Ndima Ya 9

Vhutshilo ha Hayani ha Yesu ha U Thoma

MUSI Yesu a tshi khou alutshela kha ḽa Nazareta, ndi muḓi muṱukuṱuku, u sa dzhielwiho nṱha. U muvhunduni une wa pfi Galilea, hu si kule na Govha ḽavhuḓi ḽa Yeseriele.

Khamusi musi Yesu e na miṅwaha mivhili, Yosefa na Maria vha mu ḓisa henefha vha tshi bva Egipita, zwi tou pfala uri ndi ṅwana e eṱhe wa Maria. Fhedzi hu si nga tshifhinga tshilapfu. Nga u ya ha tshifhinga, ha bebwa Yakobo, Yosefa, Simoni, na Yuda, nahone Maria na Yosefa vha dovha vha vha na vhana vha vhasidzana. Mafheleloni Yesu u vha na vharathu na dzikhaladzi vha rathi.

Yesu u na maṅwe mashaka hafhu. Ri vho ḓivha nga ha Yohane muzwala wawe muhulwane, ane a dzula kule nga maanḓa kha ḽa Yudea. Fhedzi ane a dzula tsini Galilea ndi Salome, ane zwa vhonala uri ndi mukomana wa Maria. Salome o malwa nga Sebedeo, ngauralo vharwa vhavho vhavhili, Yakobo na Yohane, vho vha vha tshi ḓo vha vhazwala vha Yesu. A ri ḓivhi arali Yesu, musi a tshi khou aluwa, o vha a tshi ṱwa tshifhinga tshinzhi na havha vhatukana, fhedzi nga murahu vho vha khonani dza tsini.

Yosefa u fanela u shuma vhukuma u itela u tikedza muṱa wawe une wa khou engedzea. Ndi muvhaḓi. Yosefa u alusa Yesu sa murwa wawe, ngauralo Yesu u vhidzwa “murwa wa muvhaḓi.” Yosefa u funza Yesu uri na ene a vhe muvhaḓi, nahone u guda zwavhuḓi. Ndi ngazwo vhathu nga murahu vha tshi nga ri nga ha Yesu, “Hoyu ndi muvhaḓi.”

Vhutshilo ha muṱa wa Yosefa ho thewa kha vhurabeli ha Yehova Mudzimu. Vha tshi tendelana na Mulayo wa Mudzimu, Yosefa na Maria vha ṋea vhana vhavho pfunzo ya muya ‘musi vho dzula nḓuni yavho, musi vho fara lwendo, misi vha tshi lala, na misi vha tshi vuwa.’ Hu na tshikolo Nazareta, nahone ri nga vha na vhungoho ha uri zwifhinga zwoṱhe Yosefa u dovha a ya na muṱa wawe u ya u rabela henefho. Lu sa timatimisi vha wana dakalo ḽihulwane kha nyendo dza misi yoṱhe dza u ya nḓuni khethwa ya Yehova ngei Yerusalema. Mateo 13:55, 56; 27:56; Marko 15:40; 6:3, NW; Doiteronomio 6:6-9.

▪ Yesu u na vharathu na dzikhaladzi vhane vha nga vha vhangana, nahone madzina a vhaṅwe vhavho ndi afhio?

▪ Ndi vhonnyi vhazwala vha Yesu vhararu vha ḓivheaho vhukuma?

▪ Ndi ufhio mushumo wa u ḓitshidza une mafheleloni Yesu a u ita, nahone ndi ngani?

▪ Ndi ifhio pfunzo ya ndeme ine Yosefa a i ṋea muṱa wawe?