Ndima Ya 77

Vhuleme ha Ifa

ZWI tou vha khagala uri vhathu vha a zwi ḓivha uri Yesu o vha a tshi khou ḽela nḓuni ya Mufarisei. Nga zwenezwo vha kuvhangana vhe zwigidi nahone vho lindela musi Yesu a tshi bva. U fhambana na Vhafarisei vhane vha hanedza Yesu nahone vha tshi mu linga uri a ambe zwine vha ḓo mu fara ngazwo, vhathu avha vha swela u mu thetshelesa nga ndivhuho.

A tshi amba na vhafunziwa vhawe u thoma, Yesu u ri: “Thanyelani dini ḽa Vhafarisei, ndi amba tshimbevha [“muhoyo,” NW] tshavho.” Samusi zwo sumbedzwa musi vha tshi khou ḽa, maitele oṱhe a vhurereli ha Vhafarisei o ḓala nga muhoyo. Fhedzi naho vhuvhi ha Vhafarisei vhu tshi nga dzumbiwa nga muhoyo, mafheleloni vhu ḓo dzumbululwa. Yesu u ri: “A huna tsho dzumbiwaho tshiné tshi sa ḓo dzumbululwa; a huna tshiphiri tshiné tshi sa ḓo ḓihwa.”

Yesu u bvela phanḓa u dovholola khuthadzo ye a i ṋea vha 12 musi a tshi vha ruma u huwelela ngei Galilea. U ri: “Ni songo ofha vha u vhulaha muvhili, vha fhedza vha si vhe na tshiṅwe tshiné vha kona u ita.” Samusi Mudzimu a sa hangwi na luvhudzi na luthihi, Yesu u khwaṱhisela vhafunziwa vhawe uri Mudzimu ha nga vha hangwi. U ri: “Musi vha tshi ni isa zwikoloni zwavho na phanḓa ha vhavhusi na vha maanḓa, . . . Muya mukhethwa u ḓo ni funzedza tsho fanelaho u ambiwa nga tshenetsho tshikhathi.”

Muṅwe munna a re vhukati ha gogo a humbela. A ri: “Mufunzi, vhudza mukomana wanga a kovhekane ifa na nṋe.” Mulayo wa Mushe u amba uri murwa wa tanzhe u fanela u wana mikovhe mivhili ya ifa, nga zwenezwo a ho ngo fanela u vha na tshiitisi tsha uri vha lwe. Fhedzi zwi vhonala uri onoyo munna u ṱoḓa zwi fhiraho zwine a fanela u vha nazwo.

Zwo tea, Yesu u hana u ḓidzhenisa mafhungoni. U a vhudzisa: “Munna, ndi nnyi o ṋyitaho muhaṱuli na mu-kovha-ifa vhukati haṋu?” Zwenezwo a laya gogo nga uri: “Fhaṱuwani, ni thanyele vhuvhuḓu hoṱhe, ngauri muthu ha tshili nga zwiné a vha nazwo’ zwa vha zwinzhi.” Ee, hu sa londwi uri muthu a nga vha na thundu nngafhani, nga lwa nzulele u ḓo fa a i sia. U ombedzela heyi mbuno, khathihi na vhukhakhi ha u kundwa u ḓiitela dzina ḽavhuḓi na Mudzimu, Yesu u shumisa hetshi tshifanyiso. U a ṱalutshedza:

“Muṅwe munna wa mupfumi o vha o kaṋa mavhele manzhi tsimuni yawe. A elekanya mbiluni yawe a ri: Ndi ḓo ita hani? A thi na huné nda ḓo vhulunga mavhele anga. A ri: Tshiné nda ḓo ita ngetshi! Ndi ḓo thutha maḓulu anga nda fhaṱa mahulwane, ané nda ḓo kuvhanganyela mavhele anga na thundu yanga khao’. Ndi hone ndi tshi ḓo amba na muya wanga nda ri: Muya wanga, U na thundu nnzhi ya miṅwaha minzhi. Awela-ha, U ḽe U nwe wó takala! Mudzimu a mbo amba nae’ a ri: Tsilu-ḓiwe! Vhusiku vhuno muya wau u ḓo vhidzwa wa bva kha iwe; huno zwe wa shuma zwi ḓo vha zwa nnyi?”

A tshi fhedza, Yesu a ri: “Ndi zwine zwa ḓo itwa uyo a kuvhanganyaho lupfumo á sa pfumi Mudzimuni.” Naho vhafunziwa vha tshi nga vha vha songo lingea nga u ḓikuvhanganyela lupfumo, nga ṅwambo wa mbilaelo dza ḓuvha ḽiṅwe na ḽiṅwe vho vha vha tshi nga thithiswa nga hu leluwaho kha tshumelo ya mbilu yoṱhe kha Yehova. Ngauralo Yesu u shumisa tshenetshi tshifhinga u dovholola nyeletshedzo yavhuḓi ye a vha ṋea ṅwaha na tshipiḓa wo fhiraho Pfunzoni ya Thavhani. A tshi rembulutshela kha vhafunziwa vhawe, u ri:

“Ni songo vhilaela vhutshilo na ri: ri ḓo ḽa’ni? na vhilaelela muvhili na ri: ri ḓo fuka’ni? . . . Vhonani mahunguvhu: ha zwali, ha kaṋi, ha na tshisiku, ha na ḓulu; huno Mudzimu u ḓi a fha zwiḽiwa. . . . Sedzani mavolenga. Ha hoṱi muḓali, ha luki nguvho; huno na Salomo vhurenani hawe hoṱhe o vha á so ngo ambara sa ḽithihi ḽa one. . . .

“Ndi zwone-ha, litshani u ri: ri ḓo ḽa’ni? ri ḓo nwa’ni? litshani u ṱoḓa-ṱoḓa. Izwo zwoṱhe zwi londiwa nga vha-nnḓa vha shango; inwi Khotsi aṋu u a ḓivha zwauri ni na mushumo nazwo’. Tshihulwane, ṱoḓani muvhuso wawe; izwo zwi ḓo vha zwiné na ingiwa ngazwo’.”

Zwihuluhulu vhukatini ha zwifhinga zwi konḓaho kha zwa ikonomi maipfi a Yesu a fanela u humbulwa nga ho dzikaho. Muthu ane a vhilaelesa nga maanḓa nga ha ṱhoḓea dzawe dza zwithu zwi vhonalaho nahone a thoma u humela murahu kha u tovhola zwithu zwa muya, zwi re zwone ndi uri u khou sumbedza u sa vha na lutendo kha vhukoni ha Mudzimu ha u lugiselela vhashumeli Vhawe. Luka 12:1-31; Doiteronomio 21:17.

▪ Ndi ngani khamusi, uyu munna a tshi vhudzisa nga ha ifa, nahone ndi u laya hufhio hune Yesu a hu ṋea?

▪ Ndi tshifanyiso tshifhio tshine Yesu a tshi shumisa, nahone tshi funza mini?

▪ Ndi nyeletshedzo ifhio ine Yesu a i dovholola, nahone ndi ngani yo tea?