Ndima Ya 69

Vhuleme ha Vhukhotsi

VHUKATINI ha vhuṱambo, nyambedzano ya Yesu na vharangaphanḓa vha Vhayuda i khou ḓi ya i tshi engedzea. Yesu u a tenda: “Ndi a zwi ḓivha zwauri ni vhana vha Abrahamu; huno ni khou ṱoḓa u mbulaha uri fhungo ḽanga ḽi si dzule kha inwi. Nṋe ndi amba zwe nda pfa Khotsi-anga, izwi huno ni ita zwe na pfa khotsi-aṋu.”

Naho a sa ṱalusi khotsi avho, Yesu u zwi ita zwa pfala uri khotsi avho o fhambana na wawe. Vha sa ṱhogomeli uri Yesu u khou humbula nga ha nnyi, vharangaphanḓa vha Vhayuda vha a fhindula: “Riṋe khotsi-ashu ndi Abrahamu.” Vha ḓipfa uri vha na lutendo lu fanaho na lwa Abrahamu, we a vha e khonani ya Mudzimu.

Naho zwo ralo, Yesu a vha mangadza nga heyi phindulo: “Ngavhe ni vhe vhana vha Abrahamu, ndi misi ni tshi shuma mishumo ya Abrahamu.” I ngoho, murwa wa vhukuma u edzisa khotsi awe. Yesu u ri: “Zwino ni khou ṱoḓa u mbulaha, nṋe ané nda vha muthu o ni vhudzaho mafhungo-ngoho, e nda pfa Mudzimu. Abrahamu zwa u ralo ha ngo zwi ita.” Ngauralo Yesu u dovha a ri: “Inwi ni shuma mishumo ya khotsi-aṋu.”

Naho zwo ralo a vha pfesesi uri Yesu u khou amba nga ha nnyi. Vha kha ḓi amba uri ndi vhana vha re mulayoni vha Abrahamu, vha tshi ri: “A ro ngo bebiwa nga vhupombwe.” Nga zwenezwo, vha tshi amba uri ndi vhagwadameli vha ngoho u fana na Abrahamu, vha a khwaṱhisa: “Ri na khotsi-ashu, muthihi, ndi Mudzimu.”

Fhedzi naa Mudzimu ndi Khotsi avho zwa vhukuma? Yesu u a aravha: “Mudzimu ngavhe e ene khotsi-aṋu, ndi misi ni tshi mpfuna; ngauri ndo ḓa ndi tshi bva Mudzimuni, a tho ngo tou ḓi-ḓisa; ndi ene o nthumaho. Ni kundwa ngani u ṱalukanya zwiné nda amba?”

Yesu o lingedza u sumbedza havha vharangaphanḓa vha vhurereli mvelelo dza u mu landula. Fhedzi zwino u tou amba nga u tou livha a ri: “Inwi ni bva ha khotsi-aṋu Diabolo; huno ni funa u ita nyemulo dza khotsi-aṋu.” Diabolo ndi mufuda-ḓe wa khotsi? Yesu o mu ṱalusa sa muvhulahi nahone a dovha a ri: “Ndi ene muzwifhi, ndi ene khotsi ya vhadzia-u-zwifha.” Nga zwenezwo Yesu u phetha nga uri: “Ane a bva kha Mudzimu, mafhungo a Mudzimu u a a pfa. Inwi ni sa a pfi, ndi ngauri a ni bvi kha Mudzimu.”

Vha tshi sinyuswa nga khaṱulo ya Yesu, Vhayuda vha a fhindula: “A ri ambi zwone kani ri tshi ri U Mu-Samaria, ri tshi ri U na muya muvhi?” Dzina “Mu-Samaria” ḽi shumiswa sa mubulo wa u nyadza na u sema, samusi Vhasamaria vhe vhathu vhane vha vhengwa nga Vhayuda.

A sa londi u mu sema havho vha tshi ri ndi Musamaria, Yesu a fhindula a ri: “Nṋe a thi na muya muvhi; tshi re hone, nṋe ndi hulisa Khotsi-anga, inwi ni ro nnyadza.” A tshi bvela phanḓa, Yesu u ita fulufhedziso ḽi nyanyulaho: “Ané a ḓo vhulunga ipfi ḽanga, lufu ha nga lu vhoni na lini na lini.” Vhukuma, Yesu ha khou amba uri vhoṱhe vhane vha mu tevhela zwa vhukuma a vha nga fi. Nṱhani hazwo, u amba uri a vha nga ḓo fheliswa tshoṱhe, kana “lufu lwa vhuvhili,” hune ha si tsha ḓo vha na mvuwo.

Naho zwo ralo, Vhayuda vha dzhia maipfi a Yesu nga lwa thevhedzaipfi. Nga zwenezwo, vha ri: “Zwino ndi hone ró zwi ḓivha-ha, zwauri U na muya muvhi. Huufha Abrahamu ó fa, na vhaporofita vhó fa, iwe wa ri: ané a vhulunga ipfi ḽanga ha nga thetsheli lufu na lini na lini! Kani iwe U fhira khotsi-ashu Abrahamu, we a fa? na vhaporofita vho fa. U ḓi-ita nnyi?”

Kha heyi nyambedzano yoṱhe, zwi tou vha khagala uri Yesu u khou livhisa havha vhanna kha mbuno ya uri ndi ene Messia o fulufhedziswaho. Fhedzi nṱhani ha uri a fhindule mbudziso dzavho nga ho livhaho uri ndi ene nnyi, Yesu u ri: “Arali nṋe ndo vha ndi tshi ḓi-renda, ndi musi thendo yanga í si ya tshithu. Ndi Khotsi-anga ané a nthenda, ané inwi na ri: ndi Mudzimu washu, Ngeno ní sa mu ḓivhi. Nṋe hone ndi khou mu vhona. Arali nda nga u ri, a thi mu vhoni, ndi nga vha muzwifhi sa vho-inwi.”

A tshi bvela phanḓa, Yesu u dovha u amba nga ha Abrahamu a fulufhedzeaho, a tshi ri: “Abrahamu khotsi-aṋu o ḓi-phiṋa a tshi pfi u ḓo vhona ḓuvha ḽanga; ene a ḽi vhona, a takala.” Ee, nga maṱo a lutendo, Abrahamu o sedza phanḓa kha u ḓa ha Messia o fulufhedziswaho. Vha sa zwi tendi, Vhayuda vha aravha vha ri: “Ú sathu u vha na miṅwaha ya mahumi maṱanu wa ri: Abrahamu ndo mu vhona?”

Yesu u a fhindula: “Ngoho, ngoho, ndi a ni vhudza: Abrahamu á sathu u vha hone, nṋe ndi hone.” Vhukuma, Yesu u khou ambela kha ha musi a sa athu u vha muthu fhano kha ḽifhasi e muthu wa maanḓa na wa muya ngei ṱaḓulu.

Vha tshi sinyuswa nga u ḓiamba ha Yesu uri o vha e hone Abrahamu a sa athu u vha hone, Vhayuda vha doba matombo vha tshi ri vha mu kanḓe ngao. Fhedzi a dzumbama a bva thembeleni a songo huvhala. Yohane 8:37-59; Ndzumbululo 3:14; 21:8.

▪ Yesu u sumbedza hani uri ene na maswina awe vha na vhokhotsi vho fhambanaho?

▪ Zwi amba mini arali Vhayuda vha tshi vhidza Yesu uri ndi Musamaria?

▪ Ndi nga muhumbulo ufhio musi Yesu a tshi ri vhatevheli vhawe a vha nga vhoni lufu na kathihi?