Ndima Ya 89

Vhuḓinḓa ha Khathutshelo Kha ḽa Yudea

VHEGE nnzhi nga phanḓa, vhukatini ha Vhuṱambo ha u Ḓiṋekedza ngei Yerusalema, Vhayuda vho lingedza u vhulaha Yesu. Ngauralo a ya thungo ya devhula, zwi tshi vhonala uri ndi fhethu he ha vha hu sa tou vha kule na Lwanzhe lwa Galilea.

Zwenezwino, o vha a tshi khou livha vhukovhela hafhu thungo ya Yerusalema, a tshi khou funza nḓilani miḓini ya Perea, dzinguni ḽa vhubvaḓuvha ha Mulambo wa Yorodane. Musi o no amba nga tshifanyiso tsha mupfumi na Lazaro, u bvela phanḓa u funza vhafunziwa vhawe zwithu zwe a zwi funza kale musi e Galilea.

Sa tsumbo, u ri zwo vha zwi tshi ḓo vha khwine nga maanḓa muthu “a tshi vhofhelwa guyo mukuloni wawe a kudzwa lwanzheni” hu na uri a khukhulise muṅwe wa “vhaṱuku” vha Mudzimu. U ita na u ombedzela ṱhoḓea ya u hangwela, a tshi ṱalutshedza: “Naho [wa hau] a tshinya ka-ṱanu-na-kavhili nga ḓuvha ḽithihi, a vhuyelela ha iwe ka-ṱanu-na-kavhili a ri: Ndo rembuluwa! U mu hangwele.”

Musi vhafunziwa vha tshi humbela vha ri, “Ri engedze lutendo,” Yesu u a fhindula: “Arali ní na lutendo lu ngaho thorwana ya lunonya, ni ḓo ri u amba na uyu muhuyu na ri: Ḓi-tupule U yo ḓi-ṱavha ngei lwanzheni! wa ni pfa.” Ngauralo na lutendo luṱuku lu nga bveledza zwithu zwihulwane.

Lu tevhelaho, Yesu u anetshela vhuimo vhune ha itea vhutshiloni vhune ha fanyisela mavhonele o teaho a mushumeli wa Mudzimu ramaanḓaoṱhe. Yesu u a ṱhogomela: “Ndi nnyi kha inwi a re na mulanda wawe a limaho na a lisaho, ané musi a tshi vhuya tsimuni a amba nae’ a ri: Ṱavhanya u ḓa U dzule U ḽe. Naa ha nga ambi nae’ a ri: Ndugiselele zwiḽiwa ndi lalele; ganya nguvho U nṋekedze ndi ḽe ndi nwe; ngavhuya U kone u ḓo ḽa-vho, wa nwa na iwe. Huno arali mulanda uyo ó shuma zwe a mu laya, naa u a vhuya a mu livhuha naa? Nṋe ndi ri aiwa. Na kha iṅwi zwo ralo. Arali nó shuma zwoṱhe zwe na laiwa, ni ambe ni ri: A ri vhalanda vha tshithu; ro shuma zwe zwa vha zwo ri fanela.” Nga zwenezwo, vhashumeli vha Mudzimu a vho ngo fanela u vhuya vha pfa vha tshi nga vha khou thakha Mudzimu nga u mu shumela. Nṱhani hazwo, misi yoṱhe vha fanela u humbula ndugelo ine vha vha nayo ya u mu gwadamela sa miraḓo i fulufhelwaho ya nnḓu yawe.

Zwi vhonala uri ndi nga murahunyana ha musi Yesu a tshi ṋea hetshi tshifanyiso musi hu tshi swika muḓinḓa. O vha o rumiwa nga Maria na Martha, dzikhaladzi dza Lazaro, vhane vha dzula Bethania kha ḽa Yudea. Onoyo muḓinḓa u a anetshela, “Murena, vhona, uḽa muthu ané wa mu funa u a lwala.”

Yesu u a fhindula: “Vhulwadze uvhu a si vhu isaho lufuni; ndi ha uri hu rendwe Mudzimu, na Murwa wa Mudzimu a rendwe nga hone.” Musi o sala maḓuvha mavhili hune a vha hone, Yesu u vhudza vhafunziwa vhawe u ri: “Kha ri vhuyelele Yudea.” Naho zwo ralo, vha a mu humbudza: “Mufunzi, huufha Vha-Yuda zwiḽa vhó ṱoḓa u U kanḓa nga matombo; naa U funa u vhuyelela henefhaḽa naa?”

Yesu u a vhudzisa a tshi fhindula: “Naa a si uri ḓuvha ḽi na zwikhathi zwa fumi na zwivhili naa? A tshimbilaho masiari ha khukhulwi, ngauri u vhona tshedza tsha shango ḽino. A tshimbilaho vhusiku u a khukhulwa, nge hu si vhe na tshedza kha ene.”

Zwine Yesu a amba zwone ndi uri ‘zwikhathi zwa ḓuvha,’ kana tshifhinga tshe Mudzimu a tshi vhetshela vhuḓinḓa ha Yesu ha kha ḽifhasi, a zwi athu u fhela nahone u swika zwi tshi fhela, a hu na muthu ane a nga mu huvhadza. U fanela u shumisa nga vhuḓalo tshifhinga tsha “ḓuvha” tshe tsha mu salela, samusi nga murahu hu tshi ḓo ḓa “vhusiku” musi maswina awe a tshi ḓo vha o mu vhulaha.

Yesu u a engedza: “Lazaro, khonani yashu o eḓela; ndi ya henengei uri ndi mu vuse.”

Zwi tshi vhonala vha tshi humbula uri Lazaro o eḓela khofhe na uri hetshi ndi tshiga tsha vhukuma tsha uri u ḓo vuwa, vhafunziwa vha a fhindula: “Murena, arali ó eḓela u ḓo ṱuwa a tshi vha khwine.”

Nga zwenezwo Yesu u a vha vhudza zwi tshi tou pfala: “Lazaro o fa. Hone ndi a takala nge ndi si vhe hone; ndi tshi ralo ndi itela vho-inwi uri ni tende; hone nḓarieni ri ye ha ene.”

A tshi humbula uri Yesu a nga kha ḓi vhulahwa kha ḽa Yudea, naho zwo ralo a tshi humbula u mu tikedza, Thoma u ṱuṱuwedza vhafunziwa ngae: “Nḓarieni nae’, ri yo fa nae’.” Ngauralo vha tshi vhea vhutshilo havho khomboni, vhafunziwa vha fheletshedza Yesu kha hovhu vhuḓinḓa hawe ha khathutshelo kha ḽa Yudea. Luka 13:22; 17:1-10; Yohane 10:22, 31, 40-42; 11:1-16.

▪ Yesu o vha a tshi khou huwelela ngafhi zwenezwino?

▪ Ndi pfunzo dzifhio dzine Yesu a dzi dovholola, nahone ndi vhuimo vhufhio vhune ha itea vhutshiloni vhune a vhu ṱalusa a tshi itela u fanyisa mbuno ifhio?

▪ Ndi mafhungo afhio ane Yesu a a ṱanganedza, nahone u amba mini nga “ḓuvha” na “vhusiku”?

▪ Thoma u amba mini musi a tshi ri, ‘Nḓarieni uri ri yo fa nae’?