Ndima Ya 54

“Vhuswa Vhukuma Vhu Bvaho Ṱaḓulu”

ḒUVHA ḽo fhiraho, vhukuma ḽo vha ḽo ḓala nga zwiitea. Yesu o fusha vhathu vha zwigidi lwa vhuṱolo nahone a dovha a shavha musi vhathu vha tshi ṱoḓa u mu ita khosi. Honoho vhusiku o tshimbila Lwanzheni lwa Galilea lwe lwa vha lu na maḓumbu; o thusa Petro, we a thoma u mbwandamela musi a tshi khou tshimbila maḓini e a vha a tshi khou vhudzulwa nga maḓumbu; nahone a dzikisa magabelo u itela uri vhafunziwa vhawe vha si pwashetshelwe nga gungwa.

Zwino vhathu vhe Yesu a vha fusha lwa vhuṱolo devhula-vhubvaḓuvha ha Lwanzhe lwa Galilea vha mu wana tsini na Kapernaume nahone vha vhudzisa: “Wo bva nga ngafhi?” A tshi vha sasaladza, Yesu u ri vho ḓa u mu ṱoḓa fhedzi ngauri vha lavhelela u wana zwiṅwe zwiḽiwa nga fhedzi. U vha khadeledzela u shuma, hu si u shumela zwiḽiwa zwine zwa sina, fhedzi u itela zwiḽiwa zwine zwa dzula zwi hone u itela vhutshilo vhu sa fheli. Ngauralo vhathu vha a vhudzisa: “Ri ḓo ita hani uri ri shume mishumo ya Mudzimu?”

Yesu u amba fhedzi mushumo muthihi wa ndeme nga maanḓa. U a ṱalutshedza: “Mushumo wa u shumela Mudzimu ndi uri ni tende we a mu ruma.”

Naho zwo ralo, vhathu a vha tendi kha Yesu, hu sa londwi vhuṱolo hoṱhe he a ita. A zwi tendei uri na musi o no ita zwithu zwoṱhe zwi mangadzaho, vha a vhudzisa: “U ḓo ita vhuṱolo vhufhio ra vhona ra U tenda? U ḓo shuma mini? Vho-khotsi–ashu vho ḽa Mana sogani, vhunga ho ṅwaliwa ha pfi: O vha ṋea vhuswa vhu bvaho ṱaḓulu, vha ḽa.”

A tshi aravha u humbela havho vhuṱolo, Yesu u ṱalusa lu pfalaho Tshisima tshi ṋeaho vhuṱolo, nga uri: “A si Mushe we a ni ṋea vhuswa vhu bvaho ṱaḓulu; ndi Khotsi-anga we a ni ṋea vhuswa vhukuma vhu bvaho ṱaḓulu. Ngauri vhuswa ha Mudzimu, ndi o tsaho a tshi bva ṱaḓulu, a ṋeaho shango vhutshilo.”

Vhathu vha ri: “Murena, ngavhe U tshi ḓi ri fha vhuswa honoho.”

Yesu u a ṱalutshedza: “Ndi nṋe vhuswa ha vhutshilo. A ḓaho ha nṋe ha tsha ḓo dovha a pfa nḓala; a tendaho nṋe ha tsha ḓo dovha a pfa ḓora. Hone ndo ni vhudza nda ri: Naho nó mbona a no ngo ntenda. Vhoṱhe vhe Khotsi a mpha, vha ḓa ha nṋe; huno a ḓaho ha nṋe a thi nga mu thudzeli kule. Ngauri ndi tshi bva ngei ṱaḓulu a tho ngo ḓela u ita zwiné nṋe nda funa, ndo ḓela u ita zwiné zwa funwa nga o nthumaho. Huno zwiné zwa funwa nga Khotsi o nthumaho, ndi uri ndi si xelelwe na nga muthihi wa vhe a mpha, uri vhoṱhe ndi vha vuse nga ḓuvha ḽa vhufhelo. Zwine Khotsi-anga a zwi funa ngezwi: Vhoṱhe vha vhonaho Murwa vha mu tenda, vha vhe na vhutshilo vhu sa fheli.”

Nga zwenezwi Vhayuda vha thoma u gungulela Yesu nge a ri, “Vhuswa ho bvaho ṱaḓulu ndi nṋe!” A vha vhoni tshiṅwe tshithu khae nga nnḓa ha uri ndi murwa wa vhabebi vha vhathu nahone nga nḓila i fanaho na ye vhathu vha Nazareta vha ita ngayo, vho hanedza, vha tshi ri: “Naa a si ene Yesu, murwa wa Yosefa? Khotsi-awe na mme-awe naa a ri vha ḓivhi? Zwino u amba hani a ri: ndo bva ngei ṱaḓulu?”

Yesu u a vha fhindula: “Litshani u gungula nga tshaṋu. Haho’ a konaho u ḓa ha nṋe, arali Khotsi o nthumaho á sa mu kokodzi; huno ndi nṋe ane nda ḓo mu vusa nga ḓuvha ḽa vhufhelo. Vhaporofita vho ṅwala vha ri: Vhoṱhe vha ḓo vha vho funziwaho nga Mudzimu. Vhoṱhe vha pfaho a Khotsi vha ḓi-funza eneo, ndi vhone vha ḓaho ha ene. A si uri hu na muthu o vhonaho Khotsi; o mu vhonaho ndi uyo o bvaho ha Khotsi; ndi ene o vhonaho Khotsi. Ngoho, ngoho, ndi a ni vhudza, a tendaho u na vhutshilo vhu sa fheli.”

A tshi bvela phanḓa, Yesu u a dovholola: “Ndi nṋe vhuswa ha vhutshilo. Vho-khotsi-aṋu vho ḽa Mana ngei sogani, vha fhedza vha fa. Vhuswa ngovhu, vhu bvaho ṱaḓulu, vhuné muthu a vhu ḽa a si tsha fa. Ndi nṋe vhuswa vhu tshilaho, vhu bvaho ṱaḓulu. Arali muthu á ḽa vhuswa uvhu, u ḓo tshila tshoṱhe.” Ee, nga u tenda kha Yesu, o rumiwaho nga Mudzimu, vhathu vha nga tshila tshoṱhe. A hu na mana, kana tshiṅwe tshinnkwa naho tshi tshifhio, tshine tsha nga zwi ita!

Nyambedzano malugana na tshinnkwa tshi bvaho ṱaḓulu zwi vhonala uri yo thoma nga murahunyana musi vhathu vho no wana Yesu tsini na Kapernaume. Fhedzi i bvela phanḓa, i swika vhuimoni ha nṱha nga murahu musi Yesu a tshi funza tshikoloni ngei Kapernaume. Yohane 6:25-51, 59; Psalme ya 78:24; Yesaya 54:13; Mateo 13:55-57.

▪ Ndi zwiitea zwifhio zwe zwa rangela phanḓa nyambedzano ya Yesu malugana na tshinnkwa tshi bvaho ṱaḓulu?

▪ Nga ṅwambo wa zwe Yesu a vha a tshi kha ḓi bva u zwi ita, ndi ngani khumbelo ya vhuṱolo i songo tea nga u rali?

▪ Ndi ngani Vhayuda vha tshi gungulela Yesu musi a tshi amba uri ndi ene vhuswa vhukuma vhu bvaho ṱaḓulu?

▪ Nyambedzano ya vhuswa vhu bvaho ṱaḓulu yo itea ngafhi?