ee, ndi zwine magogo ane a khou mu tevhela, ee, na muṅwe na muṅwe ane a guda nga ha Kristo, a fanela u ḓiimisela u zwi ita. Vha fanela u ḓilugiselela u ṋekedza tshiṅwe na tshiṅwe tshine vha vha natsho​—thundu yavho yoṱhe, u katela na vhutshilo nga dzaho—​arali vha tshi ḓo vha vhafunziwa vhawe. Naa no ḓiimisela u zwi ita?

Yesu u bvela phanḓa: “Muṋo ndi tshithu tshavhuḓi.” Kha Pfunzo yawe ya Thavhani, o amba uri vhafunziwa vhawe ndi “muṋo wa shango,” a tshi amba uri vha nga tshilungi tshi thivhelaho u sina kha vhathu, u fana na musi muṋo wa vhukuma tshi tshilungi tshi thivhelaho u sina. Yesu u a phetha: “Arali muṋo wá tshinyala, u ḓo dungiswa nga mini? A u na mushumo tsimuni na mupfudzeni; tshawo ndi u laṱwa kule. A re na nḓevhe dza u pfa nga a pfe!”

Ngauralo Yesu u sumbedza uri na vho no vhaho vhafunziwa vhawe tshifhinga tshilapfu a vho ngo fanela u kulea nungo kha u ḓiimisela havho u bvela phanḓa. Arali vha ralo, a vha tsha ḓo vha na mushumo, vha ḓo nyadziwa nga ḽino shango nahone vha si tee phanḓa ha Mudzimu, vhukuma, ḽi ḓo vha samba kha Mudzimu. Nga zwenezwo, u fana na muṋo u si tshee na maanḓa, wo tshinyalaho, vha ḓo poswa nnḓa, ee, vha lozwiwa. Luka 14:25-35; Genesi 29:3-33; Mateo 5:13.

▪ Zwi amba mini u ‘vhenga’ mashaka au na u ḓivhenga?

▪ Ndi zwifanyiso zwifhio zwivhili zwine Yesu a zwi ṋea, nahone zwi amba mini?

▪ Ndi ifhio mbuno ya ṱhalutshedzo dza Yesu dza u fhedza nga ha muṋo?